Вы здесь

Тоида’’, мэкад’ ӈэӈгу

Сямянд’ мэбета, сямянд’ паской, паӈгуда’ теневана пирибцяком’ тэрабаӈгува’’. Няръяна маркана тамна ӈопой «Печорянкам’» нюбета фольклорный конкурс’ ваераӈгу. Тарця серт’ хамякова’’ маля миӈа’’.

Культурахана манзарана’’ нина’’ манзаям’ сибицяӈэ’ нир’ нюмдеӈгу. Пыдо’ яханана хуркари’’ ихиня сомбой луца’’ вадавна манзь – мероприятия’’ хамадабсеты’’. Хуркари’’ конкурс’’, выставка’’, фестиваль’’ яханана ваерасьты’’. Тарця манзаи’’ культурахана манзарана’’ нина’’ хамадабсеты’’. Округна этнокультурный центрхана манзарана’’ нина’’ теда Межрегиональный фольклорный конкурс’ хамандаби’’, хуний Няръяна маркана ӈарка пэвдэй ирийхана ваераӈгу. Тарця конкурсан’ яханана хусувэй сидя по’ ваерась ненэциена’’ ма’’ласьтыд’. «Печорянка» – таремъюв’ нюмдевы конкурс’. Я’’авлада пирибцяко’ тарця конкурсан’ округханана нюртеймэвна сидя ёнар’’ няхарамдэй похона ма’’лэйдаць. Тюку по’ маттамдэймэвна «Печорянкам’» этнокультурный центрхана хамандабидо’. Хамяковадо’ миӈа. Тасалку’’: сяӈок пирибця тюку’ по’ ваеравнда конкурсан’ тарпгуд’, хурка я’ тер’’ танеӈгу’’, ханяхад’ мядонда’’ тута’’. Тарця конкурсва тюку по’ ӈарка пэвдэй ирийна си’’ивумдей толыркана «Арктикам’» нюбета КДЦ мякана ваеравнда. Конкурсхана пирдырманда хуркари’’ тенз’’ мэта пирибця’’ ма’’лаӈгуд’: некоця’ танеӈгу, ӈысма, хабене, устьцилём’, саам’, хадян’ некоця’’ танеӈгу’’. Пыдо’ округна еркы март’ Ома, Несь, Виска, Тельвиска, Хорей Вер ӈэсыхыт’’ тута’’, тикахад’ мядондина’’ Удмуртской республикахад’ Ижевск маркад’, Архангельскхад’ танеӈгу’’, Мурманской областьхад’ Пушной нюбета ӈэсыхыд’ тута’’. Поӈгнандо’ пирдырта’’ некоця’’ визитной карточкамдо’ манэ’’лабтаӈгу’’, харто’ паӈгудо’ ваде’’та’’, паныто’ нямна лахарёдо’ ханаӈгу’’, со’’яма яндо’ нямна сомбой вади’’ хэтгу’’, тикахад’ харто’ вадавнандо’ сём’ мэта’’.

Конкурсан’ тарпувнда не’’ ӈацекы’’ маркана танеда’’ творческой коллектив’’ нядабаӈгудо’. Хибям’ тюку’ мэвахана «Печорянкаӈэ’» нюмдеӈгува’’? Тикым’ нерняна’ товнда ирийна си’’ивумдей толыркана намдгува’’.

Теда пирибцяко’’ ив’ ер конкурсан’ хамяку’’, хусувэдо’ ихинянда нердеван’ нив’ харва’’.

Пудана’ мэвна тарця конкурсва ёнар’’ хасуюёнар’’ ӈоб’яӈганя похона танясь, тамальӈгана «Печорянкаӈэ’» нянэй некоця’ Наталья Тайбарей хаясь. Тамальӈгана маркана аграрно-экономический техникумхана тоходанась. Наталья вы’ тер’ пирибцякось, «Ямб то’» няна мюсерта’’ ненэцие’’ мякана соявы, нянэй мякана вадюданвы, хой’ илм’ теневана некоця.

Тюку по’ ӈод нянэй некоця конкурсхана ныхыдо’ хорпаӈгу’’. Кристина Латышева Ома ӈэсыхыд, теда тикы не ӈацекы социально-гуманитарной колледжхана тоходана, едэй манзаям’ торомдаби – дизайнер эӈгу. Маша Бобрикова Несьхад’ товы пирибця, пыда ӈод СГК тоходанна. Тамна ӈопой некоця Римма Нюрова, пыда Несьхад’ товы. Тюку яля’’ мальӈгана Няръяна маркана мэ, тоходана, сессиямда мэ’’ӈа. Маня’’ не’’ ӈацекына малӈэ’ хойхана соявы’’, вадамдо’ теневана’’, паӈгудо’ лэтбада’’.

Конкурс’ мальӈгана концерт’ танеӈгу, ханяна ӈока’ сомбой сё’’ намдгува’’. Мядонда’’ танеӈгу’’ – «Инвожо» фольклорный коллектив’, тикахад’ Надежда Уткина Удмуртияхад’; «Вуая» саамский ансамбль’ Мурманский областьхад’, «Каприз» нюбета коллектив’ Архангельскхад’.

Маркана мэбнанда’’ ӈарка пэвдэй ирийхана конкурсан’ тоида’’, мэкад’ ӈэӈгу’’.