Мэта ирийна сиднтетимдей яӈганя’ толыркана этно-культурный центр’ мякана маркана илена’’ ненэця’’ ма’’люрӈаць. Тикы яляхана хибяри’’ сава теневана няхандо’ ихид’ ӈэда’’ вадидо’ хэтвась’ тоць. Падтаӈгода нява Нина Васильевна Валейская Няръяна март’, со’’явы яханда сян’ ялякон’ товысь.
Тикы нерде маля округна музейхана ма’’лёвада таневысь. Таняна пыда манзаита выставка’ нэяць. Товнда по’ нюртей ирий’ си’’ив яӈганя’ толыр’’ ӈэсонд’ Нина Валейской выставкада’ манзараӈгу. Теда то’’овахананда Нина Васильевна округна музеян’ тамна тет ю’’ падтавы манзаямда тэврась, тарця мядонзэй’ со’’явы яханда тавысь. Теда округна музейхана мат’’ ю’’ манзаяда маля таняӈгу’’.
Нина Васильевна Валейская тюку по’ носиндалава ирий’ сидя ю’’ сиднтетимдей яляхана си’’ив ю’’ пода панысь. Пыда округханана Кареговкам’ нюбета ӈэсыкоцяхана си’’ив ю’’ по’’ тяхана ёнар’’ хасуюёнар’’ тет’’ ю’’ самлязимдей похона соявысь. Небяда’ Ксения Петровна Валейская тамальӈгана тикы ӈэсыхына ӈацекы’’ тохолабвысь. Тикахад’ небяда’ март’ манзаравась’ товысь. Нина Няръяна маркана школамда ёльцесь, тамна нерня тоходанвась’ Ярославль’ март’ ӈэдалавыць. Таняна сян по’’ ямбан художественной училищехэна падтаӈгось тоходанась. Тикахад’ институт имени Сурикова ёльцевысь. Маля ӈока’’ по’’ ямбан’ Москвахана иле. Тарця ӈарка маркана илесь, пыда ӈобкарт ялян’ харта со’’явы ямда нисьтыда юрбю. Тикым’ харта манзаяха’’нанда манэ’’лабтамбида’’.
Нина Валейская падтаӈгова’ хавна тамна саць мэкад’ сянако’’ ( ӈухуко’’) сертаби, нюртей манзаида ӈобтарем’ теда округна музейхана, этно-культурный ценртхана таня’’. Пудана похо’’на Нина Васильевна тамна падна. Тюку по’ пыда падвы книгада округханана тарпгу.
Нина Васильевна Валейская теда март’ турманда мальӈгана ӈока’’ хибярина няюв’ лаханакурӈась. Теневана’’ нида’’ тянё ни’’ӈа’’. Этно-культурный центрхана ма’’лёвана мальӈгана харта иле’’мянда, тоходанванда, манзараванда нямна ӈока’’ вади’’ мэ’’ӈась. Вадида вадакодрев’ хайнаць. Саць нямбара, и’’ӈута некоця. Илм’ мэнена’’, хибярихи’ илеванда ямбан сава вадари мэта. Няръяна март’ хусувэй товахананда сава ихиня турцеты, маймбасьты. Теда маркана ӈока Нина Васильевнам’ теневана’’ хибяри’’ иле’’, ханяӈыдо’ этно-культурный центран’ турӈаць. Падтаӈгода няна вечер’ сава ихиня ваерась. «Илебц» театрхана сянакода’’ нина’’ «Няхар’’ пирибтя» манзаямдо’ манэ’’лабтаць, хынокад’ хибярина хыно’’ӈаць. Хусувэй вадам’ мэ’’мы сава’ няханда’ мядонзэйсавэй’ товысь.
Тюкумэвахана Нина Валейская сян’’ ялякоцян’ турӈась. Теда маля мякнанда мэ. Нерня манзарава’’ е’’эмня планда ӈарка! Маня’’ ӈани падтаӈгода няха’’на’’ мадава’’: сенз’ ӈэя, ябда илея, со’’яма яхананда пилибт’ ӈатева’’.
