Вы здесь

Сертавы манзаяда ӈока’’

«Ханебцёход’» сава вади’’ намдась, мядонзэйм’ ня’’амась

Тюку ирийна нертей яля’’ пиркана Няръяна март’ Мария Яковлевна Бармич турӈась. Пыда ассоциацияна съездхана манзарась. Таняна харта вадида мэ’’ӈась. Тикахад’ округна толаӈгова мякана ӈэрм ненэцие отделкана манзарана’’ няхаюна’ Мария Яковлевна няюв’ ма’’лёвам’ хамадаць.

 Хусувэй хибяри’’, хуний тамбир’’ ӈарка тохолкода няюв’ лаханорман’ харвана таняюв’ турӈась. Сясхад’ вата пир’’ Мария Яковлевна Бармич няюв’ лаханарӈаваць. Наукам’ минрена нява, тохолкодина’’ тохолкодава илеванда ямбан харта вадамда сахарамбада хибяри. Пыда падвы’’ книгида тет юкад маля ва’’ӈа’’, поӈгнандо’ хуркари’’ учебник’’, учебной пособия’’, методической литература’’, словарь’’, наука’ нямна падвы’’ манзаита’’ толыр’’ юр’’ тет’’ ю’’. Мария Яковлевна саць мэбета нява. Хари’’ вада нямна хамадавы вадида’’ хуркари’’ ӈарка’’ ма’’лёвахана мэцьтыда. Пыда’ ида маня’’ вадана нерня танева’’, илева’’ нямна теда саць няркна. Пилибт’ ибедорцеты: ханзер’’ вадам’ нерня минревам’, тохоламбавам’ сертаб’ сава ӈэбнанда.

Сидя ёнар’’ самлязимдей яӈганя похона тохолкодана сидя ӈарка манзаямда манэ’’ӈаваць. Сидя словарьм’ ӈокаювна мядонзэйӈэ’ няданда ня’’амаць. Мария Яковлевна Канин’ выӈгана соявы, вадювы, тикы явна ӈока’’ мюсермы. Небой’ по’ ты ниць ирий’ си’’ивумдей толыркана Мария Яковлевна небя’ хасанда юр’’ пода панысь. Илеванда ямбан небянда’ вадам’ минреда, тенеда, лэтбида. Небямда тензебтембаван’ Мария Яковлевна Канин’ вабц вади’’ словарьм’ падась. «Неян’ вада вабц» тарем’ нюмдедась. Хамандёда словарьм’ ӈудахата сидя ёнар’’ самлязимдей яӈганя по’ ты ниць ирий си’’ивумдей толыркана  ня’’амбидась. Тарця сер’ ихинянда ӈарка маймбцо.

Тамна хаювы’ похона «Русско-ненецкий словарьда» тарпыць, таняна сидя ю’’ ёнар’’ вада’’ ма’’лавы’’. Тарця  манзаянда’ тер’’ Мария Яковлевна  илеванда ямбан ма’’лабидась. Словарь’ ӈадимахана  «Научный центр изучения Арктики» ГКУ ЯНАО нядаӈгусь, есям’ таняна ховыць. Маня’’ округхана тарця словарь’ тамна ниць’ тэв’’. Валакада библиотекахана хова’’ пир’’. Тарця словарь’ саць тара’’. Округханана есям’ хобнандо’ тикахана тарця манзая’ яханана тэвӈгу’’. Саць енава’’.

Ма’’лёва мальӈгана Роза Ивановна Канюкова нянда нямна тарця вади’’ хэтась: -  Юнета профессорма’’ Мария Яковлевнава’’ ӈацекы’’ е’’эмня сертавы книгида ӈока’’, тикы’ книга’’амна школаханан ӈацекы’’ тохоламби’’. Теда’ юнета  тохолкода’’ тохолкодава’’ саць тарана словарьм’ серта. Тарана вади урок’ е’’эмня таняд’ мэва пир. Маня’’  хар’’на’’  вадава’’ сахарамбдаӈэ саць тарця  книгам’ ӈарка мядонзэйӈэ толабива’’. Ненэця' вадам' минрена тохолкодаха’’на тарця книга сава нядаӈгода ӈэӈгу. Мария Яковлевнахана’’ саць ӈарка вадам’ хэтмбидм’! Ӈоб’’ нерня’ книга падбю’’, ябда, сензувна сибяцювна  илевар миӈая.