Вы здесь

Ассоциациява нерня манзаравнда

Ты’’ саполана ирийна самлянзимдей яӈганя толыркана ненэцие’’ хибяри’’ «Ясавэйм’» нюбета региональный общественный движение’ юдимдей съезд Няръяна маркана ваерась. Тарця ӈарка ма’’лёвахана манзараванзь’ округна хусувэй ӈэсыхыт делегат’’ тоць.

Ӈокханда съездхана самляӈг ю’’ ӈопой делегатась, тикы’ хавна Заполярный районхад, Няръяна мар’ администрацияхад, округна депутат турӈаць. Тикахад’ ӈармбэй хибярина таняць, хуний сидя юкад’ вата по’’ тяхана ассоциациява ӈадимдембава мальӈгана манзараць.

Тюку’ мэвахана ассоциацияна серм’ пэртя нина’’ манзаравамдо’ несэювна хамандадонзь. Ӈэсыхыт’ товы’’ нина’’ сидя яля’’ ямбан манзараць. Нертей яляхана делегатна хуркари’’ встречи’’ мэ’’ӈаць. Округна администрацияхана манзарана’’ няюв’ манзараць, тикахад’ округна депутат’’ няюв лахарёдо’ таняць, Заполярный районхана манзарана’’ няюв ӈани’ ма’’лыць. Ӈэсыхыт’ товы’’ хибярина ваде’’ӈадонзь – хурка тоенана сер’’ пыдо’ илесь’ яханандо’ таня, хурка серкана нядаӈгова таранарха. Хусувэй яхад’ товы’’ хибяри’’ харто’ хонарковидо’ хэтбиць.

Тюку ирийна самлянзимдей яӈганя яляхана культурно-деловой центр’ мякана ассоциацияна съезд’ манзарась. Яля’ ямбан таславы’’ сер’’ тянё ниць’ ӈа’’. Сямянд’ нерде делегат’’ ассоциацияна няхар’’ по’’ ямбан манзаравам’ намдаць, вадам’ мэ’’мы Александр Белугин ассоциацияна президентӈэ’ таранава. Пыда’ пуданда хусувэй вице-президентаӈэ’ таравы’’ нина’’ хэтадонзь: хурка манзаям’ няхар’’ по’’ ямбан тасласа’’. Ӈобкана ма’’лась сертавы’’ манзаядо’ тянё ни’’ӈа’’. Ханяӈы’’ вице-президент отчётдо’ «Ӈэрм’ юн’’» газетахана падвыць’’. Ассоциацияна съездан’ хамякова мальӈгана ревизионный комиссия манзарась. Таняна манзаравы’’ хибяри’’ манэ’’сарӈадонзь: ханзер танеда есьда ассоциациява мэ’’мыдась, ханяхад еся’’ турӈа’’, ханя хан’’ӈа’’.

Ассоциацияна хусувэй ӈэсыхына харта отделенияда таня. Ӈэсыхыд’ товы’’ хибяри’’ лаханаць – ассоциацияна ханзер’’ манзаравам’ хэтаць. Ханяӈы ӈэсыхыт’ товы’’ нина’’ харто’ сертавы’’ манзаидо’ ваде’’ӈаць. Ӈэсыхына илена’’ нина’’ ханзер’’ манзаямдо’ маниедо’, таремъюв’ манзара’’. Нидо’ ӈамгахэва тарана серкана нядамби’’, тикахад’ хэбидя яляхана ӈобкана ныланавам’ хамандабсеты’’.

«Ясавэйна» манзаравахана няхар’’ по’’ ямбан нядаӈговы’’ хибярина ихид’ ӈэда’’ вади’’ намдаць, ханяӈы благодарность’’ ня’’амаць. Всероссийский ассоциацияна медальта таня – «За верность Северу». Тарця медаль’ тюку’ мэвахана сидя хибярива ня’’амӈаханзь, тикы Игорь Николаевич Ледков Красной’ ӈэсыхыд’, Надежда Агафоновна Бобрикова Омахад. Пыди’ ассоциацияна нертей яляхад’ манзараӈаха. Теда ӈод’ пыди’ манзаяди’ пуняна ни’’ мий’’.

Яля’ нябимдей пеляхана съездхана тэранзёва ваераць. Нерняӈы няхар’’ пон’ ассоциацияна манзаравам’ нерня пэртя’’ ненэцие’’ тэрамбиць. Президентаӈэ’ ӈокаюв’ нина’’ Александр Белугин маниеван’ харва. Пыда нерняӈы няхар’’ по’’ ямбан ясавэйдана таравнда. Тикахад’ ассоциацияна самляӈг вице-президентада ӈэӈгу, тамна самляӈг хибярива Советхана манзараӈгу’’; Совет старейшин си’’ив хибяри’’.

Съезд’ ваера. Нерняна ненэциена ив’ ер манзарава ӈате’’. Ханзер хусувэй тэравы’’ хибярива манзаяханда сырта’’, тикахад’ ассоциацияна манзарава переӈгу.