Вы здесь

Театрана манзаям’ пэрта

Нянэй ненэця’’ хари’’ культурамдо’ нерня пэрман’ пудана похо’’на ив’ер сырӈа’’. Хавахана намдурць, сэвхана маниесь яханана фольклорный коллектив’’ ханярина ӈадимберӈа’’, тикахад’ театрава таня.

Сидя юкад’ вата по’’ ямбан Няръяна маркана «Илебц» нюбета театрхана сянакода’’ нина’’ манзаи’’ маниева’’. Таняна сянакода’’ нина’’ хари’’ тенз’ культурамдо’ теневана’’, вадамдо’ мэта’’. Ненэцие’’ культурам’ пэртина харто’ явнандо’ ӈэдалёрцеты’’, тикахад’ ӈани’ ян’ ӈод тэворцеты’’. Маня’’ вадава ханярина сосьты’’, нянэй ненэцие’’ культура’ таневам’ тенева’’.

«Илебцхана» сянакода’’ нина’’ пэдова’’, ӈокаювдо’ харто’ манзаито’ пуд репетицияха’ турцеты’’. Хусувэдо’ вадана нерня илевам’, культурава нерня минревам’ саць тарана сер’’ӈэ’ мэ’’ӈада. Ӈодьбянда сянаковась, хыно’’манзь ӈобӈгэв’ ма’’люрцеты’’. Театрхана сянакода’’ поӈгана ӈарка нина’’ таня’’, тикахад’ пирибтяко, наныкоця таняюв турӈа’’. Мал’’ пыдо’ ӈопой серм’ пэрӈа’’. Сиддо’ сававна нядабада режиссер’ Светлана Горностай. Театр’ нерм’ пэртяӈэ’ маля ӈахакуд’ Серафима Петровна Дуркина манзарась. Теда тикы нява пенсиян’ тарпы, манзаравась’ ни’’мэ’’. Пыда е’’эйданда тюку ирийхад’ «Илебц» театрана манзаям’ нерня пэрмандаӈэ’ Надежда Николаевна Талеева таравнда. Надежда Николаевнам’ теневара’’, пыда театрхана ӈахакуд’ сянакусь, вадамда теневана, нямбара не. Тикы нерцю округна толаӈго’ хардахана ӈэрм’ ненэцие’’ отделкана манзарась.