Хибя округханана «Илебц» театрава ехэрада? Маня’’ округва ӈарка ни’’ӈа’’, мар’’ма ӈод нюдява’’. Ӈодьбянда маркана иленаӈэ’ малӈэ’ нина’’ теневына’’. Ненэцие’’театрхана сянакода’’ нина’’ӈод малӈэ’ теневана’’.

Ӈокаюв’ таняна сянакодина’’ нянэй ненэця’’, ханяӈыдо’ ӈока по’’ямбан маля маркана иле’’. Ӈокаювдо’ театрханана нюртей яляхат’ сянаку’’, поӈгнандо’ Серафима Петровна Дуркинам’ нюмдесь’ тара. «Тэдармана» сита’’ маля маниеваць. Серафима Петровна нянэй не. Округна Ӈарка яхана мюсерта ненэцие’’ мякана соясь, нюдякоданда хойхана вадюданась. Нися’ хасада Петр Кузьмич Явтысый илеванда ямбан тэхэна мэна’’ненэцясь, ям’ теневанась. Нюда’’ ӈод илеванда ямбан’ сава серт’ табадабись, ямдо’сахарамбась тохолась. Пыда нюда’’ малӈэ’ сава хибяриӈэ’ вады’’. Харто’вадамдо’ мэ’’ӈа’’, культурамдо’ теневана’’, пангудо’ тенена’’.Теда хусувэдо’ харто’ нюдо’ ӈод хусувэй тарця серт’ тохолабидо’. Тарем’ ӈод Серафима Петровна Дуркина иле. Тикы нява маля ӈока по’’ ямбан маркана иле. Манзаравада ӈод тянё вани’’ ӈа. Маля сян по’’ ямбан культурахана манзара. Манзаянанда ненэцие’’ культурава театрхана сянакода’’ нита’’няюв ханярина манэ’’лабтамбида. Пыда теда «Илебц» театр’ манзаям’ нерня пэртя. Нита’’ няюв’’ ма’’люрць ӈока ихиня сомбой манзаи’’ масьтець. Хуняна,хор’’ ирийна юдимдей толыркана Серафима Петровна со’’яма ялямда ядабтамби. Пыда нянда сямянд’ сава вади’’ ӈэдарабидм’: хусувэй хибярихина сямянд’ тарана – сенз’ ӈэва’’. Сензан’ ӈа’’. Сензан’ ӈэӈгун’ хусувэй ӈамгэр’ танеӈгу, ир’ сава ӈэӈгу, хусувэй сертамбада манзаяр’ саваривна нерняри минда. Тамна ӈока по’’ямбан ивнянд’ ӈэда’’, хибярихина тарана манзаябт’ нерняри’’ минред’’. Театран’ сянакованзь’ ӈацембой хибяри’’турӈая’’,вадамдо’ хэвхананда тохолабамдо’. Мякнанд’ ӈод серуд’ сава’’ ӈэя’’, нюд’’, нют’ ню’’ сенз’’ ӈэя. Сава ихиня хусувэй товы ялям’ ядтабю, варёмд’ мэць нерняри’’ мэёвна яд’’. Нянд’ ӈарка вада!