Вы здесь

Ты’’хабарпава’’ ёльць

Носиндалава ирийхана тэхэ’’на’’ мэна’’ ненэциена ӈадя’ тэтнасьты’’. Тамальӈгана маля ханярина забой’ манзаяхато’ хамадёсьты’’. Хусувэй тыдо’ пэртя’’ ненэця’’ забоян’ тэвравнда’’ тыдо’ яӈгревы’’ ӈэсьты’’.

Ты’’ хабарпава’’ манзаяха’ лапцева е’’эмня сава нум’ тарасеты. Тецьда яля’’ тось минханда’’ манзаяхато’ лапцесетыд’. Тюку по’ забой’ сававна мима’’ е’’эмня нумда ӈани’ ни’’ серос’’, тецьда яля’’ яхана тэвась’ я’’амыд.

Тарем’ ӈэбнанда ӈод’ ханяховахана забой’ янамбовна сертаби’’. Тарем’ тюку ирийна сидяюдимдей толырт’ вадець, забой’ манзаидо’ «Ервхана» миӈа’’, валакада СПК «Путь Ильича» ты’’пэртя’’ тыдо’ хабарпавась’ пяӈгудо’, тикахад’ Холговхана ты’’пэртя’’ забой’ манзаидо’ пяӈгудо’.

Округханана сямянд’ нерде тюку по’ забойдо’ СПК «Красный Октябрь» ты’’пэртя пэйдось, тикахад’ «Харпхана» тыдо’ хабарпава’’ манзаидо’ янамбовна маля миӈа’’. Сидя си’’ив яля’’ тяхана «Харп» СПК сидя ӈэсы’ тер ненэця’’ тыдо’ тэвраць, нябимдей тикахад’ самлязимдей ӈэсыхына ты’’ пэртя’’ тыдо’ забоян’ тэврэйдось. Нябимдей ӈэсыхына тюку по’ юр’’ няхар’’ ю’’ самляӈг тым’ хабармась’ ятна’’, самлязимдей ӈэсы’ тер’’ ёнар’’ мян тым’ ӈамзаӈэ’ мита’’.

Красной’ ӈэсыхы’ убойный пунктхана манзарана’’ ты’’хабарпава серт’ ив’ ер’ сырӈа’’, манзаидо’ ёльцянда сертамбидо’. Валакада сидндетимдей ӈэсыхана манзарана’’ ненэця’’ тыдо’ забоян’ тэвраӈгудо’. Ӈокханда СПК «Харп» си’’ив ӈэсыхына тыдо’ пэрӈа’’, тюку по’ сидя ёнар’’ сидндет юр’’ тым’ забоян’ тэвравась’ хамадаць. Валакада ты’’пэртя вадамна’’, та’ ёльцяӈгана ябембада’’ яля’’ ӈокаць, ты’’ падець. Тарця сер’ ӈэва’ нид, ты’’ хэвндо’ сацьри’ сава ни’’ӈа’’.

Округханана ты’’пэртина янамбовна нито’ пумна забоян’ тыдо’ тэврамби’’. Маля носиндалава ирийна’ пудана яля’’ха тэво’’тынанё, ты’’ хабарпава ёльць’ нив’ ӈа’’. Валакада харвабнанда марад’ лавкахана несэй ты’’ ӈамзам’ мирдапась’ пяӈгу’’.