Вы здесь

«Ханебцё» хынс’’ намдаць

Нина’’ сейхад’ сянаку’’

Округханана нянэй ненэцие’’ поӈгана хынокад’ нина’’ ханярина таня’’, тарця нина’’ маркана ӈод’ иле’’. Пыдо’ манзаидо’ маня’’ хэбидя’’ яля’’ мальӈгана намдурцетына’’, сейхана сава ӈэсь инзелесьтына’’.

«Ханебцё» фольклорный группава Няръяна маркана сидя по’’ ямбан манзаямда минреда. Таняна ма’’лёда не’’ ӈокаювдо’ Нюдя я’ тер’’. Пыдо’ округна Нюдя яхана соявы’’, вадюданвы’’, тикахад’ харто’ яханандо’ манзаравы’’. Ӈокаювдо’ маля ӈармбэй не’’. Илевандо’ ямбан сертавэдо’ тянё ни’’ӈа’’, мана’’мэдо’ тянё ни’’ӈа’’. Мал’’ пыдо’ нянэй не’’. Харто’ паӈгудо’ теневана’’, харто’ вадамдо’ мэта’’, харто’ тенз’ культурамдо’ теда нерня пэртя’’. Тикы не’’ илевандо’ ямбан ӈока’’ ярабц’’, сюдбабц’’, хынс’’ намдвакы’’. Теда тикы намдвыдо’ хибярихи’ тэврамбидо’, ваде’’ядо’. «Ханебцёна» масьтевы’’ манзаи’’ ӈэсыхына илена’’ хибяри’’ маймбась ядтабсетыдо’. Таняна хынота’’ нина’’ маркы’ школаха’ тэворцеты’’, ӈани’ танеда учрежденияхана мэсьты’’, март’ турта’’ мядондина’’ ядтабсеты’’. Сертабададо’ тянё ни’’ӈа’’, пыдо’ харвась манзара’’. Тюку ирийна нюртей’’ яля’’ пирка’’на «Ханебцёва» хармбэй хибярина мят’ тэворӈась. Таняна илена’’ хибярина е’’эмня харто’ программамдо’ манэ’’лабтаць. Нина’’ пьесаком’ манэ’’лабтаць, хыно’’ӈаць. Сяс’ ватамбой ӈармбэй хибяри’’ ненэця’ вадан’ инзелець, хусувэй намдвэмдо’ тэ’’элтамбидось. Хари’’ вадамдо’ намдурць, нянэй не’’ маниесь ӈармбэй хибярина’’ маймбиць. Хибя’’ тенева’’, тамальӈгана хусувэдо’ харта мяк’’нанда мэна’’ то’’олха’ ӈэвакы; харта нида’’ ихинянда хавравакы?

«Ханебцёва» ӈод’ савась, ӈармбэй ненэциена сею’ ядимдавась ӈани’ ӈэдалёрӈаць, ив’ ер сянакуць.