Тандая тамна ӈопой пом’ мадава’’. Сидя ёнар’’ тетимдей яӈганя по’ вэва нись’ ӈа’’. Теда, пуняюв’ сылась хусувэва’’ ибедорӈа: хаювы по’ нянан’ хурка ӈэса? По’ пудана яляха’’на округна хибяри’’ тарця сер’ нямна хонрабидамзь’.

Индига ӈэсыхы’ школахана манзарана тохолкода Татьяна Юрьевна Давыдова Москва маркана ваеравы тохолкоди’’ конкурсхад’ няхарамдэй местам’ тэврась. Тамбир’ ӈарка ма’’лёвахана хурка ӈэвысь? Тикы нямна тохолкода тарця вади’’ хэтась: – Нерня мань’ хари’ школана ерв’ е’’эмня вади’’ хэтван’ харвам’: Торопова Алёна Владимировнан’ пыда школана ӈаркта, школана завучан’ Барматухина Юлия Александровнан’. Тикы ӈацембой некоцяха’. Национально-региональный компонент’ е’’эмня ӈока сер’’ сертабихи’. Ӈодьбянда манзараван нерня’ харвасетыдм’. Тюку по’ сямянд’ знаменательнойӈэ’ мань’ тарем’ тасламбив’. Нерня мань’ хари’’ школанан’, Заполярной районхана, тикахад’ региональной конкурсхана нюртей местам’ мэм’, тикахад’ заочной конкурсхана Всероссийской конкурсан’ сим’ хаӈа’’. Тикахад’ таняна ваерам’. Теда нись’ ӈа’’на ӈарка маркад’ томась. Таняна сидя ю’’ ӈопой тохолкода’’ пирдырӈаць’. Мат’’яӈганя регионхад’ товыць’. Саць саӈго’’воӈась. Республика няби округ. Республика ёнар’’ есям’ мипи’’ тохолкодаха’, ембдяродо’ едэй, тикахад ӈаркае’’ плакат’ падвы. Харто’ национальной ембдяродо’ защищайбава е’’эмня яхадандо’ ансамбль’ тоць. Мани’ ӈани округхад’ валакада методистна’ ня хан’’ӈанись Парасковья Ивановна’ ня. Хари’ хамандабэй методической разработки, хари’ ӈудахана падбэй, сертабэй. Тикы’ манзаини’ выставкахана ӈаць. Ӈодьбята пирдырць’ саць саӈго’’воӈась. Тюку яля’ ӈарка вадам’ Людмила Яковлевна Талееван’ хэтбим’, Галина Васильевна Белован’ методической сопровождением’ по’ нерня пэрӈась. Ханзер’’ конкурс’ пирдырць нерняку’’ваерань’, тикы’ пуд нерня пили’’ сидни’ нядабихись. Тикахад’ телерадиокомпания «Север», таняна сидя хибяри’ монтажёр няби оператор нядагуху’. Мань’ благодарственной падар’ падамась, ханяхартахана печатаясь’ я’’амыдо’. Харданан’ ӈудаханан’ падгун’, тикахад’ ӈэдраӈгун’. Ӈарка март’ хэсь мань’ тамна нядаӈгодин’ таняць: Апицына Людмила Андреевна, пыда внукда нянан’ тоходана’’, ненэця’’ вадам’ тохоламби’’; тикахад’ Выучейская Александра Андреевна нян’ надаӈгусь, ӈаркае’’ плакат’ нян’ тась. Людмила Андреевна сидя сэрако’ хобам’ тэврась. Тикахад’ Талеева Людмила Егоровна сувенир’- ӈарка пад’ тась, Москвахана манэ’’лабтава е’’эмня. Школана тетимдей класс’ небя’’, нися’’ сим’ сава вадахана, серкана сим’ нядабиць. Тикахад’ конкурсахад’ пуня Индиган’ тобан’, Дагестанхад’ тобэй хасава ӈацекы хасуюдимдей классхана тоходанна, пыда саць пирця ӈацекы. Сими’ манэць ӈудамда марцян’ ни масьтесь, таси’ няӈэн’ сырць ма’’нив’: Татьяна Юрьевна, ӈань’ торова! Я вас поздравляю! Нянан’ тарця сер’ саць сава. Тарця вади’’ намдась, ихинян’ хань маймбцо’ ӈа’’. Мань’ харн’ ӈацекэхэн’ӈод ӈарка вади’’ хэтбим’. Пыдо’ нибтё’ ӈа’’, тарем ниӈговакэм’ тохолку.