Тюку по’ӈарка пэвдэй’ ирийхана округна сиднтет ю’’ самляӈг пом’ ядабта-ӈгува’’. Ӈарка яля’’ха’’ хамяковахана тарця хибярина нямна вадина’’ мэтава’’, хуний ӈока ныхымдо’, теневанамдо’ округна вадюданван’ масьтець.
Ӈопой тарця мэбета ненэця’ Николай Егорович Ледков ӈэвысь. Тюку по’ хасуюр’’ самляӈг пода панысь. Пыда – ты’’пэртясь, сайнормахана мэвысь, Ненэцие’’ окрисполкомна предсе-дательӈэ’ манзарась, Верховный Совет СССР депутатӈэ’ няхармэвна тэравысь. Илеванда ямбан сертавэда тянё ванись’ ӈа’’. Тикым’ теда илена’’ хибяри’’ тенедо’. Няръяна маркана тамна тарця хибярина иле’’, хуний Николай Егорович сэвхана манэць’ теневадо’, тенедо’.
Округна толаӈгова’’ хардахана ӈэрм’ тенз’’ отделкана манзарана’’ нина’’ ваеравы си’’ив пудана яляхана ненэцие’’ ма’’лаць. Тюку’ мэвахана Зоя Степановна Ивакилева вадамда Н.Е.Ледков нямна хамандавысь. Таняна ма’’лавы’’ хибяри’’ харто’ лаханаць.
Николай Егорович Ледков 1919 по’ февраль’ ирий си’’ив яӈганя яляхана Нюдя яхана ты’’пэртя ненэця мякана соявысь. Хойхана вадюданась, янамбовна харта мякнанда толаӈгось, паднась тоходанась. 1932 похона Коткино ӈэсыхына хойхана мюсерта’’ ненэця’’ ӈацекы’’ е’’эмня школам’ нэць. Николай школан’ тобнанда тикаминда нябимдей классхана тоходанась’ пядась. Тоходанвам’ харвабтана хасавакось. Школамда ёльце’’маха-данда маля сиднтет’ яӈганя потась. Тикаминда Тиманской выӈгана ты’’пэртяӈэ’ манзарась’ пядась. Ӈэсындо’ бригадир Николай манзаравам’ маниесь, масьты: манзаям’ мэнена, манзарась’ теневана хасава ӈацекы. Николай тэхэна’’ мэбнанда бригадирандо’ ида сацьри нисьты’’ няркна’’. Пыда тенева: тыдо’ лэтравы, нядэйсавэй яхана мэӈгу’’. Сайнорма по’’ тось Николай Егорович сайнормась ӈэдалэяць. Саю’’ по’’ямбан оленно-лыжной батальонхана Мурманск’ мар’ хэвхана сайнорӈась.
Сайнорма ваерась харта яханда тэвыць, хойхана ты’’пэрӈась, бригадирӈэ’ манзарась. Хуркари’’ манзаян’ ив’ ер сырта ненэцям’ 1953 похона Тиманской тундровый Совет’ серм’ пэртяӈэ’ тэрадось. По’ ватамбой ваерась Николай Егорович Ледков «Тиманец» нюбета артелькана’ манзарана’’ хибяри’’ нямдо’ председательӈэ’ тэрадось. Канин’, Тиман’ яхана илена’’ хибяри’’ Николай Егорович сававна теневадось. 1957 по’ нара пыда’ сита Канино-Тиманской райисполком’ председательӈэ’ тэрамбидо’. По’ ваерась Верховный Совет’ депутатӈэ’ хаясь. Ненэцие’’ окр-исполкомна председательӈэ’ манзарась. Хуркари’’ манзаян’ ӈока ныхымда масьтембада хибярись, ханярина манзарась – ненэцие’’ нида’’ пилибт’ нядабасьтыда.
Тарця хибяри’’ округна историям’сертамбиць. Пыдо’ округна е’’эмня, хибярина ил’ саваркава’ ми’’ма’’ е’’эмня ӈокавна манзараць. Тикы нямна округна толаӈгова’’ хардахана ма’’лавы’’ хибярина лаханаць. Ӈока сава вади’’ А.И. Кожурова, Ю.А. Хатанзейский, И.Е. Ледков, В.К. Корепанов хэтаць. Хурка хибяри Николай Егорович Ледков ӈэвысь, ханзер манзаравысь тикым’ Федор Степанович Филиппов, Тихон Иванович Сядейский вадахат’ намдаваць. Пыдо’ ӈобкана манзаравыць.
Николай Егорович Ледков ӈарка илм’ мэ’’мы хибярись, округна е’’эмня ӈокавна манзаравысь. Пухуцянда няюв’ няхар’’ не’’ нюмди, хасава нюмди’ вадаӈахась. Мал’’ нюди’’ сава хибяриӈэ’ вадювы’’, маркана иле’’. Няръяна маркана валакада Николай Егорович Ледков е’’эмня сертавы памятный знак’ ӈадимда. Тикы е’’эмня ӈарка манзаям’ Ф.С.Филиппов сертась.
