Вы здесь

Мядонда’’ ӈокаць

Маня’’ яханана Олимпиада’ нябимдеймэвна ваераӈгу. Ёнар’’ хасуюёнар’’ сидндет юдимдей пом’ хибярина тенедо’. Тикы похона Олимпиада – 80 таӈы’ ирийхана миӈась. Округна хибяри’’ Москва март’ тэворӈаць.

«Маймбава» ансамбльхана тарана’’, хыно’’та’’ ненэциена таняна манзараць. Яӈга ядэрта хибярина ӈод’ таняюв’ ӈэдалёрӈаць. Тамальӈгана хусувэй маркана Олимпиада ед’ ӈарка ялудо’ мэ’’ӈаць. Ленинград’ маркана ӈод’ яндат’ товы’’ мядонди’’ ядабтамбиць. Тикы’’ похо’’на Галина Григорьевна Тайбарей Герцен’ нювм’ нюбета институтхана тоходанась. Студентӈэ’ ӈэванда мальӈгана институтандо’ ансамбльхана таравысь. Пыда няна сидяӈг’ тэврась, ханяна ӈэрм’ яхад’ товы’’, хуркари’’ тенз’ мэта’’ ӈацекы’’ мядонди’’ ядабтамбиць. Няхар ю’’ няхар’’ по’’ тяхана ваеравы Олимпиада Галина Григорьевна ихиня тенад’ иле, тикы сер’ нямна тарця вади’’ хэтась – Теда Россияна’ тавна эстафета олимпийской ту’ миӈа. Мань’ ӈани ёнар’’ хасуюёнар’’ сидндет юдимдэй похона тарця эстафетам’ Ленинград’ маркана Невской проспектхана манэ’’ӈадамзь. Тюку похона тикым ябӈэ’ толабив. Тамальӈгана спортивной ма’’лёйхана’’, концерт’’хана’’ студент’’ тарава’’ ансамбльхана «Северной сиянием’» нюбетахана мань’ тарадамзь. Африкахад’, Америкахад, Азияхад’, ӈэрм яхад, яндахат’ тобэй’’ мядонда’’ маня’’ яхана тоць. Хуркари’’ спортивной серкана ныхы’’мамдо’ манэ’’лабтаць. Маня’’ ява ханярид’ тобэй мядонди’’ сававна ядабтамбись.