Вы здесь

Анатолий Иванович’, юнета тохолкодава’’

Сидя ӈарка тохолкодаха’ / фото из открытых источников

Анатолий Иванович Рожин – ненэця’ букварьм’ падбэй,  тохолкоди тохолкодась

 Перевод на ненецкий язык

Ӈока тарана ӈамгэм’ сертабэй:  сайнормахана мэбэй, учебник’ падбабэй, тохолкобэй.   Анатолий Ивановичм’ округханана’’ ӈока’’ хибяри’’ теневадонзь,  тенедо’.
 Маня’’ сидна’’  Анатолий Иванович  педучилищахана ненэця’ вадан’ тохоламбись.  Урокханана’’ маня’’ саваривна манзарасетыва’’: лаханакосетыва’’,  толаӈгосетыва’’, паднасетыва’’, диктантм’ падбасетыва’’, падтаӈгосетыва’’.  Вэваковна манзарани тохолкодава’’  хэнзетыда.
Анатолий Иванович - ирт’’ лаханана хибярись, ханяӈэна вымна ӈэдалёрмамда вадецетыда, манзеты: - Мань выӈгана ненэця’, ӈысма’ вадавна   хусувэй хибяри’ ня’  лаханасьтыдм’.  Маня’’ пысамбасетыва’’, тохолкодава’’ ибкава  ненэй луца, саць сававна ненэця’ вадавна, ӈысма’ вадавна  урокха’’нана лаханасеты. Сайнормам’  сяхаӈгарт  няна’’ нисетыда  вадес’’. Сейхананда тарцям’ вадець евакы, ханя’ е.
Ӈопой’  мэва  тохолкодава’’ Симан’ ня’  няни’ мась: - Ямал’ няд учёной Лабанаускас то, ненэця’ вадам’ тохоламби, падаро падби. Пыдари’ тикым’ нядари’, падвыда толэйди’, ханяна тарабта сававна сертэйди’, падыди’,  яля’ ямбан’ хэвхананда манзараӈгуди’. Урокхат  сидди’  директор ӈэдарась. Хув’ гостиницан’ хаяди’, таняна манзараӈгуди’.
  Хувы’  ӈаворма’ пуд мани’ гостиницан’ хаяни’, Лабанаускасм’ хоми’. Пыда падрода няни’ тайда, харта ӈани’ серо’’мананда  хая. Ти ят’ мани’ падро’ толабини’, ханзер’’ тара сертабини’. Лабанаускас ӈоб’’ яӈгу.  Мани’ малейни’, пэдэйни’, пудана падаро тэри’’ тарем’ нись харва’’ манасаръяни’. Мань Симахан’ мадм’: - Мэсь ӈэя, ханзели’’ сертахани’, пыда сабе нида хадамбю’’, харта яхананда  тарабата сававна сертаӈгуда. Ӈаворманзь хэхэни’. Падаро хаейни’, общежитияхани’  сяйманзь хаяни’.

Хибярим’ тэмбараба ни тара.

Няби яля Анатолий Иванович сидни’ кабинетханда хаӈа, ма: - Лабанаускас сидди’  савуӈась,  падрода нян  манэ’’ манзь тайдась,  мал’’ толэйнись, тасламинзь, пудана падроди’  пыдари’  тэри’’ тарем’ сертавыди’, пэдавакыди’. Тарем’ вэва, хибярим’ тэмбараба ни тара. Учёной тарана серм’ сертамби. Ӈани’ мэва тарцяди’ нёиди’ ӈа’’.
 Мани’ мунзини’, сядоларэйни’.  Хамадами’ Лабанаускас ӈобтарем’ Анатолий Иванович тоходанна ӈэвы. Падвыда тохолкодахана’’  ма’’нэманзь тавыда.
 Тоходанвава’’ нерня’ миӈа. Маня’’ маймбива’’ валакада  тохолкодава’’ ӈэӈгува’’.  Тохолкодава’’ ӈани’ сидни’ кабинетханда хаӈа, ма: - Едэй букварьм’ сертаба пядм’. Ханяӈэ рассказ’’ едэйвана серта тара’’. Си’’ым нядаӈгуди’?. Мань елелава’ хардув  пыдара’’ общежитиянда’  хэвхана  ӈа, нев’ Лидия Григорьевна, ӈобтарем’ тохолкода, нюртей школахана тохолку.  Пыда  сидди’ ӈатеӈгу, сяйлабтаӈгу, сертавнда падаро манэ’’лабтаӈгуда, ӈамгэм’ серта тара хэтӈгуда.   Манзаян’ пуд’ мань манэ’’тын’’.
 Мани’ маймба хардаханди’ ядсетыни’. Ненэйвана сававна манзарасетыни’, рассказ толасетыни’, ханзер’’ тара падсетыни’. Лидия Григорьевна  - сей лимбяка не,  харта манзаяда ӈока,  тарем’ ӈод’’ сидни’ ябцавы няньхана, хампетсавэй  сяйлабтасеты.  Ныланамахад ӈани’ манзара пясетыва’’.  Маня’’ мале няхарамдэй курсхана тоходанаваць.  Нара’ ӈарка ма’’лёян’ сидна’’ ма’’лаць. – Анатолий Иванович  няби Матрена Андреевна  педучилищахана манзаравамди’ ёльцеди’, -
тарем’ педучилищана’’ ӈаркта’ Ананий Иванович мась.  Маня’’ ина’’ вомаць, хасрёна ябтаць.  Анатолий Иванович ёненась: – Ти тохолкода няв, Матрена Андреевна ярӈа, тамна манзараван’ харванакы’’. Харта ӈобтарем’ ида вэвась.

Тенад’’ учебникда’ мэ’’ян

Мань мале тохолкодаӈэ  ненэцие’’ школа-интернатхана нябимдей по манзараманзь. Тохолкода’ ма’’лёяхана  ненэця’ вадам’ минрена тохолкода’  (учителя начальной школы округа) ма’’лэйдаць.  Тикы’ ма’’лёяхана  тисьдана  Анатолий Ивановичва’’ лекциям’ толабись, ӈани’ тохолкусь.  Мань тарця сидяӈган’  таня’’. Тикы’ ма’’лёян’  книга (учебник)  падбада Елена Григорьевна Сусой  Ямалхад  турӈась.
Анатолий Иванович  ненэця’  букварянда’  хавна тамна ненэця’ вадавна’ ӈэда учебникда нюртей, нябимдей класс’ е’’эмня, методической пособияда тикы’ учебникта е’’эмня  сертавыда таня’’.  Мань тенад’’  тарця тарана учебник манзаяханан’  мэ’’ян, таняд’  рассказм’,  стихотворениям’ урока’’ан’ е’’эмня пэрӈадм’. Анатолий Иванович   учебникмана,   мань хамадав’’,  вадам’ ехэрана ӈацекэхэ’’на  сиби манзарась.  
Ӈока’’ по’’ ваера’’. Маня’’ округханана’’ марма’’ ӈарамдана.  Тикы’ саць сава!  Хусувэй по марад’ поӈгана едэй харад’’, ядэлава’’ ӈадиберӈа’’. Марканана’’ ханяӈэ’’ школа’’, музейва’’, библиотекава’’  юнета хибяри’’ нюмна нюмдебэй’’, тикы’ ёльце сава.
 Округханана’’  сававна  Анатолий Ивановичм’ теневанаӈэ маня’’  ибедорцетыва’’,  ӈамгэ  марканана’’ юнета  ӈока сава серм’ сертабэй хибяри’ нюмна’  ӈэда ядэлава,  нибтя школа, тен лата (памятная доска)  тенад яӈгу?  Тикым’  Совет Старейшин‘ ма’’лёяханана’’ таслабна, тарана падарм’ падбана тараӈгу.

Матрёна Талеева (Пырерко)’ падбэй