Раиса Афанасьевна Копотева Холговхана соявы не, таняна вадюданась, тикахад’ маля ӈока по’’ ямбан харта со’’явы яхананда ӈацекы’’ тохоламби’’. Пыда – тохолкода. Тарця манзаямда маля тет юд’ мян по’’ минреда.
Тюку ялян’ таслась, нюртей тохолабвы’’ ӈацекыда маля ӈарка хибяри’’. Ханяӈыдо’ харто’ ӈэсынандо’ иле’’, таняна манзара’’, нюдо’ вадамби’’. Раиса Афанасьевна тохоламбавы’’ ӈацекыта нюкци’’ теда тохоламби.
Раиса Афанасьевна Холговхана ёнар’’ хасуюёнар’’ самляӈг ю’’ самлязимдей по’ яра’ ирий сидндтет’ яӈганя толыркана соявысь. Холгов’ ӈохона мюсерта ненэцие’’ мякана вадювы. Нися’ хасада илеванда ямбан ты’’пэртяӈэ’ манзарась, бригадирӈэ’ таравысь. Пыда пухуцянда’ няюв ю’’ нюкцяди’ ӈэвысь. Раисамди’ ӈаркамбой хасава’’ няхаюда сяньзьтыдо’, нюдякоданда толаӈгось’ тохолабвэдось. Школан’ тобнанда Раиса маля толаӈгось’ со’’ теневавысь. Няръяна маркана школа-интернатхана тоходанась. Тоходанва’ серм’ саць харвабтадась, хусувэй ӈамгэм’ теневаван’ харвась. Тохолкодита’ манзаям’ маниесь, не ӈацекы сиднтет классм’ ёльцесь нерня тоходанвась Няръяна маркы педучилищен’ тэвыць. Таняна сян по’’ ямбан тохолкода манзаян’ тоходанась. Тоходанвы’’ пода ихинянда мэёвна еримыць. Хуркари’’ танеда мероприятияхана пыда мэвы’’ ӈэсьты. Педучилищем’ ёльцесь Раиса Афанасьевна манзаравась харта яханда тэвыць. Тет ю’’ по’’ , ёнар’’ хасуюёнар’’ си’’ив ю’’ самлязимдей поход’ пыда Бугринохона манзара. Таня’’ тобнанда ӈэсынандо’ школадо’ яӈговысь, ӈацембой некоця культура’ хардандо’ ервотаӈэ’ манзарась пядась. Сеянда нись’ пин’’ ӈарка манзаям’ пясь. Я’’авлада некоця тамбир’ манзаям’ пирдаледась, харвась манзаямда пэрӈадась. Ӈэсынандо’ илена’’ хибярито’ е’’эмня хуркари’’ хэбидя ялу’’ хамадабсеты’’, нидо’ ныланавась ма’’лабсеты’’. Культура’ хардахана хуркари’’ кружок’’ манзараць, хибяридо’ харто’ театрханандо’ сянакуць; сё’’ мэ’’манзь ма’’люрцеты’’, хибяридо’ тарасеты’’. Манзаядо’ нерняри’’ миӈась. Таняна манзарась’ Раиса Афанасьевна тохолкода манзаямда ихинянда лэтбидась, ӈацекы’’ тохоламбаван’ саць харвась. Няхар’’ ю’’ самляӈг по’’ тяхана Бугринохона школам’ миць, едэй школан’ манзаравась Раиса Афанасьевна тось. Тарем’, маля ёнар’’ хасуюёнар’’ сиднтет юдимдей поход’ Холгов’ тер’’ нита нюкци’’ тохолкода Раиса Афанасьевна Копотева тохолабида.
Тей’ яля Раиса Афанасьевна со’’яма ялямда мэ’’ӈась, мат’’ ю’’ помда ядабта. Тикы яляхана пыда ӈока сава вади’’ теневана’’ хибярихитта, манзарась ня’’хататта, тохолабда’’ ӈацекехэт’ намдась.
Маня ӈод, Холговхана манзара тохолкодан’ тарця вадина мэ’’ӈава’’: сензан’ ӈа’’, хусувэй ялям’ сава ихиня ядтамбю, ӈацекы’’ харвась’ тоходаная. Манзаяр’ ӈока маймбцом’ нянд’ тамна тэврая. Газетахана паднада’’, ӈацекыта манзаи’’ някуна ӈэдарабида’’.
