Ваеравы ныланава яляхана Няръяна маркана тыбэртя’’ ненэциена тэхэна’’ ӈэдалёрӈаць. Поӈгнандо’ пирдырӈаць, хибядо’ сямянд мере’’ӈа? Тасламбидось. Ӈокханда сидя яӈганя хан’ ты’’, сидя яӈганя тыбэртя’’.

Тюкумэвахана сиднтет ненэця’’ Саляхад’ товыць, пыдо’ «Нерута», «Вы’ ту» семейно-родовой общинахана тыбэрӈа, Нюдя яхана мюсерӈа’’. Тет’’ хибяри’’ СПК «Харп» тэхэна’’ мэна’’, пыдо’ ӈани ӈарка явна мюсерта’’.

Тюку по’ ваеравы тэхэна ӈэдалёрмахана сямянд меретаӈэ’ Саля’ тер’’ ненэця’’ хаяць. Пыдо’ тыдо’ сямянд мер’’ нявотыць. Нюртейӈэ товы Владимир Геннадьевич Талеев. Тикы’ хасава маля ӈахакуд’ тэхэна манзара. Тыбэрма манзаям’ сававна теневада. Нюдяко ӈэванда мальӈгана хойхана илесеты. Нися’ хасада Геннадий Яковлевич Талеев ӈока сава серт’ хасава нюмда тохоладась.Теда харвась манзаямда «Нерута» общинана минреда, таняна нерм’ пэртядо’ Алексей Николаевич Ледков. Ив’ер манзарана ненэць.

Нябимдейӈэ’ тюкумэвахана Андрей Григорьевич Явтысый тось. Тикы ненэць илеванда ямбан тэхэна мэна. «Выучейской» нювм’ нюбета колхозхана тамна манзарась пядась. Теда «Вы’ ту» общинахана тэхэна’’ мэнаӈэ тара, общинандо’ серу нерня пэртяӈэ’ Ольга Владимировна Явтысая тара.

Нярамдэй местам’ тэхэна ӈэдалёрмахана Николай Алексеевич Ледков ханась, тикы хасава ӈобтарем «Нерутахана» манзара.

Тюку по’ хусувэй тэхэна’’ ӈэдалёрмы хибяри мядонзэй ня’’амась. Теда тыбэртя’’ мякандо’ ӈэдалэйдаць. Нерняна тэтнава ялудо’ мэта’’, тыниць ириян’ тэвынанё’’.