Вы здесь

Едэй пом’ ядабтабвахана

Маня’’ сава нина’’! Сян яля’’ ваерась тамна ӈопой пом’ мадаӈгува’’. Сидя ёнар’’ няхарамдэй яӈганя по’ луца’’ вадавна манзь – историяӈэ’ ханта. По’ – сидя’ яӈганя ирий’’, няхар’’ юр’’ мат’’ю’’ самляӈг яля’’. Таӈок яля’’ ямбан яханана хуркари’’ сейхана сомбой сер’’ таняць, вэвко’’ юн’’ ӈод няна’’ тэворӈаць. Тарем’ ӈэӈгу’’ нив’. Илева’ сер’ хуркари’’ сер’’ танесеты’’.

Сидя ёнар’’ няхарамдэй яӈганя пова мер’’ ваерана то’’олха’’. Хусувэй по’ пудана ириян’ тэвась, пудана’’ ялуда’’ мэць ибедорцетыва’’: хаёвнда по’ хурка ӈэса, ӈамгэ савада танеса, хурка тоенана сер’’ танявыць. Хурка серт’ сеюна маймбиць, хурка серкад’ сеюна яртархаць.

Маня’’ минрена манзаянана’ ӈод хаювы похона сава сер’ хадкэсь. Неняӈг’’ ирийхад’ ненэцие’’ вадавна падбада «Ялумд» нюбета страницава сидя страницаӈэ’ ӈадиберӈа’’. Хари’’ вадавнана ӈокаркавна паднава’’. Тюку яля’ мань’ сими’ нядабада’’ няха’’ни’’ ӈарка вадам’ мэ’’ӈадм’. Сямянд’ сававна нядаӈгодин’ нюмдеӈгун’, тикы тохолкода Матрена Ивановна Талеева, «Илебц» театрана манзаям’ нерня’ пэртява Серафима Петровна Дуркина, тохолкодаӈэ’ ӈока по’’ ямбан манзаравы Галина Григорьевна Тайбарей, толаӈгова’ хардахана манзарана нин’ Надежда Николаевна Талеева, Зоя Степановна Ивакилева. Нерняна товнда похона манзаява тянёрка ни’’ӈэӈгу’’. Енам’, газетахана паднана’’ хибярина толыр’ ӈарумда. Округна школахана манзарана’’ тохолкодина’’, хуний ненэцие’’ вадан’ ӈацекына тохоламби’’, ӈацекыто’ няюв’ паднаӈгу’’. Ӈэсынанда танеда юн’ падбида’’, тохолковамда ваде’’ӈара’’, хусувэй танеда манзаида манэ’’лабтамбида’’. Ӈобнзер’ манзарабнана’’ харна’’ вадава илеӈгу’’, тю’’ури’ минд’ нив.

По’ ямбан округханана ваеравы сер’’ ӈокаць, культура манзаям’ пэртина ӈарка манзаи’’ сертабиць. Маркана хуркари’’ выставка’ таняць, мел’’ненэциена мастер-класс’’ манэ’’лабтабиць. Ихиня сомбой выставкам’ вэба ирийхана манэ’’ӈаваць, ханяна хуркари’’ тенз’ мэта’’ ненэця’’ сянакудо’ манэ’’лабтабиць. Тикахад’ «Печорянкам’» нюбета конкурсва ваерась, маня’’ няхар’’ пирибцякова таняна пирдырӈаць. Пыдо’ пэдаваць.

Ӈацекына Саля’хардахана ваеравы олимпиадан’ тэворӈаць, ханяна ныхыдо’ харто’ вадамдо’ теневавана хорпиць. Ненэця’’ вада олимпиадахана паднаць, стих’’ толабиць; харто’ паныдо’ манэ’’лабтаць.

Тюку ялян’ хэтась: округна ты’’пэртя’’ забой’ манзаидо’ ханярина ёльцембидо’. Хойхана иленя’’ нина’’ сывы’ мюсерць яхато’ тэвӈгуд.

Товнда пова’ сава ихиня ядамбаваха’’.