Вы здесь

Ассоциацияна ма’’лёвахана

Россиянана толырто тянё ненэця’’ ханярина иле’’. Тарця хибярина сидя ю’’ няхар’’ по’’ тяхана Российский ассоциациям’ ӈадимдець. Таняна манзарана’’ нина’’ ӈэрм’ тенз’ ненэцие’’ хуркари’’ серкана нядамбава е’’эмня сертавысь.

 

Ӈадиманда мальӈгана ассоциациява тарем’ нюмдевысь – «Ассоциация народов Севера СССР», тамальӈгана сидя ю’’ мат хуркари’’ тенз’ мэта хибяри’’ таняюв ма’’лыць. Тарця ассоциацияна’ нертей президентаӈэ’ Владимир Санги хаясь, нивх’ тенз мэта хибяри, паднана. Тюку’ мэвахана ваеравы съездхана пыда сита Почетный президентӈэ’ нюмдець.

Ёнар’’ хасуюёнар’’ хасуюр’’ няхарамдэй по’ нюдя’ пэвдэй ирий сидя ю’’ няхарамдэй яляхад’ ассоциациява несэювна нюмдембива’’- теда нюмда тарем’ со: общественно-политическое движение «Ассоциация коренных малочисленных народов Севера, Сибири и Дальнего Востока Российской Федерации.» Пудана мат яӈганя по’’ ямбан асоциацияна президенаӈэ’ Сергей Николаевич Харючи тарась.

Тюку ялян’ таслась ассоциациява тет ю’’ хуркари’’ тенз’мэта ненэцие’’ ӈоб’няюв пэрӈа. Ӈокханда сидя юр’’ самляӈг ю’’ сидндет юд’ мян хибяри’’. Хусувэй яхана илена’’ толырто’ тянё ненэця’’ харто’ илесь яханандо’ региональный няби этнической объединениидо’ таня. Россиянана няхар’’ ю’’ тет тарця объединение’’. Хусувэй тет по’’ ваерась ассоциацияна съезд’ ваерасеты, таняна хуркари’’ яхад’ товы’’ хибяри’’ манзаравидо’ таслабсеты’’. Тюку’ мэвахана Российский ассоциацияна си’’ивумдэй съезд’ Саля’ хардахана ваерась. Хуркари’’ яхад няхар’’ юр’’ мат ю’’ делегат’’ тоць, пыдо’ малӈэ’ ӈарка ма’’лёвахана манзараць. Тикы’ хавна съездан’ хамы’’ хибяри’’ ӈокаць. Сё’’ мэта’’, тарана’’ коллектив’’ таняць, хуний сомбой программам’ манэ’’лабтаць.

Съездава сидя яля’ ямбан манзарась. Нертей яляхана Ассоциацияна тет по’’ ямбан манзаравам’ Сергей Харючи ваде’’ӈадась. Пыда вадахаданда ӈади’’ хурка серу’’ общественно-политической организациява сертавысь. Хурка тоенана’’ сер’’ хурка яхана таня, ханзер тарця серу’’ тасламбидось. Ӈока вадам’ президент Закон’ нямна хэтбись, хуний ӈэрм’ тенз’ ненэцие’’ е’’эмня манзара’’. Ревизионный комиссия харта отчетамда тэврась, таняна манзаравы хибярина хэтадось – хибя’’ ассоциациява есяхана нядамбидо, ханя есьна хан’’ӈа’’. Тикахад’ хуркари’’ яхад’ товы’’ ненэця’’ лаханаць. Пыдо’ ӈарка ассоциацияна манзаравам’ ваде’’ӈаць. Съезд’ нюртей яля нябимдей пеляхана делегат’’секциямна манзараць, ӈокханда си’’ив секциясь. Нюбедо луца’’ вадавна тарем’ со’’: 1. Состояние правового обеспечения жизнедеятельности коренных малочисленных народов России. 2. Вопросы экономического развития и поддержки общин. 3. Образование и родные языки. 4. Духовное и культурное наследие. 5. Молодёжь, здоровый образ жизни и спорт. 6. Социальная защита, пенсионное обеспечение и охрана здоровья. 7. Вопросы природопользования и экологии. Взаимодействие коренных народов и промышленных компаний. Хибя ханяна манзараван’ харвась, таняюв хаяць. Хусувэй секцияхана манзаравы’’ рекомендациидо’ падаць, хуний тикахад’ съезд’ резолюциян’ еримяць.

Яля’ пэвсюмбы пеляхана Ассоциация координационный Совет манзаям’ пэртина, Совет старейшин,молодежный организациям’ манзаям’ нерня пэртина’’, Союз общин федеральный тикахад региональный власть манзаям’ пэртя’’ няюв’ лахарёдо’ мэ’’ӈаць.

Март’ ирийна сидя ю’’ хасуюдимдей яляхана съезд’ тамна манзарась, тикы яляхана нина’’ тэранзюць. Тикы нямна вадин’ тамна танеӈгу.