Вы здесь

«Пунушка» то’

«Пунушкам’» нюбета журнал’ этнокультурный центрхана манзарана’’ нина’’ маля юдимдей по’ ямбан сертамбидо’. Тикы ӈацекы’’ е’’эмня сертабада манзая’. Нина’’ тикахана ненэця’’, луца’’ вадавна падна’’.

Сидя ёнар’’ си’’ивумдей по’ саво’ ирийхана журнална’’ нертей номерм’ манэ’’ӈаваць. Тикахад’ похона сидямэвна тарпурӈа’’. Журнал’ сертабавахана маля’’ ӈока’’ хибяри’’ манзара’’. Тюку по’ ӈод «Пунушкава» нерня миӈа’’. Сидя ёнар’’ маттамдэй’ яӈганя по’ нертей ӈадимы номер’ ня’’амаваць. Ты’’ сие ниць’ ирийна сидя ю’’ синдтетимдей яляхана журнал’ презентация’ этнокультурный центр’ мякана ваерась. Хусувэй таня’’ товы хибяри мядонзэйӈэ’ журналм’ ханась. Няха’’на, ӈарка вада!

Ӈамгэм’ журналкана’ сидя ю’’ самлязимдеймэвна тарпвахана хоӈгуда’’? Ӈамгэм’ нина’’ падби’’? Ӈока’’ ӈамгэм толаӈгуда’’. Тикахана ненэцие’’ хобцоко’’, вадако’’, стих’’, сёкоця’’ хоӈгуда’’. Хурка’’ конкурс’’, фестиваль’’ округханана ваераса’’, тикы нямна падвы’’ манзая’’ таняна таня’’. Ты’ хобакоход’ ханебцём’ сертась сидда’’ Маргарита Латышева тохолаӈгу. Вэра хадара’ «Тыськотва» сянакохона сянакось ӈацекы’’ тохолаӈгу’’. Ханзер’’ ненэця’ Холгов’ ӈон’ илевась тэввыдаць, тикы сер’ нямна ӈод падвы манзаям’ толаӈгуда’’.

Едэй ӈадимы журнал’ округна школаха’’ тэвӈгу’’, тоходанна’’ ӈацекы’’ мядонзэйӈэ’ журналм’ нямгудо’, округна толаӈго’ хардаха’ ӈод тэвравы’’ ӈэӈгу’’.