Вы здесь

Нерня’ ӈод’ савовна иледа’’

Сян’ яля’’ ваерась я’ сяр ниня’’ илена’’ хибяри’’ едэй пом’ ядабтаӈгу’’. Тюку’ мэвахана сидя ёнар’’ тет’ яӈганя по’ тута. Хусувэй хибяри хэбидя яляхана няхато’ сейхад’ миндя’’ вади’’ мэцьты’’. Тюку яля’ тарця вади’’ маня’’ округна хибярихи’ хэвхы округханана илена’’ нина’’ хэтби’’.

Федор Константинович Яунгад Саля’хардахана иле, маля ӈока по’’ ямбан «Няръяна ӈэрм» нюбета газета’ редакторӈэ’ тара.

Яуӈгад: – Нянэй ненэцие’’ вадахана мэта’’ ирийна нюв’ – ӈарка пэвдэй. Ӈарка пэвдэй ӈэбнанда’ ӈод, мань’ Пэ’’ тяхана илена’’ ненэцяӈг’ тарем’ мададм’ – ӈарка пэвдэй ирий’ нюмлида, маня’’ е’’эмняна тикы ириян’ ӈани’ ирий’’ то’’олха. Тикы ирийхана савовна илея’’, тикы ирийхана выӈгана илена’’ ненэця’’ нюдо’ мякандо’ тэврэйдамдо’, тикахад’ тамна тикы ирийхана тыдо’ ма’’ламбая’’, сыра’ нимня ядбато’ сыра’ муно’’ӈая. Тикы мундо’ ӈани мань’ тюку яна намдуркав’. Тиканда мань’ инани’ мададм’: – О-о-о, такы нини’’ илевы’’! Сенз’ ӈэя’’!

Валентина Неликовна Няруй Я’малкана мюсерта’’ ненэцие’’ мякана соявы, тедахова маля ӈока по’’ ямбан марад’ илм’ мэ’’ӈа’’. Округханандо’ танеда Центр’ образования’ мякана ервандо’ ӈуда’ ӈылӈэ’ манзара. Нянэювна ӈэрм’ тенз’ ненэцие’’ вадам’ тю’’у минрена.

Няруй: – Ненецкий автономный округхана иленя’’ сава нин’’, Няръяна маркана иленя’’, Нельмин Носхана, Омана, ӈани’ нюдяко’ хардакохона мань’ харни’ нядни’ ӈули’’ сава вади, сейхад’ ӈэда’’ вади’’ нянда ӈэдарабидм’. Пыдара’’ нюдя’’ хусувэй по’ няна’’ ӈэдарамбида’’, нянэй вадавна викторина’’ падби’’, стих’’ толаби’’ма’’. Нянэй вада е’’эмня ӈока ӈамгэм’ тенева’’. Тикы яхат’ сочинением’ падби’’, харто’ падна’’. Хибя’’ тенева’’, ся’’ня ӈока по’’ ханта’’ харвабта писатель’’ ӈадимданакы? Теда писателькоена сянбой иленява’’ хаи’’. Нянэй вадавна паднана’’ нина’’ ӈыльняӈы’ ян’ хая’’. Теда тюку ӈацекы’’ поӈгат’ ӈань’ тарем’ паднана’’ ӈадимбато’ тара’’ нив’’.

Ӈарка вада’’, сензда’ ӈада’’, нюда’’ сяӈада’’. Харта’’ вадамда хусувэй яля’ мэ’’ӈара’’, толаӈ-гуда’’, харта паднада’’. Я’малан’ ӈоб’ турӈада’’.

Корр: Валентина Нёликовна, пыдара’’ яхананда, округхананда нянэй вадам’ пэртя ӈацекы’’ хурка?

– Я’малхана ӈокаюв’ пелява ненэця’’ ненэцие’’ поӈгат’ мюсер’’ нив’’, ты’’хэвхана иле’’ нивам’. Ненэць ты’ хэвхана илебата, харта вадамда тенева. Харта иланда саир’ сер ӈоб’ иле, харта вадамда мэ’’ӈа’’, харта ӈэдалыва, хусувэй ӈамгэмда харта сертамбидава’’. Тарем иленя, ты’ хэвхана иленя ненэць нянэй вадамда’ ханяда тене’’. Тэва’’ яӈгуда, нива’’ мюсерт’, вадава юрӈгува’’.Тиканда, тад’ нерня, сейхана иленя’’ нянэй ненэця’’, я’ тиӈгэвна мюсена’’ ненэця’’ ӈоб’ мюсерӈая’’. Тэкоцидо’ лэтбая’’, нюдо’ лэтбая’’, пухуцидо’ сяӈая’’, сэдорая’’, ядэрӈая’’. Ти’, лакамбой тедамбой.