Вы здесь

Ты’’пэртя’’ тоходанаць

Маня’’ округханана ты’’пэртя’’ хибярина тыдо’ пэрць сян юр’’ мян по’’ ямбан вымна мюсерӈа’’. Тарем’ ӈокаювна иринадо’, хадунадо’ илець; нисянана илевамдо’ минредось. Теда ӈод’ хибярина ты’’пэрць хойхана иле’’.

Ты’’пэрма серт’ яӈга хибярина ханяхартахана нисьты’’ тоходан’. Хойхана соявы’’, вадювы’’ хасава нюдякодандо’ нисянато’ тэхэна’’ мэвам’ маниесь тоходанаць. Таремъюв’ пилибт’ ӈась. Пудана похо’’на илӈгана хуркари’’ едэй ӈамгэ’’ ӈадимберӈа’’. Хойхана мюсерта’’ хибярина ил’ ӈод несэюмдана. Ханяӈы’’ серт’ яӈга тоходанва’ тарасеты. Тарцям’ сер’ ты’’пэртина, мядм’ манзаям’ минрена нина’’, СПК ерв’’, семейно-родовой общины серм’ пэртя’’ таранаӈэ’ тасламбидо’. Ӈодьбянда, вэба ирий’ пудана яляхад хор’’ ирийна нябимдей толыр’’ ӈэсонд Няръяна маркана хой’ манзаи’’ пэртя’’ ненэциена ма’’лыць. Сян’’ яля’’ ямбан пыдо’ аграрно-экономический техникум’ мякана тоходанаць. Округхадана няхар’’ ю’’ мян хибяри’’ тоходанвась’ турӈаць. Ӈока манзаяхана тарана ӈамгэм’ намдаць. Тарця ма’’лёван’ ты’’пэрма серм’ сававна теневана хибяри’’ турӈаць. Дмитрий Оттович Хороля Ямалкана ты’’пэртя ненэцие мякана соявы, хойхана вадёвы, тикахад’ сян по’’ ямбан «Ярсалинский» совхоз’ председательӈэ’ манзаравы. Тыдо’ яханандо’ тянё вани’’ӈа’’. Тикахад’ пыда Россияна ты’’пэртя’’ ассоциация’ президентаӈэ’ тара, теда Ямалкад’ Россияна Государственный Дума депутатӈэ’ тэравы. Ӈэрм’ тенз’’ ненэцие’’ серу’’ РФ Госдумана тасламбида. Нянэювна ты’’пэрма сер’ ед’ таславы Закон’, ӈани’ ӈэрм’ яхад’ тэравы’’ нита’’ няюв’, нерняку тидхалемби.

Дмитрий Оттович Няръяна маркана мэванда мальӈгана ӈока хибярина’’ няюв ӈобт’ тэворӈась. Округна губернатор’ И.Г.Федоров няюв лахарёди’ танясь, тамальӈгана ты’’пэрма сер’ нямна хамандабда РФ Законопроект нямна лаханакурӈахась. Ты’’пэртя’’ ненэцие’’ няюв’ ӈод тарця Закон’ нямна вадидо’ мэ’’ӈаць.

Тюку’ мэвахана турмаханда Д.О.Хороля округна толаӈгова’ хардан’ (библиотекан’) тюӈгась, таняна ассоциацияна маркы отделение’ манзаям’ пэртя’’ нина’’ няюв лахарёдо’ ӈокаць.

Нина’’ ӈобкана ма’’лась ӈока тарана серу’ таслаць. Дмитрий Оттович Хороля ваде’’ӈадась – РФ депутатӈэ’ хурка серу’’ тасламби’’, ненэцие’’ вадам’ нерня минрева нямна вада’’ таняць. Дмитрий Хороля вадамда савовна теневана ненэць, ма’’лёва мальӈгана нисяданда намдвы хынабць’ мэ’’ӈась. Тарцям’ намдась, маня’’ нина’’ пысэйдась. Ӈокаюв’ таняна ма’’лёвы’’ нина’’ хари’’ вадамдо’ ехэрадо’. Вадана нерня илева е’’эмня ӈобнзер манзарабнана тара’’ нив’, тикахана серуна янамбовна ӈэбнанда ӈод’ нерня минда’’.