Вы здесь

Выӈгы ям’ теневась

Юр” сидя ю” по’’ тяхана март’ нюртей яляхана Маремьяна Голубкова соявысь. Маня” яханана” юнета хабе”несь. Ӈока яӈгэбцм’, ӈока луца’’ ярабц яӈгэбцм’ илхананда мэпэй. Ӈока вымна ядарпэй.

Печора яха’ нямна, иленита нямна ӈока лахарём’ вадепэй. Николай Павлович Леонтьев пыди’ «Оленьи края» книгахананди’ Маремьяна Романовна’ вади’’ тарем’ падбида: «Любят печорцы тундру-матушку с частым ельником, с мелким березником, с душистым багульником… Много по тундре рыбных озер пораскинуто, и в каждом озере рыба – ключом кипит: в солнечный день глазом видно». Ненэсянда ӈо” тарця ӈэвы. Печора ненэй вадавна Санэро” яхам’ нибе”ӈа. Сенений илхана санарта халяда тяхари ӈока ӈэвы. Ӈудаха”на ня”амва пир ӈэвы. Ленинградхы ФНКС’ студентка ӈэван мальӈгана Ямалхы Находка ӈэсыхына Тусяда Николайхад тикым намдамась. Лаханормами тарцясь: «Ханяд тон? – Няръяна Маркад». «Марл ханяна ӈа? – Печора’ яха’ вархана». «Тикар Саноро” яха. Саноро” ямд теберӈа. Халутта яха». Илхананда Маремьяна Голубкова вымна харта ӈэдалёрпэй ӈэвы. Мэтида нензимдамбава’ нямна пудана вадида тарця: «Хорей на землю бросишь – вся упряжка на скаку остановится». Ӈэрёй тым’ салатамбаванда мальӈгана манзь пэрмы: « Рука будто по бархату катится». Саць мэкадувна не хан’ нямна пыда лахана: «Женщины ненки ездят на особых нартах. Похожи эти сани на диваны, разукрашены особой резьбой, раскрашены в разные краски, и иногда обиты разноцветными сукнами и убраны кистями». Хибя ханзер” мянца, ханамда юйпись. Николай Павлович Леонтьев Маремьяна Голубкованда ня’ «Оленьи края» книгахананди’ яӈгэбцо, луца вадаку падӈаха’. Ненэця’’ вадакоди’’ ӈо” таня. «Тенеко». Тадебярка тэта. Тикы вадаком’ хибя нянда вадецада, тикымда нида хэт”.

Падна”мин Архангельской Н.А.Добролюбовм’ нюбета библиотекахана манапэй”. «Оленьи края», Москва маркы «Советский писатель» издательствохона ёнар’’ хасуюёнар’’ тет ю’’ си’’ивумдей похона падвы книга.

Роза Канюкова падвы