Вы здесь

Манзаямда мэнена хибяри

Тюку ирий’ маттамдэй яляхана тохолкода, округна’’ образование ветеран Нина Васильевна Алсуфьева со’’яма ялямда мэ’’ӈась.

Тикы яляхана мякнанда телефонда яля’ ямбан нись мунзялӈга. Со’’яма яляхананда нянда сава вадам’ хэтван’ харвана’’ ӈокаць – манзарась ня’’амы’’ нида’’, тохоламбавы ӈацекыда, хибяри’’ хибя’’ ӈока по’’ тохолкодам’ теневадо’.
Нина Васильевна 55 по’’ ямбан’ тохолкодаӈэ манзарась! Таӈок похот’ 40 по’’ ямбан’ Ненэцие’’ школа-интернатхана биология’ предмет’ минресь.
Пыда нюдякоходанда тохолкодаӈэ хэван’ харвавысь. Сайнорма по’’ мальӈгана вадюданась, нензелта’ яӈгусь. Нисяда сайнорманзь хэбнанда Нина тамна саць нюдясь. Небяда госпиталькана манзарась. Нина небянда’ ня таняна мэвы ӈэсеты, хусувэй яля’ едета солдат’’ маниесь…

Сайнорма по’’ пуд’ вадюданавада

– Небян’ нися тыбэртя ӈэвысь, пыди’ хадан’ ня Сопка ӈэсыхына илеӈаханзь. Небями’ вадю’’махаданда ӈани’’ ям’ манэ’’манзь ӈэдалавыць. Сопкахаданда Няръяна март’ товысь, – вадамда Нина Васильевна пядась. – Тюкохона нисями’ ядабтавысь, нисяв’ Василий Яковлевич Булатов, яхана’’ Великой Устюг маркад’ товысь, лесозаводхана бухгалтерӈэ манзаравысь. Пыда Устюгхана прописанной ӈэвысь, 1939 похона военкоматан’ хамэдонзь, тамальӈгана финской война мале мимысь. По’ ваерась, 1940 похона, Вологодской областьхана Сокол’ маркана мань соядамзь. Нелли тарем’ небями’ сими’ нюмдевысь, падрони’ сертабаванда ёльцяӈгана, нисяв’ нювм’ юрвысь… Нина тарем’ падвэдась. Тарем’ тарця нюм’ мэць мань иледм’, – Нина Васильевна вадамда нерня’ минреда. – Нисями’ службан’ хаясь, ӈарка сайнорма по’’ мальӈгана северной флотхана сайнормысь.
Сайнорма ваера’’махад Булатов’ мяд’ тер’’ округхана’’ товыць.
– Небями’ оленсовхозхана манзарась пядась, Хатанзейской улицахана илеваць, лохокоцява’’ нюдякось, – Нина Васильевна вадамда нерня’ минреда. – Ӈопой хардахана ӈокаӈэ илеваць, ӈацекэӈэ ӈокаваць. Ӈобкана вадюданаваць, сянакосетыва’’. Сырэй мальӈгана пихина сянакосетыва’’.

Нертеймэвна – самлязимдей классан’

Си’’ив классм’ ёльце’’махаданда Нина Булатова Няръяна маркы’ педучилищен’ тоходанаванзь тэвыць. Педучилище’ пуд’’ округна’’ ниня ӈарка школахана манзарась, ю’’ по’’ ямбан’ маркы’ нертей школахана манзарась. Манзараванда’ поӈгана институт’ ёльцесь, биология’ тохолкода диплом’ ня’’мась. 1974 по’ вэба’’ ирий’ нертей яляхана Ненэцие’’ школа-интернатан’ манзараванзь тэвыць. Нертей классамда Нина Васильевна илеванда’ ямбан’ тенеда. Пыда самлязимдей классхана тоходанана’’ ӈацекы’’ классной руководительӈэ хаясь. Классхананда 42 хибярись, 26 – евако ӈацекы’’ ӈэвыць. Тикы ӈацекы’’ школамдо’ олимпийской 1980 похона ёльцедонзь, тамальӈгана пыдо’ классной руководителькандо’ сямянд сава вадидо’ хаець. Нертей выпускникда Нина Васильевна тенад тенейда.
Нина Алсуфьева’ нямна манзарась ня’’мы нида’’ савари’’ вади’’ мэцеты’’.
Школа-интернатхана манзараванда мальӈгана Нина Васильевна пили’’ манзаида несэюмдабасеты, манзаяхананда несэй ӈавори’’ пюрцеты. Пыда манзараванда мальӈгана школа-интернатхана живой уголок ӈадимясь. Сян’ тэнз’ халякоця’’, хомяк’’, попугай’’ таняна илець, тикахад тиртяко, ябтако ӈадимяць. Тарця манзаямда Нина Васильевна едэй школахана ӈод’’ нерня’ минредась. Си’’ив юдимдей похо’’на’’ ӈацекы’’ тохолкодандо’ ня маркана пя’’ ӈамдтамбиць. Нина Васильевна ӈацекыта’’ ня манзарась, тикы’ хавна экскурсии’’ хамадабсеты, походха’ ядэрцеты’’. Нум’ хурка ӈэвам’ дневникханато’ падабасетыдо’. Нина Васильевна минрена манзаямда саць мэнедась, сававна теневадась. Хусувэй теневанамда тохоламбада ӈацекэхэ’ минредась. Ӈацекы’’ тохолкодамдо’ хусувэй серкана нядабасетыдо’.
Нина Васильевна хусувэй ӈацекым’ хамадабсетыда, нядабасетыда. Тохоламбада ӈацекы’’ ӈод’’ тохолкодамдо’ нядабась етнасеты’’.
Ненэцие’’ школа-интернатан’ округна’’ ӈэсыхы’, маркы школахат тохолкода’’, тоходанана’’, садикхана мэна’’ ӈацекы’’ турцеты’’, пыдо’ е’’эмняндо’ Нина Васильевна экскурсии’’ сертабасеты.
2007 похона округна’’ школа’’ биология’ кабинет’’ конкурсхана Нина Васильевна нертей местам’ ханась. Тохолкодам’ округна’’ ӈэсыха’’на’’ теневадо’. Манзараванда мальӈгана Холгован’, Индиган’, Нельмин’ Носан’ сян’ тэворӈась, таняна ӈацекы’’ небя’’, нися’’ ня лаханакурманда е’’эмня.
Самляӈг ю’’ самляӈг по’’ манзараванда ямбан’ сяӈок ӈацекы’’ тохолавы, толава’’ серта яӈгу. Нина Васильевна пионервожатойӈэ, завучӈэ, директорӈэ манзарась. Нина Васильевна тохоламбавы ӈацекы’’ нямна, харта сита тохоламбавы хибяри’’ нямна ӈока сава вади’’ мэцеты. Ӈока ӈамгэм’ тенева, ӈока ӈамгэм’ тене. Пыда вадавнанда Няръяна мар’’, округна’’ историям’ тохоламбава’’ пир’’.
За заслуги в развитии образования и воспитании подрастающего поколения, ӈока по’’ ямбан сававна манзараванда е’’эмня 1995 похона Нина Васильевна Алсуфьева «Отличник народного просвещения» нагрудный знакм’ ня’’амась, тикы’ хавна хуркари’’ грамотыда, благодарностияда ӈока’’, Ненэцие’ школа-интернатхад, общество охраны природы, Управления образования, администрация НАО. Нина Васильевна школа’, Няръяна-Мар’’, Ненэцие’ автономной округна’’, Российской Федерацияна’’ ветеран.

Тохоламбада ӈацекы’’ вада’’

Нина Васильевна Алсуфьевам’ тохоламбавы ӈацекыда тенед’ тенедо’, тохолкодандо’ хардан’ тюӈгсеты’’, телефонувна лаханасеты’’, паднасеты’’. Хусувэдо’ ихина сомбой вади’’ хэтабасеты’’.
«Нина Васильевна – то’’олхам ӈэван’ харвадм’. Пыда саць сава тохолкода, и’ӈута классной руководитель’’ма’’, паской не. И’ вато, илан’ маймбада, нянана’’ сававна лаханасеты.»
«Сёнзянда мюй’ лата, сейда лимбика хибяри. Урокада ёльце мэкад’ ӈэсеты.»
«Тохолкодава сямбир’ сава хибяри, хэтбась вадин’ нид’ тэвӈгу. Нянд’ ӈарка вади’’ хэтабидм, пыдар мань тохолкодав’, сит пили’’ тенеӈгудм’.»
«Нина Васильевна саць и’вато хибяри, сидна’’ нядабасеты, вэвава ӈэбна месури нисеты тэдор, пыда сава тохолкода, урокада мэкад ӈэсеты, харвась урокхата сюрбасетыдм’, парумбасетыдм’.»
Пуданана хэтась тара: «Нина Васильевна, сававна сидна’’ тохолась, маня’’ савава’’ ӈэбна, тэмбариква’’ нибна’’ ӈа’’.»
Тюку ирий’ 6 яляхана Нина Васильевна Алсуфьева 80 помда ядабтась! Сензан’ ӈа’’, Нина Васильевна, хусувэй ӈамгэр сава ӈэя!