Хаювы ныланава яляхана Няръяна маркана баранхана ӈэдалёрма ваераць. Тарця ӈэдалёрма’ яханана хусувэй по’ танесеты. Маркана илена’’ хибяри’’ тарця ялям’ маля ӈатесетыдо’.

Буранхана ӈэдалёрта’’ ныхыдо’ хормась ма’’лэйдаць. Тарця ӈэдалёрман’ сырмась маркана илена’’ хибяри’’ ӈод турцеты’’. Буранхана не’’, хасава’’, ветеран’’ ӈэдалёрӈаць. Тюку по’ буранхана ӈэдалёрма сер’ невхы тиртя’’ ӈано’’ нулӈгава’’ яхана ваерась. Таняна мяд’ таняць, хуркари’’ палатка’’ ӈокаць. Маркана илена’’ нянэй ненэця’’ ӈод таняюв’ турцеты’’. Тэкоци’’ манэ’’мась, тыбэртя’’ няюв’ лаханакурць, тикы поӈгана буранхана ӈэдалёртаха’ сырта’’.

Ӈока’’ хибяри’’ поӈгана мань’ паным’ мэта некоцям’ сэвтемась, някунда тэвась, лаханась ня’’ӈавась. Тикы некоця Вера Максимовна Бобрикова ӈэвы. Няръяна маркана маля ӈахэт’ иле, харта хардада. Пыда мась: – Ныланава яляхана тюкон’ сырмась томась: тэхэна’’ ӈэдалёртина’’ ханзер’’ ӈэдалёрта’’, ханзер’’ буранхана ӈэдалёрӈа’’. Панэв’ тюку яля’ серамась., ӈахэт’ нивась сербю. Тюку яля’ инян’ мадм’: тарця яляхана панэв’ серхувво’. Харн’ панэв’, неян’ сэдвы. Нянэй нем’ нидм’ ӈа’’? Панэв’ таня, нив’ мэс’’. Мэць нив’ тара’’ хари’’ паным’. Небяв’ Татьяна Васильевна Бобрикова, ӈакуна яӈгумась маля. Сэдорабнанда ёльце ме’’лась, е’’эмнян паным’, савам’, пиви’ сэдась. Тедая’’ лэтбин’.

Педучилищем ёльцемась, воспитательӈэ’ манзарамась. Теда пенсияна мэдм’, тарем ӈод’ тамна манзарам’. Манзара нив’ тара, сянад’ ныхыр’’ таня.

Тамна ӈопой лаханась няв’ Людмила Максимовна Канюкова: Мань Несьхад’ томась, теда ним’ манзара. Канинской выӈгана соявэдм’, мюсерӈамась, тикахад’ вэсаков’ едерӈась, хардана хаиваць. Вэсков’ Канюков Василий Алексеевич, тыбэртясь, ӈахы’’ хабэй маля. Ӈавнанда ӈобкана мюсерӈанись. Теда мадя ӈахэт’ хардана илем’, нюртейхова нинархась сава’’ ӈа’’. Тедахов’ маля торомам’.

Тюку яля’ тюкон’ сырмась томась. Тэна’’ ӈэдалёртаха’ сырӈамась, буранхана ӈэдалёрти’’ маниеваць. Саво, яляда тюку яля’ сава, нянэй нарэй ялякоця. Иба, хаяр.