Хаювы си’’ивхана округна’’ этнокультурной центрхана «Истории Тыко» проектм’ минрена’’, ассоциация’ «Ясавэй» манзаи’’ тасламбада’’, тикахад этнокультурной центрхана манзарана’’ нина’’, ӈобнзер’ ма’’люрӈаць

Хэтанзь’ тара, Илья Константинович Вылка’ соя’’махад 140 по’’ ваера.

Ӈарка, мэбета ненэць, яндаха’’на’’ теневана’’ ненэцие’ падтаӈгода, вадако’’, сюдбабц’’ теневана’’ нява’’. Пыда соя’’ма ялянда’ ед ассоциация «Ясавэй» проектм’ хамадавысь. «Истории Тыко» проектадо округханана’’ ваеравы сидндтетимдей проект’’ конкурсхана нерня’ тарпвыць.

Ассоциация «Ясавэй» Совет старейшин’ член’, ветеран педагогического труда Марина Хатанзейской таняна мэвысь. Пыда тарця вади’’ хэтась: «Ельцьхананда ӈадимы, тарана’’ проект’, тарця манзая’’ округна’’ ӈацекехэ’ ӈока несэй ӈамгэм’ Тыко Вылка ил’, творчество’ нямна хэтаӈгу, общественной манзаяхана ныхы’’мамда манэ’’лабтаӈгу. Маня’’ ӈарка нява’’ ӈармдамбива’’!

Тарця проект’ ӈока несэй ӈамгэм’ вадюданана’’ ӈацыкехэ’ минре. Илья Константинович Вылка ил’, Едэй Я’ история’, природа’ нямна хэтна’’; тохолкода’’ няби творческой сер’’ минрена’’ проект’ методической материал’’ маниесь, нерняна харто’ илесь’ ӈэсыхынандо’ тарця мероприятие’’ сертабась мянта’’».

Александр Терлецкой илӈгад мэвы сер’’ нямна лаханась, тарця вади’’ хэтась: «Мань хасава нюни ня’ пивна ядэрць, мурал’ сэвтесь, хасава нюми’ Илья Константинович падта’’мам’ маниесь, хонарку, тикы хибя ? Мань ханзер’’ мян’’ӈав, нянда ваде’’навась. Тарем’ хэтась, Тыко Вылка ил’ тэри’’ тарця ил’ вуни’’ӈа’’, пыда варёмда мэць харта яхананда илевы, ӈокавна манзаравы, ямда сахарамбавы. Тюку ялян’ таслась, пыда иламда вадець, ӈацекы’’ тохолабась тара’’. Ӈацекына’’ харто’ ныхыто’ енась вадюданбато’, ивнандо’ ӈэда сава харвабцодо нерня’ минаць минреӈгудо. Хусувэй ӈацекы харто’ илесь ямда мэнеӈгуда, тохолабӈгуда. Ӈацекы’’ е’’эмня Тыко Вылка’ нямна ӈадимдевы’’ книга’’ тарцям’ минревнда’’».

Несэй проект’ манзаямда ханзер’’ минреӈгуда, тикым нерняна манзаравнда ненэця’’ тасладонзь. Ӈацекы’’ е’’эмня падвы сидя книга’ герой нюдяко Тыко, мал’ материал’’ издательствон’ мимы’’. Книга’ сертабава’’ манзая’’ вэба ирий’ пудана яля’ ӈэсонд минда’’, тикы поӈгана тамна ӈацекы’’ е’’эмня этнопраздник «Вокруг Новой Земли вместе с Тыко» хамадабӈгу’’. Тарця ялядо’ хор’’ ирий’ пудана яляха’’на’’ «Арктикахана» ваерабнанда тараӈгу. Ныланава яляхана 13 тематической интерактивной площадка’’ нэӈгуд’’, тарця манзаям’ ассоциация «Ясавэй» партнёрта’ ня сертаӈгудо’.