Вы здесь

Хэбидя ялямдо’ мэта’’

Округна еркы маркана, хусувэй ӈэсыхына школа’’ таня’’, ханяна тохолкодина ӈацекы’’ тохоламби’’. Пыдо’ саць тарана манзаям’ пэртя’’ хибяри’’. Тикахад’ ханзер’ ӈацекына школахана тоходангу’’ пыдо’ илан’ тарпгуд’.

Сававна тоходанвы’’ ӈацекэр’ нерня тоходанвась’ едтёда, илевамда месури’’ нида’’ мэт. Харта янда е’’эмня харвась манзараван’ харваӈгу. Хусувэй сава серт’ школахана манзарана’’ нина’’ ӈацекы’’ тохоламби’’.

Тохолкода’’, воспитатель’’ харто’ манзаяндо’ хэбидя яля’ таня. Тюку ирийна самлязимдей толыркана яханана манзарана’’ тохолкодина ӈарка ялям’ мэ’’манзь ма’’лаӈгуна’’. Тохолкода яля. Тарця яляхана хусувэй школахана тоходанвы хибяри нюртей тохолкодада ихиньда тосьты. Тохолкода, хуний сит’ сяӈгова толанзё, толаӈго, паднась тохолабись. Нюдяко’’ ӈацекэхэна манзарась сяӈок ныхы’’ тара’’. Мань’ тет’’ ю’’ самляӈг по’’ тяхана нюрте партя’ тя ӈамдываць. Тенев’, ханзер сидна нюртей тохолкодава ядтабись. Юлия Александровна Канюкова – мань’ нюртей тохолкодавась. Пыда янамбовна, нись’ пилимбю сидна’’ хусувэй таранан’ тохолабись. Нюртей тохолкодава маля яӈгумбэй, ихиня пилибт’ илеӈгу. Пыда сими’ сямянд’ нюрте тохолавы. Тикы’ пуд тохолкодина’’ ӈока ӈэ’’ нисям’, хусувэдо’ харта манзаямда минресь.

Теда ӈод’ хусувэй школахана ӈацекына тохолабдина манзара’’, поӈгнанда нянэй не’’ тохолкода’’ тянё ни’’ӈа’’. Хусувэй ӈэсыхына манзара’’, ханяӈыдо’ нюмдегун’- нюдяко’’ ӈацекы’’ маля пон’ тохолабда’’ Валентина Степановна Тайбарей Хорей Верхана, Анна Григорьевна Апицына Нельмин Саляхана, Елена Ивановна Семяшкина Андегхана, Елена Гавриловна Хатанзейская Краснойхана, маля ӈока’’ма мал’’ нюмдева’’ серта яӈгу. Ненэця вадам’ пэртина ӈарка серм’ минре’’, пыдо’ манзаравадо’ хусувэй по’ саӈго’’ворӈа’’. Вадам’ теневана’’ ӈацекына тянё’’нё. Тикада тамна ихиня вэварха, хардахандо’ вадам’ мэта небя, нися ӈацекыто’ няюв ни’’лахана. Маня’’ вадава нерня илева е’’эмня малӈэ’ ныхына’’ масьтебнана’ тара’’ нив’. Вадам’ теневанаӈэ’, ӈацекы’’ тохолабдаӈэ’ газетахана падвыда’’ ӈэдарабида’’.

Тюку ирий’ самлязимдей яляхана – тохолкода яля’, ӈарка яля’. Хусувэй тохолкодан’, школахана манзаранан’ сава вади’’ мэ’’ӈадм’. Минрена манзаянда хэбидя ялям’ сава ихиня ядабтара, сензда ӈада’’, ӈацекы’’ харвась тоходаная, сава тоходанвахана сидда’’ маймбтембая. Пыдара’’ ӈарка серм’ минренада’’.