Хаювы ирийна сидя ю’’ хасуюдимдей яляхана комсомол’ хасуюр’’ самляӈг пом’ ядабтаваць. Тикы яляхана комсомолкана мэвы’’, манзаравы’’ хибярина ӈарка ялям’ мэ’’ӈаць. Хор’’ ирий сидя ю’’ маттамдэй толыркана Няръяна маркана комсомольский конференция’ ваерась.
Людмила Васильевна Лаптандер теда маркы администрацияна манзара. Невхэна ӈобтарем’ комсомолкана мэсь, окружком комсомола мякана манзарась. Тамальӈгы по’’ пыда ихинянда сававна иле. Тикы нямна тарця вади’’ хэтась. – Комсомол’ е’’эмня мань’ сямянд’ сава вади’’ хэтгудм’. Мань’ тамна школахана комсомолкаӈэ’ хаядамзь. Ёнар’’ хасуюёнар’’ си’’ив ю’’ няхарамдэй похона комсомолан’ тюмась, Александр Иванович Саблин комсомольской билет’ ӈудахан’ тадась. Тамальӈгана Няръяна маркана школа-интернатхана тоходанамась. Тикахад’ школана комсомольской организация’ секретарьӈэ’ сими’ тэраць. Тенев’, пилибт’ окружком’ комсомола мят’ тюӈгсетыдм’. Хар’’на школанана манзаравана’’ ед вади’’ хэтбасьтыва’’. Маня’’ школаханана комсомольской собрания’ мэпнана окружком’ комсомола ерв’’ турцеты’’, комсомол е’’эмня вади’’ хэтбасьты’’. Маня’’ ӈод окружной конференцияхана манзарасьтыва’’. Сяӈгова сидна’’ школахадана самляӈгӈэ’ делегатӈэ’ тэраць. Мань, Валя Беляева, тамна Хорей Верхад’ сян хибяри’’. Ма’’лёвава невхы культура’ хардахана манзарась.
Тикахад’ институтхана тоходанамась, институт’ ёльце’’махадан’ сим’ Хорей Веран’ ӈэдараць манзаравась. Товароведӈэ’ манзарамась, комсомольской организацияхана ӈод’ мэдамзь. Тамальӈгы похо’’на’’ ӈацембой хибяри’’ ӈокаць. Ӈэсыхына хуркари’’ серу’’ сертабасьтыва’’. Культура’ хардахана хусувэй ӈарка ялян’ концертм’ хамадабсетыва’’, хуркари’’ беседа’’ ваерасьты’’. Ныланава’’ яля’’на походха ядэрцетыва’’, хуркари’’ субботник’’, воскресник’’ сертабасьтыва’’. Тикы по’’ инян’ со’’ иле’’, саць’ савась.
Тикы’ пуд Хорей Верхад’ сими’ окружком комсомола мят’ манзаравась’ ха’’ӈаць. Мань’ тюку яля’ саць ӈарка вади’’ хэтван’ харвадм’ Иван Егорович Ледкован’, Вячеслав Иванович Филатован’. Пыди’ сим’ Няръяна март’ манзаравась’ тэвраӈаханзь’. Нянди’ ӈарка вада. Тенад’ тюку маркана иледм’, манзарадм’. Тикы хибяри’’ няюв’ поюна’’ сава, тороватасьтыва’’, нина’’ манэць маймбасьтыва’’. Няхар’’ по’’ ямбан комсомолкана манзарадамзь, таняна манзараван’ мальӈгана Высшей комсомольской школахана тоходанамась, сими’ окружком комсомола таняюв’ тоходанвась ӈэдарась. Ӈобтарем’ саць сава поць. Москвахана илемась, маня’’ группаханана тоходанна’’ хибяри’’ хусувэй СССР малхад’ тобэяць. Маня’’ таняна тоходанвы’’ нин’’ няюв поюна ня’’амбина’’. Сидя по’ тяхана тад’ телефонувна нян’ хабенеко лахана, вабцамда нив’ тумд’. Пыда нян’ ма: – Мань’ Наташам’ сими’ тенен’? Ӈобкана Москвахана тоходананись. Мань’ тикахана няв’ ихин’ ха’’мы. Нянда мадм’: – Ханям’ тене, валакада сит’ ё’’ӈам’. Сидя ю’’ самляӈг по’’ ваерась, пыда мань’ сим’ интернетувна хо. Харта теда Австралияхана иле. Тамбир’ ӈахы’’ яхад’ сим’ Няръяна маркана хо. Пысам’. Теда электронной почтавна няхани’ паднани’. Комсомол’ сидна’’ ӈобт’ сяӈгова тэврась.
Окружком комсомола хардахана манзараван’ мальӈгана ӈани’ ёльце’ савась, ӈока сава сер’’ таняць. Мань’ отдел пропаганды, школьной отделкана манзарадамзь. Сертабада серуна ӈокаць. Школахана тоходанна’’ ӈацекы’’ ня манзараваць, студент’’ няюв’ манзарасьтыва’’. Ихиня тарця манзая’ ёльце савархась. Манзая’’ ӈокась, мэкадась манзарась.
Комсомол – илева’’ е’’эмня саць сава школась. Хибяри’’ комсомол’ тя тоходанаць ханзер’ хибяри’’ няюв манзарась’ тара, ханзер’ серу’’ нерня сертабась’ тара, ханзер’’ хибяри поюдо’ сава ӈэбто’. Нерня сырцетыва’’ – ӈамгэм’, ханзер’ сертась’ тара. Комсомол’ тя ваеравы’’ хибяри’’ тикахад’ ӈарктаӈэ’ тарасеты’’ хуркахова организацияхана, ервӈэ’ манзарасьты’’. Алёша Ледков Индигахана тыбэрти’’ бригадирӈэ’ тарась, тикахад’ Игорь Ледков Няръяна ӈэсыхына тенад’ манзара, Сергей Зотов Няръяна маркана СМУна манзара, ӈобтарем’ комсомол’ школам” ваерась, неда Люба Зотова ӈобтарем’ комсомольской организация’ секретарьӈэ’ тарась, Валя Зверева окружком’ комсомолкана манзарась, теда городской Советхана бухгалтерӈэ’ тара, Татьяна Журавлева архивна ӈарктаӈэ’ теда манзара, Вячеслав Иванович Филатов, Иван Егорович Ледков теневана’’ хибяри’’. Тарця хибяри’’ ӈокаць, мал’’ нид’ нюмдеӈгу. Комсомол саць сава школась, ся’’ялы теда тарця школава яӈгу. Тарця школава яӈгова’ нид’ харвабнанда ӈэдакы, теда хибярина тарця ни’’ӈа’’. Хусувэй харта е’’эмнянда ибедортарха, хэвхананда мэна маендорта нямда нинархада мание’’. Хибяри сейдо’ пэӈэ’ хэнарха то’’олха’’.
