Саляхана илена’’ хибярина ӈокаювдо’ нянэй ненэця’. Мал’’ пыдо’ паӈгудо’ ты’’ илӈгад’ пере’’. Харто’ вадамдо’ мэ’’ӈа’’, невхы илм’ теневана’’, нянэй илевам’ мэта’’. Теда ӈэсынандо’ илена’’ хибяри’’ малӈэ’ хойхана соявы’’, илевы’’, манзаравы’’.
Тарем’ ӈод Нина Егоровна Тайбарей. Маля ӈармбэй некоця, ӈарка илм’ мэ’’мы’’. Тюку яля’ Нина Егоровна си’’ив ю’’ пода паны. Нянда сямянд’ сава вада’’. Нюдя яхана мюсерта ненэця’ мякана ёнар’’ хасуюёнар’’ тет’’ ю’’ самлязимдей поэ ӈарка пэвдэй ирий юдимдей яляхана соявысь. Нисяда Егор Иванович тыбэртя ӈэвысь, небяда Татьяна Ивановна мяд’ манзаям’ пэртясь. Нинакоди’ нюдякоданда хойхана илесь, тикахад’ маркана школахана тоходанась. Школамда ёльце’’махад тамна нерня Няръяна маркы’ педучилищехэна тоходанвамда мэ’’ӈадась, тохолкодаӈэ’ тоходанась. Педучилищем’ ёльце’’махаданда няръяна мякана манзарась’ пявэдась. Нюдя яхана мюсерта ненэця’ тохолкодаӈэ’ тарась, библиотекарьнэ’ манзарась. Няръяна мякана манзараванда мальӈгана сомбой пирибтяком’ ӈацембой тыбэртяӈэ’ маля манзаравы хасава сэвтевэдась. Нина Егоровна тикы’ хасаван’ хаюпась хэвысь. Самляӈг’’ нюмди’ соябтаӈаханзь’, хой’ илан’ тохолаӈаханзь. Нина Егоровна вэсакода’ Мартын Прокопьевич Тайбарей илеванда ямбан хойхана манзарась, тыбэртясь. «Выучейской» нювм’ нюбета колхозхана маля пон’ манзарабэй. Нина Егоровна ӈод’ илеванда ямбан хойхана манзарась. Нерде’ тохолкодась, тикахад’ мяд’ манзаям’ пэртяӈэ’ тарась. Хардан’ ха’’амванди’ ӈэсонд’ хойхана илебэйха’.
Няхар’’ хасава’’ нюмди’’, сидя не’ нюмди’ сава хибяриӈэ’ вадавэхэ’. Мал’’ нюди’’ маля ӈарка хибяри’’, харто’ манзара’’. Нина Егоровна не ню’ Марина Мартыновна маркана иле, небянда нямна тарця вади’’ хэтась: - Небяв' теда ни’’манзара, хардаханда мэ. Си’’ив пода маля паны, сянад’ манзараӈгуда, ныланая’’. Тарабнанда сидна’’ хусувэй серкана нядаби. Мань’ тенебнан’ небяв’ пилибт’ масьтёсьты, ӈопой яхана хасена сяӈгарт нисьты’’ӈа’’. Сэдорасьты, саць’ толаӈго мэнеда. ӈодьбянда хэвхананда мэбнандо’ мал’’ ӈацекы толаӈгосьты’’. Тохолкодадак, сидна’’ толаӈговась табадабсеты, ӈодьбята теда ӈод маня’’ толанзёва серм’ мэнева’’. Маня’’ ӈацекехэна масьты: - тоходанада’’, толаӈгуда’’ ӈокамбова. Нюдякова’’ ӈэбнана’’ хуркарива’’ ӈэсьтыва’’. Вэвава’’ ӈэбнана’’ небява сидна’’ тэдорпасьты, савава’’ ӈэбнана’’ сава вади’’ хэтбасьты, сяньзьты сидна’’.
Небяко’, тарця ӈарка яляхана нянд’ тарем лаханадм’: тад’ нерня едяси’’ иле’’, ябда’’, маня’’ сит’ саць мэнева’’, не нют’ не нюху’ сит’ мэне’’. Сит’ мядоманзь пилибт’ ӈатева’’, тур’’.
Тюку яля’ Саля’ тер не, тохолкода, хой’ илм’ мэ’’мы, самляӈг нюм’ вадавы Нина Егоровна Тайбарей си’’ив ю’’ пода паны. Нянд’ Нина Егоровна ӈарка, сейхад’ минда’’ вада’’: со’’яма ялямд’ сава ихиня ядабтад’, пон’ ябда иле, нён’ хаӈгур’’. Нюд’, нют” ню’’ мяканд’ мядоманзь’ турӈая.
