Вы здесь

Варёмдо’ мэць мюсерӈа’’

Леонид Иванович Худи Ямалкана соявы ненэць, паӈгуда ты’’пэртяхат’ пере’’. Ӈодьбянда ты’’пэрма серм’ саць савовна теневада. Тарем’ еримбнанда пиликов’ хой’ няку тэворцеты.

Маля ӈахакуд’ Леонид Иванович Ямалкана мюсерта’’ ненэциета няюв ӈобнзер манзаямдо’ минредо’. «Союз оленеводов Ямала» мюсерта’’ ненэцие’’ е’’эмня сертавы’’, тикы Союз’ ӈэвахана мэнаӈэ’ Леонид Худи’ тара. Пыда няюв тарця лахарёми’ танясь.

Худи Л.И. – Маня’’ яханана мюсерта’’ ты’’пэртина сава, ӈавхы илдо’ мэ’’ӈа’’. Тарем’ таслась ӈавхы илӈгад’ нерня хаява’’ма’’. Ненэця’’ нисяндо’, небяндо’ ил минре’’. Ханзер пыдо’ мякана илеса’’, тарем иле’’. Мядудо’ таня, ӈацекыдо’ таня. Пыдо’ ты’’ илӈгана иле’’, илевамдо’ ӈоб нерня минредо’.

Тюку яля’’хана ӈока ненэця’’ тюкон’ тэвыдаць, няни’ турӈаць. Ӈобтарем’ тоенана’’ серудо’ ним’ ӈадимбер. Ханяӈыт’ тэда тянё, пэдарахана ним’ иле’’ ӈань. Ӈопой ненэць турӈась, ма’’нив: мань няхар’’ юпой тэми’. Нябиюм’ ӈань выӈгана иле, ма’’нив: мань’ няхар’’ юр’’ тэми’. Ханяӈы ненэця’’ тыдо’ ӈока. Пэдарахана илена ненэць пысэй таӈок тэн’! Ма’’нив: мань сяха таӈок тэв’ ӈэӈгу?

Корр: Пыдар’ харт яхананд «Союз оленеводов» серм’ пэртян’, хоян’ тэворцетын’, ты’’пэртя’’ ненэцие’’ няюв мюсерцетын’?

- Ты’’пэртина няюв’ ӈоб’ тэвор’’ нивам’. Теда нара нив’ ӈа, ты’’ пэртина хэбидя ялям’ тикахана мэ’’ӈаванё. Ненэциена няюв ӈока тарана серу’’ тасламбива’’. Тасалкува’’: ханзер нерня манзараӈгу’’, илеӈгу’’. Тикахад’ ханзер нарамдо’ мадаӈгудо’. Ханзер ӈэрё някуна тыдо’ пуня тэвраӈгудо’. Ӈокаюв’ пелявадо’ лаханакурмана мальӈгана лаханорцеты’’. Ханяӈэна хонаркосьты, теневаван’ харва’’ ӈани’ яхана мюсерта’’ ты’’пэртя’’ ханзер иле’’, тыдо’ ханзер пэръядо? Тад нерня тарем’ тасламбива’’: ты’’пэртина ханярина илебнандо’ ӈод, Няръяна мар’ ӈэя, ӈоб’ Саля’ хард ӈэя., Таймыр ӈэя ӈобняку тэворпато’, нито’ ил’ манэта’’, нидо’ манэ’’та’’.

Ты’’пэртя’’ ма’’лабнадо’ масьты’’: такы нина’’ ханзер иленакы? Сэвхана манэць нидо’ теневабнандо’ нив’ тара’’. Невхы похо’’на няхато’ тэворцетынё, хубта ӈэбнанда’ӈод. Нянда мят’ тэвӈгу, тикахана илеӈгу, мюсерӈгу. Тикад’ нив’ манд’: ти, нина’’ тарем’ ядэрӈа’’.

Корр: Хурка тоенана сер’’ ты’’эпэртя илӈгана таня, ханзер’ пыдара яхананда ервуда мюсерта’’ ненэциеда нядамби’’?

- Маня’’ ӈокаюв’ пелявадо’ хадырма ядо’ тянёрка. Тарем’ округханана программа’’ манзара’’, тарця программа’’ мюсерта’’ ненэцие’’ нядамбава ед’ сертавы’’. Яханана хойхана илена’’ нина’’ мято’ терсавэй мюсерӈа’’. Хардан’ тэвормадо’ тянё ӈэсьты’’. Валакада нарэй някуркана сывы мюсерць яхад’ таӈы’ ян’ ямдовандо’ мальӈгана хардан’ тосьты’’. Ӈаврадамдо’ тэмдаӈгу’’, школахана тохолкурта’’ ӈацекыдо’ вэдонда; ханзер’ тохолковамдо’ хонраӈгу’’. Тикахад’ тарана’’ падродо’ сертаӈгу. Ниня’ пон’ хардан’ тобнандо’ сертавдадо’ тянё нисьты’’ӈа’’.

Таремъюв’ нина’’ иле’’, варёмдо’ мэць мюсерӈа’’.