Мани’ Сандран ня’ нара сыритана хамзь сяд’ ня’ еӈгахалъяни’. Нись ӈаха’’на тикы сят нид ханакохона едейкунинзь, тедахава’ яханд тасий сэрта вар мале и’’ӈэ хаторӈа, ханяна-таняна хо’’ленанадарев’ манебэд пармоды’’.
Яха’ ся’ вар’ ни’ тэвхава тасина мани’ тэси’’ нуна мальсей ханм’ сэвтени’. Пуна хибярим’ ӈод’’ манэ’’ӈани’. Паркасяда ӈудаха’’на хадесумба тикар нара сыравна сяд’ ни’ тантана тарнэрӈа.
– Тикыва’’ ӈани’ хибя? – вадин нямюхудан харто’ нянзаданараха’’.
– Хибяри! – Сандрар хасабтэй’’, пыда мят’ небяхани’- хадахани’ маманзь сюрбы’’.
Тубкадув, сивадув хосая мань ӈо’’ сюрбӈгуваць ӈа, тасиняд ицюмба тона тёр си’’ми таб’’ла. Хибяринд неры хадеторо’’ма нара сыранд сяркана гярмыдана ентяври манэ’’ӈадм’, харта хибярир ӈани’ тасий ид’ вары манебэнд иркана нёядарев’ халцана.
Тасиянда ӈэсонд’ небян танцие юд’’махавахад таӈга тана’’махавахаданда ехэрана хибярир сатаркавна пэӈганась. Тиканд сята синдолта, хальнёрта, мальцянда таӈга нэлсуй, ӈудита таркахат вэя латорӈа, харта няданда ӈани’ варьяда, тибей енздей’’ ӈабтраха лехэдарӈа. Сэвхатата хаял’’ тэса’’. Ӈудахата сылаӈга пыда манзь ӈэсаӈгаби:
– О, хосподи! Ӈудаехэртан хададм’… Ӈудаехэртан!..
Мякна мань тикы хибяринд Пронти ӈэвамда намдадм’.Ханяхавахана пыда ӈэсыда, харта мята танява. Пинда ямбан’ яханд салабавна ӈэдалёсь немар нив’ ту’’ – тюр нялкара, мэтаиняр ӈудахат нялпы’’, ханярта ханар манебэн’ маркада, мэтид содо’ нюдерць мие’’ма минхандо’ хая’’. Мале хэбэй’’ тэхэва’’ ӈамгэ ня’’амнана’’ам’, Пронтир мальсей хананда хэвхана нив’ хаю’’.
– Сят ни’ хадеторць пяхава – хар’’ями Мали. Сересьхад сертавы ӈэсава. Ханя ят’ малю’’. Нара сырар! Тикамд тубкари валакада сапхалтада, тубка’’яв ӈани’ паромба ӈэдаланван мальӈгана мякна юрвэв, – Пронтир лаханолы’’. – Инзеледм’ –вэн’’ мадармондо’. Вэн’’ мадаркаваб’’ – хибярид ни’’им’ таня’’. «Микул, хадри’, тикахана мэ, -ихинан мадм’. –Пыдрида тикахана мэсь пир’’ӈа». Ти, тантадм’, няби сибицярка явна танта хормар ихиртахан вуни тур’’. – Пронтир индата ӈахат нэкалӈа, харта пыдамда сыды’’мана тырахалӈа. – Маня’’, ненэцяӈэ мад сёнзянана’’ тарця’’ ни’’им’ ӈа’’ – сыхыласьдаи’’… Тиканд тяхамна тамна немэйха’’на синёва. Ти, ӈадьбянда ӈоб’ танта налбанадм’. – Пыда хадахана’’ сылы’’. – Тана я’’амвахан ӈамгэ пунраӈгув’’?!
–Тикар нив ӈа’’: ханзер’’ мале пунравнин! – хадана’’ сюртяв ся’’ ванерабтыва. Мань нянан сята ӈод’’ ирийдарев’ хаярёдарахась.
Тум’ пята’’манда пуд небява’’ чайникм’ ӈыда. Мале ханзебэй Пронтир ханханда ядэро’’махаданда лат’’ ни’ мян’’мана латакохо’’на яӈгревы лабтэйм’ ӈамта. Лабтэянд мюй сёдо’ ямб хыди’ мюня ӈамгэхэва итрев’ ензарюй’’я хатэрӈава.
– Лэйнана иква таня, -тенд иркы лат’’ ний лабтэямда манзабтамба, Пронтир ма.
Небяв нянда вэнзовна васадэй’’, хэтуванда вадахабида няламъяда. Индта ӈахэт нэкалць хадава’’ ма: – Фо-о! Тикы ӈабтхавамд мань пон’ нивась намдор’’,- Пыда сидя ӈудахананда ӈэвамда ня’’ма. – Тикар саць ӈаха’’на, мань тамна ӈацекы ӈэван мальӈгана Городоквана, Усть- Цильмавна луцит Ӈарка яха’ тиркы Хальмагардан’ мюсеро’’мана’’ мальӈгы нисяв’ ӈа’’. Тедахава’ тарця мюсермар вуни таня’’. Тикыд серод саць сеняний’’. Тедахава’ мал’ несэйӈэ хая. Харта яхартар тыеромдараха. –Пыда мядм’ саӈо’ мал’’ӈа. – Маньзьвана’’ нянана’’ теда’ хибянд ӈэваха’’на мэва мал’ ӈопой: валакада хувында няна хаер’’ тарпорӈая, тына сенз’’ ӈэя’’, сармикар, халяр, тиртяр выӈгнана’’ ния’’ сусаӈга’’. –Пыда тюнедэй’’. – Луцанд ӈаванахава тенеб’’нани савась!..
