Маня’’ яханана ӈока тарця хибярина иле’’, манзара’’, хуний тюку яхана сояць, вадыць. Тикахад’ варёмдо’ мэць харто’ соявы яханандо’ таромдо’ мэць ив’ ер манзара. Няръяна маркана ӈод тарця хибярина тянё вани’’ӈа’’.
Ӈопой тарця не, сава теневанава’’ Матрёна Ивановна Талеева. Сёнзянда лата не,илека, нямбара, ёнекад. Тандая ваеравы со’’яма яляхананда пыда ӈока ихид’ миндя вади’’ намдась. Хибярихат’, хуний сяӈгова Ненэцие’’ школа-интернатхана тоходанаць; хибярихит’, хуний таняна пыда няюв’ сяӈгова манзараць, теда ӈобкана манзара’’; ӈацекэхэт’, хуний теда тюкохона тоходана’’. Матрёна Ивановнан’ сава вадам’ хэтувнда хибярир’ тянё вани’’ӈа’’. Теневана’’ хибярида’ тохолкодахандо’ сейхад’ хэтувнда вадидо’ мэ’’ӈаць. Илеванда ямбан ӈокавна манзара, сертавэда маля тянё ни’’ӈа’’. Теда ӈод’ Матрёна Ивановна хусувэй яля’ школаханда ядсеты. Ӈэрм яханана вадюданна ӈацекына тохолаби, ӈокаювдо’ округна ӈэсыхыт’ товы’’ ӈацекы’’. Мэта си’’ивна нюртей яляхана Матрёна Ивановна Талеева со’’яма ялямда мэ’’ӈась. Ӈарка яляхананда теневана’’ нида’’ ма’’лабись.
Едэй по’ нюртей ирийхана Матрена Ивановна со’’яма ялямда мэцьты. Мат’’ ю’’ самляӈг по’’ тяхана лимбя ирий’ нябимдей яӈганя’ толыркана округна Ӈарка яхана мюсерта’’ ненэцие’’ мякана соявысь. Нися’ хасада илеванда ямбан «Харп» колхозхана тыбэртяӈэ’ манзаравысь, небя’ хасада вэсакомда нядабась хойхана мюсерӈась. Хусувэй мяд’ манзаям’ пэртяӈэ’ тарась. Нюкцида вадабись, мята’ ибам’ лэтбись, мята’ тер’’ сэдорпись. Тикахад’ илевадо’ таремъюв’ сюрхалвыць. Клавдия Кузьминична хасаванда’ яӈгумзь нюта’’ няюв’ хардан’ илелъяць. Краснойхана илесь хуркари’’ манзаяхана ив’ ер манзаравы ӈэсьты, нюда’’ тоходанаць. Небя’ хасада ӈопойӈэ’ нюкцида вадась, мал’’ нюда’’ сава хибяриӈэ’ хаяць. Теда хусувэдо’ харто’ мято’ терсавэй, харто’ манзаяханато’ манзара’’. Матрёна Ивановна’ тет’’ юкад’ вата по’’ ямбан Ненэцие’’ школа-интернатхана ӈацекы’’ тохолаби. Тикы’ хавна сертабада серуда ӈока’’ ӈэсьты. Илеванда ямбан пилибт’ общественной манзаида танесеты’’. Паднана нява, падвы манзаида тянё ни’’ӈа’’. Сян’ книгада’’ маля таня’’. Паднава серт’ ӈацекы’’ ӈод” тохолабсеты. «Илебц» театрхана нюртей яляхат’ сянаку. Хынокад’ нява хусувэй репетициян’ манзаянда’ пуд харвась ядсеты.
Матрёна Ивановна Талеева маня’’ ӈод сава нядаӈгодава’’. Пыда падвыда газетаханана ӈадиберцеты, радиовна сосьты. Тюку яля’ сава нядаӈгода няхан’ тарця вади’’ хэтбидм’: сензан’ ӈа’’, тамна пон’ маймбась манзаяханд’ яд’’, тохоламбада ӈацетыд’ харвась’ тоходаная’’. Мякнанд’ хусувэй ӈамгэр’ саваривна миӈая, мят’ тер’’ нёя’’ хаӈгур’’, сит’ хусувэй серкана нядабая’’. Варёмд’ мэць ӈоб’ нерняри мий’’, сава ихиня хусувэй товы ялям’ ядабтамбю, илеваханд’ маймбю. Нянд’, ӈарка вадам’ хэтбим’. Няданд’ ӈока падвым’ ӈатева’’, ӈоб’ нерня пэрт.
