Этнокультурный центрхана ненэцие’ отделкана манзарана’’ нина’’ хуркари’’ ма’’лёви’’ хамадабсеты’’. Тарця ма’’лёваха’ хибярина маля торомбэй, харвась турцеты’’. Таняна ӈока’’ ихиня’ сомбой, несэй ӈамгэм’ хибярина намдсеты’’, манэ’’цеты’’.

Теда маня’’ нина’’ «Мяднтеран’ вада» – «Родной язык в моей семье» семейный турнир’ хамадаби’’. Тарця мэкад’ мероприятие’ маля хамады, валакада маркана илена’’ нидо’ культура серм’ минрена’’ нина’’ ма’’лаӈгудо’. Тарця ма’’лёва хурка ӈэвась’ мэ’’, ӈамгэм’ таняна нина’’ манэ’’лабтаӈгу’’? Хурка серкана мяд’ тер’’ нина’’ пирдырта’’?
Тены’’ похо’’на маня’’ округханана илена’’ нянэй ненэцяӈэ’ тарця илан’ тэвына’’ – хари’ вадава юрбива’’, хари’’ вадавна лаханана’’ хибярина тянёмдана’’. Иб’ ӈод ӈацекына школахана тохолабина’’, иб’ ӈод радиона’ вадава со’’, иб’ ӈод газетахана страницава таня, иб’ ӈод хибяхова’’ ненэця’ вада курсхана вадам’ тохолабван’ харвани’ тохолабсеты’’. Валакада тарця серкат’ ӈамгахэрт’ ни’’ сояӈга. Хусувэй по’ вадам’ теневанина’’ тянёмдана’’. Культурам’ пэртя нина’’ ӈод вадана нерня илевам’ харто’ хамадавы манзаяханато’ манэ’’лабтабидо’. Тюку ирийхана «Мяднтеран’ вада» ма’’лёвам’ хамадаби. Таняна мяд’ тер’’ хибяри’’ ма’’лаби’’, хуний харто’ мякнандо’ вадамдо мэ’’ӈадо’, харто’ лаханана’’, ӈацекыдо’ тохолаби’’. Маркана ӈод’ тарця хибярина таня’’, хуний харто’ вадамдо’ мэнедо’, теневадо’, тю’’у пэрӈадо’. Тюкумэвахана ваеравнда ма’’лёвахана тет’’ мяд’ тер’’ манэ’’тава’’, хуний хамандавы манзаянато’ ваде’’тадо’ – ханзер’’ хари’’ вадамдо’ мякнандо’ мэ’’ӈадо’, нюдо’ ханзер’’ тохолаби’’, ӈамгэм тикы е’’эмня сертаби’’.
Тет’’ мяд’ тер’’ теневанамдо’ манэ’’лабтабаӈгу, пыдо’ малӈэ’ маркана илена’’. Маркана манзара’’, нюдо’ вадаби’’, паӈгудо’ тене’’, вадамдо’ мэне’’. Тетхад’ няхарто’ Канин’ выӈгад’ перена’’, не’’, хуний таняна сояць, вадыць, хой’ илӈгана илевы’’. Таняна мюсета’’ хибярина тенад’ хари’ вадамдо’ мэ’’ӈа, нюдо’, нюто’ ню’’ вадамдо’ намдурӈа’’. Тикы Маргарита Васильевна Мирова, Маргарита Егоровна Латышева, Людмила Елисеевна Канюкова. Нюдя я’ тер не’ Вероника Ивановна Талеева, пыда ӈани хари’ паӈгуда нерня минресь иле, нюкцида хари’ вадан’ тохолабида, харданда’ хэвхана нянэй мядеком’ мярвысь. Таня’’ хусувэй харвана ӈацекэхэ’’на тось серо’’ӈа, хусувэй товы хибярим’ мякнандо’ маймбась ядтабидо’. Тарця конкурс’ тюку ирийхана ваераӈгу. Маркана иленаӈэ’ таняюв’ тоида’’, мэкад’ ӈэӈгу’’.