Я’ сяр ниня ӈудидо’ мэта’’ ненэця тянё вуни’’ӈа’’. Маня’’ яханана тарця хибярина’’ ӈани’ таня. Мел’’ ненэциена округна ӈэсына’’ иле’’, маркана иленя’’ поӈгана таня’’.

Пыдо’ ӈуданато’ сертавы’’; сэвхана, ин’ мэёвна еримберта’’ манзаи’’ манэ’’манзь’ ӈока ма’’люрцетыва’’. «Мел манзарана» таремъюв’ нюмдевы’’ выставка яханана хусувэй по’ танесеты. Тарця серкана этнокультурный центрхана манзаранина’’ сидна’’ маймбтебсеты’’. Мел’’ нина’’ манзаи’’ ӈатесетына’’, мел’’ ненэциена нюби’’ теневына’’. Тарця ненэциена харто’ манзаидо’ ӈани яхана илена’’ хибярихи’ манэ’’лабтабавась ядэласьтыдо’. Явнана ӈока ӈэдалёрцеты’’, ӈарка марка’’на танеда’’ выставкаха’ тэворцеты’’. Хаювы яляхана тарця юнм’ ня’’амаваць: – Тюку ирий’ няхарамдэй яляхад’ юдимдей толыр’’ ӈэсонд’ Швеция яхана « Ремесла без границ» Международной выставка манзаравнда. Тикы я’ Йоккмокк маркана Россия, Швеция, Норвегия мел’’ хибяри’’ ма’’лэйдаць. Маня’’ округна мел’’ хибяри’’ манзая’’ ӈод’ таняюв’ ӈэдалэйдаць. Округхадана тарця выставкахана Александр Ледков манзара. Тикы’ хасава нянэювна ӈудида мэта ненэця. Пыда манзаида яханана илена’’ хибяри’’ сававна теневыдо’. Ӈока маркана танеда выставкахана танесеты. Пыда манзаида тэмдаван’ харвана’’ хибяри’’ тянё нисьты’’ ӈа’’. Александр Ледков этнокультурный центрана «Мел’’ манзарана’’» мастерскойхана манзарана. Тюку’мэвахана Швецияхана ваеравы выставкахана манзарась’ нята’’ нита’’ манзаи’’ таняна манэ’’лабтабись. Ханзер’ ненэця’’ ханудо’ мимбидо’? Тикым’ ӈани’ яхад’ товы’’ хибярихи’ ваде’’ӈадась, манэ’’лабтабидась. Сян’’ мастер-класс’’ мэ’’ӈась. Ханм’ сертабаван’ тохован’ харвана’’ хибяри’’ поӈгана тянё ниць’ӈа’’. Тикы нямна хонаркода ӈоб’ таневыць. Александр ӈод’ теневанамда нята’’ янамбовна харвась манэ’’лабтабидась, ваде’’ӈадась.

Швецияхана ваеравы международной выставкахана ӈока тарана’’ ӈамгэм’ ваде’’ӈаць. Ханярид’ товы’’ мел’’ хибяри’’ нидо’ манэ’’ӈа’’, нито’ манзаи’’ манэ’’сарӈаць, ӈока несэй ӈамгэм’ нерня манзаравандо’ е’’эмня хоць. Хусувэй мел’’ ненэця’’ мяканда хэсь ихинянда савась. Нерня манзараванда е’’эмня ныхыдамдо’ ма’’ла’’, сава и’’ӈудом’ мэць няхато’ – лакамбой хэтаць. Нерняна таневнда выставкахана нидо’ ӈани’ манэ’’тыдо’, няхато’ маймбась ядгу’’. Тарем’ ӈэдалёрма’’ мел’’ хибярина саць тарана сер’ ӈэ’’ним’. Округханана тарцям’ хамадабась нина’’ ханяримна ӈэдалёрӈа’’.