Перевод на ненецкий язык

Едемы не едэй соявы нюмда, сюнда ха’’аммахад, тандая’ сертавы ебц’ мю’ сыхыдаӈгуда. Нюнда ебцад нисяда, харта ирида ӈахакуд мимби’’.

Пили’’ нерде’ ӈоб’’ ямб, тыялюй пя’ хэвм’ сомбовна сябаркая, туросахана салмрахая, ебц’ педарӈэ таслаӈгудада. Тиканда пирдада ю’’ сидя сантиметра’ мян. Лата’ сидя малм’ миртя хасава, выяркая, сидя явна парэӈгана сидертада. Тадтикад лантанда малха’ мярёй иняна ӈобт’ сяраӈгухуюда.
Ӈылданда няю’ сядо’’манда хэвамда ӈани’ сяӈхав явна парэӈгана сидертада, ебц’ ӈылдаӈэ таславы сидя хаця сюребтяварка латаха’ мярёй иняна сярота. Ӈэванда няю’ сядота ебц’ педаркана ӈани’ сидя сим’ парэӈгана сита. Тикы сидя син’ сёйрадм’ мярёй иняна мэйрахая сяраӈгу. Ӈацекэко сята нива ханьторма’, та’ ёльцяӈгана неняӈг’’ сята нива ӈорма’’ е’’эмня, сёйрад’’ нимня тохос’ ютер’’, ӈокась синдёда. Едэй соявы ӈаябэй’ ӈацекы ӈахакуд небянда сэдвы седта танява. Тикаӈэ нохо’, тэваси’ хобахат, няблюйхад сэдвы. Тикарихина сэван’ ӈадимда ӈацекым’ ситя нямвы не хуракоцядарев’ сэдвы сед’ мю’ сыхыдаӈгуда. Хуракоцянда мюня’ сюнда ха’’амва’ ёльцянд’ мэӈгу. Ӈаябэй ӈацекы ненэй тарана ӈамгэда носи’’, тэваси’’ хобахат, няблюйхад сэдвы ӈэ’’нив’.
Ӈацекы седта ебцанда ӈардан’, ямбдан’ ёльцевы, ӈылдада тохоця ютер’’. Седта пиняӈы сомбой тохокана тэнавы. Ӈацекэмда сыхыдаванда нерцюна, ебц’ ӈылдан’ клеёнкахад паркавы таём’ лехэбтамби, тиканда ни’ нярцом’ лехэбтаӈгу. Хурина пыхыдамда саӈговотаӈэ тосалта не нярсодамда мале’ ӈахакуд та’ тёнд’’ нив’. Тарця лэтрамадо’ яӈгода не хэвняд нярсодадо’ тэмдаӈгу’’ ни’’им’’, нярсосяда’ ӈацекы’’ ӈока маям’ мэта’’. Хурина ӈацекы’ ӈанзим’ хасабтамбада нярсори’’ ӈэ’’нив’. Нярсута ний’ ӈаямбэй ӈацекы ты’ пемзяд таславы лимбикахана лехэбтавы. Седта ӈанзинанда нивада санибтеванда е’’эмня, сыхыдава’ нерцюна сыдыта’’ нийм’ небяда тамна клеёнка’ ютекэцяхана синтабида. Ӈэванда ӈылна ябто’, ты’ таркана сабвы пуркубтада танява. Пуркубтанда ниня’ сальняда лехэбты. Ӈацекы’ ебцада няхар’’ иняна хуры. Тикаӈэ ебц’ ӈылдан’ мярёй иняна тебдевы. Нюнда ебц’ ин небяда ӈодякохона, харвобта лоӈгэйхана падтамбида.
Хурина тайкуд маниеб’’, едэй ебц тэри ханя’’ сомбойко. Сёяранда иняна хуркари хыӈганако’’ сяры’’, ебцанда сидя хэвхана спичка’’ ӈэбто’ тара’’, пармаданда мэтида’’. Сёярта ний’ сомбой шальхана, тохокана синды. Яля’, ӈухуд иням’ сярхая, ӈаябэй ӈацекым’ пыӈгэй’ нид манзабтамбада.
Хурина ямданава’, ныхы ян’ хэва’ ёльцяӈгана ебц’ мюня мэна ӈацекы ебцанда нимня юй’’мям’ мэӈа. Тиканда мю’ ебцсавэй ӈарханда паклембада.
Юй’’мяда таславы торикоко ты’ хобахад ебцанда пяныдарев’ сэдвы. Юй’’мя пиняӈэда тохокана тэнавы. Юй’’мя тет иняна ӈобня’ сярыбада, ебцада ӈарханда, сёярта малхарт нись ӈадю юй’’мянда мюня ӈа.
Хурина ӈацекы хаб’’нанда ебцанда ӈылдарида хаебада, юй’’мяда, седада нянанда хаюрта’’. Пыда пуданда ӈани’ ӈацекы’’ сояб’’, ебцанда педерм’, едэйвана ӈылдахая, тамна тяха’ нида мэтадо’.