Вы здесь

Сюдбя Хэтанзи

Я’малкана илена не Н.М.Янгасова ненэцие’’ вадако’’, сюдбабц’’, ярабц’’ ӈобт ма’’лась книгаӈэ’ сертавыдась. Тарця книгада сидя ёнар’’ нюртей похона тарпыць. «Сюдбя Хэтанзи» сюдбабц’ ӈод тикан’ еримысь. Ярабц’ пелям’ тамна толара’’.

Няхар’’ ю’’ хасава, теда’ нянда’’тэд маноӈада’’. Няхар’’ ю’’ тым’ ханани пуня’ пэнъян. Пэё’’махадани, Ӈарка Санэре’’э манзь ханада: – Теда’ мякана мэхэва’’.

Едава’’ ӈамава’’. Ӈаво’’махадана’’ Ӈарка Санэре’’э, тэта Санэре’’э манзь ханада:- Сюдбя Хэтанзи, ӈылека ӈэвар я’ нимня няни тэворӈа. Няхар’’ ю’’ луцами ё’’ тер выдара’’мам’ теда’ мэйдава. Мань яханани луцаркадма, теда’ Лобалка луцами таня. Лобалка луцани няхар’’ юр’’ луца выдара’’ма – ёнар’’ пуд пэ, иласяда маняпэда таня. Тикым’ илаин, Сюдбя ӈэвамд, ӈылека ӈэвамд тандая’ савовна манэтава’’. Тикым’ илабат няхар’’ юд’ тым’ ӈани’ татадм’.

Мань мадм’: – Ӈарка Санэре’’э, тэта Санэре’’э, ет’ ханзер’’ ӈэӈгуди’. Сяха’ вэдендортадм’? Пыда ма: – Хуняӈы яля’ хэрись пяӈгува’’. Луцина’’ ӈод’’ ханаӈгува’’. Мякани хаядм’. Няхар’’ ю’’ тэми мякани тэврэйн. Тиканда мат’’ ю’’ тэдами хая. Едава ӈамав. Хонэйв’’. Хуняна юркыв’’. Едами ӈаво’’махадани ӈани’ емб’’толыв’’. Тикари’’ паны’’ нинякы’’ ӈа’’, несэй серыбадакы. Емба’’со’’махаданда манзь ханада: – Сидя нюн небя, теда’ ембъяда’’. Ӈарка Санэре’’э’ мят’ теда’ хандава’’. Тикахад Лобалка луца’ мят’ пяӈгува’’. Ӈобкана хэхэва’’, пуна ханамда’’ ӈод’’ пуня’ татадама’’. Тикари яхад салами хадри’ сяха’’ ӈэвна. ( Сёда ӈани’ хэӈгада).

Ӈарка Санэре’’э’ мя’’амна мэва’’. Ӈарка Санэре’’э мале хэвы. Юнорка хабтава’’ сехэрэнда мю’ ха’’аврава’’. Ӈаводы пон’ маня’’ нива’’ мий’’. Лобалка луцани хэхэ’ мядо’’ мал’’ епсяндрев’ яралавыд’’. Лобалка луцана’’ нё’ хэван’ нультава’’. Хабте’’эни иням’, сяйм’ иням’, нё’ ня’’морцянд’ няхар’’ пало’’ӈав.

Мань тарем’ мадм’: – Тахабя тэвына’’.

Сидя нюн небя сырида яӈга’’ӈа. Нюхуюда ха’’авра. (Сёда тамна миӈа). Харад’ няю’ маня’’ ялъяна’’. Сидер’ сивня тарем’ сырпа’’ни: Лобалка луцандо’ хэван’, Няхар’’ Санэре’’э ӈобт’ ӈамдавыд’’. Сидер’ ӈылана, ӈэтна паря’ ниня иласяда маняпэ, пэ танявы. Пэ мандалта, сей’ тордаб’’: няхар’’ юр’’луца’’, луца’’ я’’амавы’’. Ядавани сер’ няби ӈарка пеми ӈыламнанда ӈэдарав. Няби пени’ ӈабкахалкая ӈэвакони нимня няхар’’ паӈгабтава’ паӈгабтав. Тетимдейхана ӈэвакони нимня нумд’ пидев Пу’’лё’’ тяхамлабтав. Лобалка луцани мякад ӈадимя. Няхар’’ юр’’ луца пумнанда ӈани’ ӈадимя’’. Иласяда пэм’ яля’ ямбахана тэри ӈатедо’. Няхар’’ Санэре’’э пэм’ ӈате нялидо’ няӈгары’’. Ӈэрёй яляна’’ пакалць, пэ’’я сэван’ ӈадимя. Маниеб’’нани неры ӈо’’маханда пэ ха’’мота. Нянзавэй мадм’: – Неры ӈэсь ямда нирва тахабта’’.

Тюку яля’ толавы’’ сюдбабцянда малда тамна ни’’ӈа. Ӈани’ пелямда ӈани яляхана толаӈгура’’.