Вы здесь

Нюдяко ӈацекы’’ тоходана’’

Тюку поход округханана’’ нюдяко ӈацекы’’ сян’ садикхана ненэця’’ вадам’ тохоламби’’.

Няхар’’ ӈэсыхына ханяна нянэй ненэця’’ иле’’, тикы Каратайка, Нельмин’ Саля, Бугрино. 2019 похона ӈацекыдо’ ненэця’’ вадан’ тохоламбидо, луца’’ вадавна манзь: тарця пилотной площадкам’ нэ’’.
Ӈацекыдо’ таняна мято’ терсавэй тохоламбидо’. Ӈацекы’’ садикхана воспитательто’ ня лахана’’, хардаханандо’ небянадо’, нисянадо’ нядаӈгода’’.
Тарця юнм’ ненэцие’’ вада экспертной советхана хор’’ ирий’ сидя ю’’ нябимдей торлыркана Ненэцие’’ региональной центр развития образования методист’ Людмила Талеева хэтась.
Тарця пилотной площадка’’ ӈадимдева нямна падар’’ 2018 по’ вэба ирий’ сидяюдимдей яляхана округна’’ Департамент образования, культуры и спорта хамадась. 2018 по’ пудана’’ яля’’ ӈэсонд, 2019 по’ еркы яля’’ ёльцянд тикы сер’’ е’’эмня дорожной картам’, манзаравандо’ е’’эмня детской садхана мэта программы’’ воспитатель’’ падабиць, тикахад парциальной программам’ сертаць. 2019 по’ вэба’’ ирийхад тоходанавам’ няхар’’ садикхана минредо’. Тарця площадка’’ манзаям’ садик’ ервота маниедо’. Несэй серкана координаторӈэ Ненэцие’’ региональной центр’ развития образования тара.
Людмила Талеева вадавна: – Тарця проектхана хурка садик’’ манзараван’ харваць, тарця манзара’’. Ныхыри’’ хибяхарт ниваць табадабю. 2019-2020 тохолкова похона округна’’ няхар’’ дошкольной учрежденияхана ненэця’’ вадам’ минредо’, 119 ӈацекэхэт’ валакада 69 ӈацекы’’ вадам’ тохоламбидо’. Тарця проект’’мана, Людмила Яковлевна вадавна, тамна Красной ӈэсыхы детской сад манзараван’ харва’’.
Пилотной площадка’’ манзарава’’ 2011 по’ ӈэсонд таславы. Ханзер’’ манзая’’ нерня’ ханта, ханзер’’ ӈацекы’’ лаханась тоходанаӈгу’’, тикахад проект’ нерня’ танева таславы ӈэӈгу.