Вы здесь

Хусувэй харта манзаяда

Ассоциацияна съездан’ ӈэ-сыхыд хибяри’’ турӈаць, хуний харто ӈэсынандо’ отделения манзаям’ пэрӈа. Хонгурейхад’ Надежда Аркадьевна Канюкова товысь. Пыда тарця вади’’ хэтась.

Канюкова: Маньзьван’ ихинян саць сава ӈэдарха. Нябимдей съездхана мэм’, тамальӈгана хибяри’’ саць пое’’ларбиць. Теда маниесь: мал’’ ӈобкана манзара’’. Тей’ яля маня’’ администрацияна манзаранаха’’, депутат’’ няюв тэворӈаваць. Хибяна хурка хонарковидо’ таняць, хусувэйва хонаркусь. Мань’ вадам’ мэ’’ӈамась ӈацекына е’’эмня. Маня’’ ӈэсынана школава ӈарка ни’’ӈа, ӈацекына тамна нерня самлязимдей классхад’ тоходанвась Оксинон’ тэворӈа’’. Ныланава яляхана хардахандо’ тован’ харвасеты, яӈга ӈацекы’’ тэволава транспортдо’ яӈгу, харто’ есянато’ турӈа’’. Пуня’’ нерня ӈэдалёрць ирийханда сяӈок еся’’ тара? Мань’ юнрамась: тарця сер’ ханзер’ таслаб’ сава ӈэдакы? Сидя не нюв ӈэдалёрӈаха, еся’’ ӈокавна хан’’ӈа, ирийханда тет ёнар’’ селкой’ тара. Нисянди’ хардахана мэваб’ тамна ханзерков ӈэсьты, харта хосеяӈгуда. Нисядо’ хойхана мэваб’, тикахана хибярим’ пюртан’ ӈацекыд’ ханабнанда.

Ханяӈэна масьты: каникул’ ӈэсонд’ нёя ядэр’’. Ханзер ни’’ ядэрт’, иб’ ӈод саць ӈахана вани’’ӈа’’. Ӈацекына нина’’ тат’’, харто’ хунурта’’. Небянато’, нисянато’ хэван’ тован’ ним’ харва’’, тикахад нидо’ манэ’’манзь хардахандо’ харваӈгу’’ ним’’. Есям’ таиць, тикахана ӈацекы’’ турта’’. Депутат’’ ма’’нисям’: таслаӈгува’’ тарця серм’. Мань’ енам’ няндо’.

Корр: Хонгурейхана ассоциацияна отделение ханзер манзара?

– Янамбовна манзарава’’. Ханяӈы’ мэвахана хэвняхад хибяри’’ тосьты’’, нядаӈгосьтыва’’. Сяӈгова Англияхад’ турӈась хибяри, тикахад Финляндияхад’ турӈась хибяри, Москвахад’ турта’’ таняць. Пыдо’ ӈэрм’ яхана илена’’ хибяри’’ илам’ торомдамби’’. Ӈэсынана илена’’ няюв лаханасьты’’. Маня’’ нядаӈгосьтыва’’, лаханакурць хибяридамдо’ пюрцетыва’’.

Мань’ теда пенсияхана мэм’, клубхана манзаям’ пэрӈадм’. Харн’ группав’ таня. Теда «Сава сё» ӈэӈгу ӈань хамякува’’, хыно’’тава’’, вадаком’ мэтава’’. Хибярина турцеты’’ ӈэй. Ӈобкана малбуй’’ манзарава’’. Енам’, «Сава сёхона» сававна хынотава’’. Вадамдо’ хибярина теневадо’, лаханасьтыва’’. Нертей манзарась’ пябнана саӈго’’восаркась, тедахова савов.