Вы здесь

Ихиняна пилибт’ илевнда

Ил’ нерня ӈарка яӈгам’ мэць миндарха. Яля’’, ирий’’, по’’ ӈод нись’ нултан’’ нерняри’’ миӈа’’. Тамна нись’ ӈахакуна едэй пом’ ядабтавась хамякуваць. Сидя ёнар’’ няхар’’яӈганя пом’ ӈатеваць. Теда маниесь: тандая товы едэй похона маля нябимдей ирий’ илева’’.

Товы похона маня’’ илесь яханана хуркари’’ ӈарка сер’’ таневнда. Нянэювна культурахана манзарана’’ нина’’ сидна’’ маймбтеӈгу’’. Тикахад’ сяӈговы илевы’’ нина’’, хуний пудандо’ ӈарка сарпям’ хаевы, тарця нина’’ со’’яма яляханандо’ тензебтеӈгуна’’. Пыдо’ нямнандо’ вадина хэтгува’’. Тарця хибяри’’ юрбась ни’’ тара’’. Ӈопой тарця нява Евгения Андреевна Соболева. Пыда илда ямб’ нивысь’ ӈа’’. Няхар’’ ю’’ самляӈг понанда яӈгумысь. Хэбиць илӈгананда сертавэда тянё нись’ ӈа. Пыда няданда теда танеда, мэбета «Хаярм’» нюбета ансамбль миӈа, ханяна самляӈг ю’’ по’’ ямбан ӈацекы’’ тара’’. Илеванда ямбан Евгения Соболева ненэцие’’ фольклорм’ ма’’ламбись, ханяримна ӈэдалёрць ненэцяӈгат’ невхы ярабц, хынабц, сюдбабц падбись. Хусувэй сертамбада манзаяда ивнянда ӈэвысь.

Евгения Андреевна Соболева округна Нюдя яханана ёнар’’ хасуюёнар’’ няхар’’ ю’’ сидндетимдей по’ яра ирий’ самляӈг’яӈганя толыркана соявысь. Си’’ив яӈганя похонанда Архангельск’ март’ тоходанвась ӈэдалавыць. Тикы ӈарка маркана тет по’’ ямбан музыкальный училищехэна тоходанась. Дирижерско-хоровой отделением’ ёльцесь Няръяна март’ тось. Округна еркы маркана культура’ хардахана хоровой кружок’ манзаям’ пявысь. Тикы’ пуд музыкальный школахана тохолкодаӈэ’ тарась, Дом народного творчества мякана методист манзаям’ минревысь. Ленинград маркы Герцен нювм’ нюбета институтхана манзаравы Т.Ф. Петрова-Бытова Няръяна март’ турманда мальӈгана Евгения Соболева няюв’ ненэцие сюдбацмана тарабцом’ масьтевэхэсь. «Добрый великан» нюбета сюитам’ тенад’ мэ’’ӈадо’’. Евгения тохолкова серм’ саць харвабтадась, училище’ пуд сидя по’’ ямбан Ленинград маркана консерваторияхана тоходанась. Таняна тоходанвамда ёльцесь пуня яханда тэвыць. «Хаяр» ансамбляна серм’ пэртя манзарась, балетмейстерӈэ’ тарась. Тамальӈгы похона Евдокия Хатанзейская няюв’ ӈобнзер манзараӈаханзь. Ӈобкана сертавы’’ манзаиди’ таняць. Евгения Андреевна нюдякоця некоця ӈэвысь, ябтакоця. Харта таравы ӈэсьты, хыноцеты. Вэсакода Валерий Пырерко ӈэвысь, не нюди танявысь.

Евгения Андреевна Соболева няхар’’ ю’’ по’’ тяхана яӈгумысь, Няръяна маркана сюры. Илевада ямб’ нивысь’ ӈа, хаювы сарпяда нюдя ни’’ӈа’’. Пыда’ сита тенена’’ хибяри’’ теда округханана ханярина иле’’. Тюку ирийхана округна библиотека отдел Севера лохона хибяри’’ ма’’лаӈгуд, хуний Евгения Соболевам’ теневадось. Мэбета, хынота, тарана няндо’ е’’эмня харто’ вадидо’ мэта’’. Ваде’’тадо’ – нява хурка ӈэса, ханзер илесь, манзарась.