Та’ ёльцян’ тэвась округна еркы маркана, хусувэй ӈэсыхына тоходанна’’ ӈацекына’’ ныланавась тарпыдаць. Нерняна наӈгадя няхар’’ ирий’ ямбан ныланаӈгу’’, ныхыдамдо’ ма’’лабгу’’.

Вэба ириян’ тэвась сававна нылабэй’’, ныхыдамдо’ ма’’ламбэй, пыдадо’ савумдабэй’’ ӈацекы’’ нерня’ тоходанвамдо’ пяӈгудо’. Та’ ямбан ӈацекына ханярина ныланаӈгу’’. Хибяхова иба ян’ ӈэдалаӈгуд’, хибяхова харто’ илесь яханандо’ ныланаӈгуд’. Ханяӈы’’ ӈацекы’’ ныхыто’ пирувна таӈы’ мальӈгана манзараӈгу’’. Хойхана мюсерта’’ ненэциена нюкця’’ тоходанвамдо’ ёльцесь маймбась хоян’ ӈэдалэйдаць. Таняюв’ сиддо’ тиртя’’ ӈанохона тэвраць. Хой’ тер’’ ӈацекы’’ варёмдо’ мэць хойхана илеӈгу’’. Нисянадо’, небянадо’ нядабаӈгу’’. Хой’ илм’ торомдабӈгу’’. Таромдо’ мэць сян ирий’ мякана илеӈгу’’. Маркана илена’’ ӈацекы’’ ӈод ныланавадо’ несэй ӈэӈгу’’. Теда маля янда’’хана ӈацекына’’ е’’эмня площадка’’ манзара’’. Ӈацекы’’ таняюв’ хувэхэд’ турӈа’’. Яля’ ямбан ӈока’’ серу’’ сертасеты’’. Евако’’ ӈацекына ныланава’’ ӈоб’ таславы’’. Тикы е’’эмня тюку по’ округна бюджетхад’ тет’’ миллион’’ хасую’’ ёнар’’ еся’’ ханта’’. Ваеравы си’’ив маттамдэй яляхана евако’’ ӈацекына ныланавась маля ӈэдалэйдаць. Та’ ямбан Ивановской областьхана ныланавамдо’ мэтадо’, пыдо’ няюв’ харто’ манзаранидо’ манзараӈгу’’. Ӈацекы’’ хуркари’’ экскурсияха’ ӈэдалёрта’’, музейха’ тэворта’’, пыдадо’ савумдабгу’’, сянакода’’. Няръяна март’ пуня пилю’’ ирий пудана яляхана тута’’.

Ӈока ӈацекына тюку по’ Крымхана ныланаӈгуд’. Тюку ирий’ нябимдей яляхана няхар’’ ю’’ тет ӈацекы’’ Евпатория’ марад’ хэван’ санаториян’ ӈэдалэйдаць. Тамна юр’’ ӈацекы’’ сидя ю’’ няхарамдэй яляхана ныланавась маркад’ ӈэдалаӈгуд.