Нянэй ненэця’’ тенз’ мэта хибяри’’ ӈэрм’ яхана ханярина иле’’. Тыдо’ пэрць вымна сян’ юр’’ по’’ ямбан мюсерӈа’’. Пудана юр’’ по’’ ямбан ӈока несэй ненэцие’’ илевахана ӈадимяць. Ненэця’’ луци’’ манзаи’’ торомда’’, харто’ паднава серуна ӈадимя’’. Вадакуна’’ ма’’ламбада хибярина книги’’ падби’’. Нейко Янгасова вадако’’ книгам’ ма’’лась.
Нёр Туӈгосе’’э ӈани’ тарем’ ма: – Пыдар сидя хабтаркамд тэмд’ ми’’ӈанаси’’. Хурка мань ӈод’’ сидя хабтарками тэхэюни митадм’. Пыдар мяканд хэхэр’’.
Лаханавэюм’ тальняю’ пыда ӈэдалэй’’. Пон’ нись мы’’ пой ӈутокани нултавонода. Тарем’ мамонода.
– Хананд тэӈэ сидя хабтарками ӈэдаӈахаюн. Хури’ пяб’’нанд саваха’ ӈэӈгху’. Ибэй иканя нихи’ табдёд’’! Мань тарем’ мадм’: – Юр’’ Вэя Сэв’ ян’ мань пяб’’нани’, тыра’ хэваӈэ харваӈгобтав’? Нями тарем’ ма: – Ханядм’ харва’’!
Мят’ ни тю’’, Нёр Туӈгосе’’э тикари яхад хэрахавонода. Ся’’ны ӈэбта ямдонолына’’. Маня’’ мюселъяна’’. Пырдариюв’ сиби’ ханеӈгани яво маторӈава’’. Тайна хунана’’ яхана’’ тэвына’’. Нябтид’ тэва, няхар’’ ӈэсы’ нёридо’ хоярӈа’’. Нися вэсакоми пухуцянда ня’ ва’’авконди’ нид нивэхэ’ пунов. Тысъя ӈацекэ’ ха’’ма вуни таня’’.
Хэвнякубта мя’’ма’’ мярава’’. Таня илева’’. Сы’’ны ӈэбта пихи – пихид ӈоб’’ ӈэ’’ мун’’ торахавонодо’. Нём’ тядэда. Текаехэвами Тысъя’ ӈацекэ мякы тоёта. Пыда тарем’ маси’’:- Яраха’’ саю’’ сидна’’ хадаць. Илевндяӈэ ян’ валаками. Серм’ пэртидо’ ти’’ ӈэ’’ ни’’им’: -Тавысо’’ Сюдбя, Маръико’’ Сюдбя, Туӈгосо’’ Сюдбя, няби я’ вэкы Вэя Сэв Нюдя, Тет Хабт Пари. Тад ӈанихив’’ си’’ив я’ тер’’. Няхар’’ по’ ямбан’ си’’ми нёраку’’ӈа’’.
Ся’’ны ӈэбто’ мань тарем’ мадм’: – Няхар’’ ю’’ ёнар’’ни едядо сэя я’’ма. Тэсъя ӈацекэ пыда тарем’ маси’’: – ӈари’’ маньзяван ӈамгэм’ мэнанадм’ ӈули’’ нидм’ ӈа’’. Хоёданакэдм’.
Нёр Туӈгосе’’э’ сидя хабтарце’’эм’ подерӈахаюн. Недарме’’э’ мюмня хареӈахаюн. Сянанд’ – хунат’’’ни ӈод’’, Итя Ӈабтенями нерни’ нямна пили’’ нярахалъй’’. Сидя Хабтарками ибэй ямд’ пидеӈахаюн. Тобни’ ӈыламна итя ханеӈга. Си’’ивахав яля’ пиняри миӈадм’. Ӈамгэ’ пирка’’на миндани ед’ ӈоб’’ ӈарка мя’’. Мэтида ейда, явэ’ хобат сэдавы ӈэвы’’. Мят’ тюдама. Вэсако’, пухуцяха’ ӈоб’’ ёхорт’ ёхортавэхэ’. Пелей’ няна няхали хонёдаю Вэсако масьнё’’: – Хуна манэцяда ненэць’ ӈэвэн. Хыбян ӈэбат?
Мань ӈани’ мадм’: – Харючи’ нюдя нюм’ тэри нюбе’’ӈадм’. Пыдар хибян? – Явэ’’ хоба еям’ мань нюбе’’ӈадм’. Ху’ пэрӈар?
– Параӈодахана’’ еся ӈэва мирми хан’’ладамзь. Мюсяртаехэни мядони хавы’’. Няхар’’ ю’’ ёнар’’ тыни пюладм’. Тыра’ хэваӈэ тараӈгобтав’?
Вэсако масьнё’’: – Ӈари’’ маньзяван ӈамгэм’ мэнанадм’ ӈули’’ нидм’ ӈа’’. Тяханяӈы няхар’’ нюхувами ти’’ ӈэ’’ ни’’им’. Тосяда ханим’ хадаехарта тамна ехэра’’. Тад’ ӈо’’ ӈэсь ӈо’’ Вэя’ Сэв’ не ню не нив’ таня’’. Хабэй халъмер илебтембавонда. Нюдя Вэя Сэв ӈамгэхэрт мирван’ хаӈгана ни’ӈа’’.
Пихи – пихиня ӈоб’’ лаханана тарем’ мамонода: – Харючи’ нюдя ню тарем’ нулаӈга тэводана ямд’ сяха’ тэвар’’. Нёр Туӈгосе’’э ӈэрахаванода. Пин’ тарпыв’’. Ӈамгэхэрт яӈгу. Салям’ танда ӈэдала’’ ни’’ивам’. Сянанд’ – хунат’ мимб’’нани ӈод’’, нерни’ няна ӈоб’’ ӈарка мя’’. Ӈобтикы вада. Нёр Туӈгосе’’э ӈани’ тарем’ ма: – Харючи’ нюдя ню тарем’ нулаӈга тэводана ямд’ сяха’ тэвар.
