Мэта’’ ирийна нюртей яля’’ пирка’’на Норвегия’ яхана Тромсё маркана Баренц регионхана илена’’ толырто’ тянё ненэця’’ ӈарка ма’’лёвамдо’ мэ’’манзь ма’’люрӈаць. Няхарамдэй’ тарця ма’’лёй, луца вадавна тарем’ нюмдевы: 3 Конгресс коренных народов Баренцева Евро/Арктического региона.

Тикы’ хавна конференциям’ мэ’’ӈаць: «Коренные народы Баренцева региона +50.». Конференциям’ нэбвахана яндахат’ товы’’ хибярихи’ вадидо’ Норвегия’ Саамский парламент президент Айли Кескитало, Тромсё мар’ Арктический ‘ университет вице-президент Венхэ Якобсэн хэтаць.

Тарця ма’’лёвахана толырто’ тянё ненэця’’ вада’ нямна яндахат’ товы’’ хибяри’’ ӈокавна лаханаць. Ханзер’’ Россияна илена’’ толырто’ тянё ненэця’’ вадамдо’ лэтбидо’, тарця серкана серудо’ хурка? Тикы нямна хибяри’’ хари’’ вадидо’ мэ’’ӈаць. Карелияхад’ товы’’ вепс’’ тамна сидя ю’’ самляӈг по’’ тяхана вадандо’ нямна миндя’’ серудо’ саць вэва’’ ӈэвыць. Тюку ялян’ хэтась, вепс’’ вадамдо’ илелътембидо’. Вадам’ тю’’у’’ минрева серкана ӈарка манзаям’ Общество вепсской культуры сертамби. Сидя ю’’ самляӈг по’’ ваерась вепс’’ вадавна лахананидо’ ӈокама’’, ӈацекыдо’ лахана’’. Вадамдо’ школахана тохолабидо’, институтхана тоходанна’’ вадамдо’ тохолаби’’. Карелия’ телевидениехэна, радиовна вепс’’ вадавна лахананидо’, передачи’’ сертабадидо’ таня’’. Хари’’ тенздо’ нямна фильм’’ сертаби’’. Маля 1993 поход харто’ вадавнандо’ газетадо’ тарпурӈа, 2011 поход журналдо’ таня, ӈацекыто’ е’’эмня падбада журнал’ сертаби’’. Вепс’’ вадавна хуркари’’ литературам’ падби’’. .Харто’ яханандо’ невхэна таневы хари тенз’ хэбидя ялудо ӈод’’ илебте’’, яханандо фольклорный праздник’’ сертаби’’. Харто’ культурамдо’ нерня пэрӈа’’, историямдо’ падби. Яханандо’ «Вепской культура пом’» мэцьты’’. Теда общество вепсской культуры организациядо’ хуркари’’ российской, международной общественной организация’’ няюв манзара..

Маня’’, нянэй ненэцяӈэ, округханана харна’’ вадавнана лаханана’’ хибярина хусувэй по’ тянёркаӈэ’ хантана’’. Вадава нерня танева, илева е’’эмня ӈобнзер’ манзарась таранарха’.Тикы е’’эмня план-действий’ падась. Сян’’ по’’ ваерась, маня’’ ӈод вадава ханярина собнанда, хари’’ вадавнана лаханабнана’’.

Норвегияхана илена’’ саам’’ сидя ю’’ по’’ тяхана ӈобтарем тарця серт’ еримыць, ся’’ня вададо’ суса’’ хацевысь. Тарця серм’ маниесь, таняна илена’’ хибяри’’ вадандо’ таневам’ ив’ер манзаяӈэ’ тасладонзь. Тюку ялян’ тэвась северный саамский вада мэёвна со’’. Таняна илена’’ саам’’ хари’’ вадавнандо’ лахана’’, тоходана’’, Тромсё маркана танеда Арктический университетхана тоходаннидо’ саам’’ вадавна тохолабидо’. Хуркари’’ манзаям’ пэртидо’ харто’ вадавнандо’ лахана’’.

Сидя яля’’ ямбан Норвегияхад, Швецияхад, Финляндияхад, Россияхад товы’’ хибяри’’ – саам’’, вепс’’, нянэй ненэця’’ ӈока тарана серу’’ тасламбиць. Нито’ хэтвы’’ вадаха’ инзелець.

Маня’’ округхадана сидя ю’’ хибяри’’ конгрессхана манзараванзь ядэрӈаць, поӈгнандо’ «Ясавэй» ассоциацияна Совет’ манзаям’ пэртина, Совет старейшин манзаям’ пэртя’’, округна депутат’, тохолкода, газетана, телевидениена манзаранина, община манзаям’ пэртина. Хусувэй по’ Норвегияхана илена’’ саам’’ февраль ирий’ нюртей яля’’хана саам’’ неделямдо’ мэ’’ӈа’’. Тарця яляхана таневы сер’’ поӈгана Баренцев регионхад’ товы’’ тыбэртя’’ поӈгнандо’ пирдырӈа’’. Маня’’ округхадана таняюв’ ӈэдалавы’’ нина’’ ӈани’’ таня, тикы Семен Пырерко нябю Мария Погодаева. Пыди’ ӈод ныхыди’ тамбир’’ пирдырмахана хорпиди’. Сян яля’’ ваерась няхаюна’ Няръяна март’ тутӈаха’. Ханзер’’ ӈэдалёр’’мамди няданди’ хонраӈгува’’.

Няхар’’ яля’’ ямбан ӈани’ ӈэрм’ яхана таславы’’ сер’’ тянё ниць’ ӈа’’, тикы нямна падвын’ тамна танеӈгу’’.