Вы здесь

Пирцяко Вылка (ярабц)

Я’ мал няна илена’’ ненэця’’ поӈгана ярабцм’ мэта’’ хибяридо ханярина иле’’. Ӈопой тарця хынокад’ не Панаевск’ выӈгана таня, тикы не Елена Токливна Лаптандер. Пыда няданда теда толавнда ярабцм’ падвы Няё Вэнго. Хэбидяко ярабц’ нюртей пелям’ теда толара’’.

Пирцяко Вылка’ ӈоб’’ не нядм’. Тёняӈы мякна нябани’ нё’’я’ сидя Ӈасяда няда таняӈаха’. Сидя Ӈасяда’ неди’ яӈгу – харти’ илеӈаха’. Нябами’ тёняӈы мякад няхаюта едм’ пиресетыда. Няхаюта панэд сэдсеты. Пирцяко Вылка’ нюда таня. Нюда Ӈасяда тёняӈы мякад мякна’’ пили’’ турцеты. Тя- ханинда иси. Хуркари исьда’’ тарси’’ тяхабтамби.

Няхар’’ по’ илева’’. Нюдя Ӈасяда тарем’ мамононда: – Пирцяко Вылка, ява’’ ханедасялма. Ханедатаха’’ ядва’’ пюхува’’.

Пыда тарем’ ма: – Мань тарем’ нидм’ харва’’!

Нямда ялэ’’ пэрӈада: – Ханедасавэй ядми’ пюхуни’. Хабтари мякна хэхэни’. Ӈарка Ӈасяда нябаконда ня’ ты’’ пэртаӈаха’. Мядм’ пэртаӈэ не няр ядэрт’’ нив’.

Хавота есямзь пыда тарем’ ма: – Хэванда ӈэб’’ни’ ӈоб’’ хэхэва’’.

Пирива’’ мадава’’. Пирцяко Вылка пыда тарем’ ма: – Не Ӈэсядэй, не ӈацекым’ табедаӈгурава.

Небяв не’’я нянани’ товы. Ямб есядёми’ сибдада. Пыда тарем’ ма: – Тюку яхана есид мэ’’ид. Теда’ такы яхана та’’нё еся’’ ни’’ тараӈгу’’. Нюдя Ӈасяда’ писямб’’ нён писянзету’. Ӈоб’’ нянд ӈэвам’ сад’’лабтаӈгун.

Хуркари вадаха’’ нябами’ си’’ми’ пэрӈа. Ӈэвами’ есясипой’ та’’нёӈада. Ӈамгэмда пон’ ваде’’манава’’ – хабтари’’ мякна тикана’’ хаява’’. Сыра’ ямбахана мюсева’’. Ханелава яханди’ ханяха’ тэв’. Ханесетыха’. Нюдя Ӈасяда мят’ толы’’. Едамда ӈамсетыда, пуна ӈани’ хэсеты. Ӈамгэ’ пиркана ӈани’ мятюсеты. Пыда тарем’ ма: – Пуна тоб’’нанда Пирцяко Вылкам’’’ нид сапаӈгув.

Маньзьван муми’ вуни таня’. Тыбкамда силӈада. Ти’’ ни’ ӈамды’’. Пирцяко Вылка торхаванонда. Мят’ ядвонда. Мяд’ ханзохана ходм’ сяхамла. Нюдя Ӈасяда’ сейда екар хэбта? Ти’’ нид такы ва’’авханда санэй’’. Та хонэй’’. Пирцяко Вылка нинякы ерме’? Няби сята хэв пидрев’ хэвы. Ӈавормана’’ сер’ пыда тарем’ ма: – Ханеванзь ладармэн нивэнанё’ ӈа’’! Ти’’ няна ӈамгэм’ пэрцан? Си’’ми’ сапуванзь ти’’ ни’ ӈамдынаси’’.

Нюдя Ӈасяда’ мунда яӈгу. Едва’’ ӈаво’’махадана’’ тикана’’ хонэйна’’. Нюдя Ӈасяда ӈани’ санавонда. Ненэйм’ паӈготам’ ӈани’ ня’’амвонда. Пирцяко Вылка ходм’ сяхамла. Тикари яханда ӈани’ мо’’нэй’’. Няхар’’ ӈэта ни’ санэй’. Санабта ӈод’’ Пирцяко Вылка ходм’ сяхамласеты. Ӈавэ’’ пиркана неками’ пыда тарем’ ма: – Тюку палка тарси’’ пэдакабтёвы! Ӈули’’ хабта сава ӈэдараха?

Ненэйм’ паӈготам’ пыда нэкалӈада. Ӈэванда сава ерь’ тыбкамда ха’’аврада. Нюдя Ӈасяда ӈопой’ сярцей’ – та’ хадада. Пин’ нюхуледа. Хананда ни’’ мано’’ӈада.

Хуняна яхани’ ямдэйни’. Нями’ ма’’нив’: – Нюдя Ӈасядам’ ӈэва’ едяхана ӈэдарабтами’.

Ӈарка Ӈасяда пыда тарем’ ма: -Теда’ яхани’ хэб’’ни’ тара. Няни’ хальмерм’ яханда ханаӈгув.

Нямда ханяда хана’’. Яханда ямдэй’’. Ӈарка Ӈасяда’ хэ’’мяхад нябани’ ня’ ялэ’’ тэдорӈани’. Нянда хэ’’мя’ пумна юно’’ ӈорцана’’, яндо’ пярна’’. Ӈарка Ӈасяда ӈани’ таня мэвы. Пыда тарем’ ма: – Нями’ хадавы.

Ярабц’ малда ни’’ӈа’’, пуданамда ӈани’ яляхана толаӈгура’’.