Вы здесь

Нянэй мякана илена

Маня’’ округханана си’’ив ёнаркад’ вата нянэй ненэця’’ иле’’, таӈок хибярихит’ валакада ёнаркад’ ватава хойхана мюсерӈа’’. Тарця хибярина вымна мюсерць’ тэхэ’’на’’ манзара’’. Хасава’’ тыбэрӈа’’, нехэд’ мяд’ манзая’ пере’’.

Нянэювна мюсерта’’ хибярина Канинхана таня’’, тикахад’ Ӈарка явна ядэрӈа’’. «Ямб’ то» общинахана илена’’ нянэй ненэця’’ невхы тотрев’ илевамдо’ минредо’. Пыдо’ варёмдо’ мэць иле’’, харто’ тыдо’ лэтби’’, харто’ иламдо’ таслаби’’. Хибяхартан’ нись’ ена’’ явнандо’ мюсерӈа’’, нянэй мякана иле’’, нюкцидо’ вадаби’’. Нянэй ненэця’’ ватовна хусувэй серудо’ таслаби’’. Валакада тыто’ хадырць’ ядо’ тянёрка, тыто’ толыр’’ нив’ вадюдан’ ӈани. Тарця сер’ нид’ ханяӈы’’ ненэця’’ общинахад’ тарпась колхозан’ тэввыдаць. «Ямб’ тоход’» тарпвы’’ ненэця’’ теда Каратайкахана таня, тикахад’ «Рассвет Севера» сельскохозяйственный кооперативхана тыбэрӈа’’. Сян’ по’’ тяхана « Ямб’ тохона» харта тыда’’ пэрць Александр Лаптандер илесь, тыда’’ тянё ниць’ ӈа’’. Тикахад’ пыда нюсавэй ӈани’ ян’ ямдавыць. Петам’ нюбета хасава нюда тедая’ Харута’ няна мюсерӈа’’. Неда Мария Николаевна Лаптандер. Няръяна март’ турманда мальӈгана лаханась ня’’ӈавась. Харта нямнанда тарця вади’’ хэтась: -  Мань’ «Ямб’ тохона» илевамась, таняна хаюпа хаямась. Теда ӈани’ Харутахана илем’, хардув’ таня. «Рассвет Севера» колхозан’ тюваць, тына’’ таняюв’ тэвраваць. Хар’’на яханана ява’ тянёлэяць, нядэйда тянё’’. Ӈодьбянда таняд’ хаяваць. Тедахова савов’, сыва’ пэдара’’ яхана илева’’, пява’’ тэворӈа’’. Та’ ёльцяӈгана яв’ няку мюсерцетыва’’. Тюку яхана нядэйда’ сава, тэкоцяна’’ ӈаврада тэворӈа’’. Нюн’’ маля ӈарка хибяри’’, ханяӈыдо’ манзара’’, нюдякоюн’ Каратайкана тоходана’’.

Хойхана мюсерта хибярина хаӈгулась Няръяна март’ лекарь мят’ турцеты’’. Тюкохона теневана нидо’ някундо’ турцеты’’. Невхэна Серафима Петровна Дуркина, Матрена Ивановна Талеева «Ямб’ тон’» манзаравась ӈэдалёрцетыхы’, таняна мюсерта’’ ненэцие’’ та’ ямбан тохолабсетыхы’. Тарем’ торомдавы’’ ниди’’ маркана ядтабсетыди’. Тарця няхаюта’ нямна Мария Лаптандер мась: - Тюку няхаюн’ мань саць со’’ теневын’, пыди’ тохолкодаха’, нянана илесеты’’ хоян’ турмандо’ ёльцяӈгана. Сидна’’ тохолабсеты’’, нядаӈгосеты’’ хусувэй серкана. Маля ӈока’’ по’’ хаи’’. Теда манэ’’ӈаюн’. Выӈгана мэсьтыхы’.

Матрена Ивановна теневана нянда’ нямна тарем’ лахана’’: - Мань Мария Николаевна мякна’ мэмась. Хой’ илевава’’ юрвэва’’, нянана’’ саць вэвась.

Тарем’ торомдавы’’ хибяридо’ тянё ни’’ӈа’’. Няръяна март’ хойхана мюсерта’’ тобнандо’ маня’’ няхаюна’’ някундо’ ядсеты’’. Лаханась нятыдо’, ӈуда’ теркодамдо’ тэврасьты’’.