Вы здесь

Нина’’ нядабась илева’’

Я’’авлада не’’ «Ямб’ тохона» иле’’, сятаний Парасковья Тайбарей / Фото из открытых источников

Сидя ю’’ самляӈг по’’ тяхана мань нертеймэвна «Ямб’ то» общинан’ тэворӈадамзь. Нертеймэвна Ӈарка явна мюсерта’’ ненэцие’’ лаханакурць ня’’ӈадамзь. Тикы пуд’’ ӈока нина’’ хобсетына’’. Ханяӈэхэна ты’’ яляхана маня’’ хоян’ хэсетыва’’, ханяӈэхэна мюсерта’’ ненэця’’ март’ тэворцеты’’.

Паднана Прокопий Явтысой е’’эмняндо’ тарем’ лаханась, тюку ненэця’’ явнандо’ ӈани’’ сер’’, ӈэвдо’ тю’’уна минресь ядэрӈа’’. Пыдо’ манзарась теневана’’ хибяри’’. Таняна мал’’ манзарасеты’’, ӈацекы ӈэто’ ни нулць мале нядаӈгода, ӈармбэй ненэця’’ ныхыто’ пирувна нядаӈгосеты’’.

Андрей Тайбарей «Ямб’ то» община тыбэртя, нябимдей по’ лекарь’’ мякана пыдамда савумдаби. Тюкумэвахана март’ вэсаконда’ ня пухуцяда’ Парасковья, няхар’’ хасава’’ нюда’’ товыць. Паням’ мань ӈахы’’ похот теневав’. Ӈацембой, нямбара не ӈацекэцям сидя ю’’ самляӈг по’’ тяхана торомдаванзь. Тамальӈгана няхар’’ подась. Тюку яля’ Парасковья мале няхар’’ хасава ӈацекы’’ небя, мядм’ пэртя не, хасаванда’ ня хойхана мюсерць илевамда минреда.

– Хаюпа си’’ив по’’ тяхана хаядамзь. Ненэця’’ ватовна тюнями’ ваерась. Нертей, ӈэвтана’’ мякана тоць, тюн’ ӈэва ялями’ таслаць. 2013 по’ хор’’ ирий’ 15 яляхана тюнями’ ӈась. Тикы’ пуд’’ вэсакони’ мят’ илеванзь хаядамзь. Вэсакоми’ сава хибяри, хэвхананда ими’ нылана, сёнзяханани’ сава. Мани’ ӈопой я’ терни’, нини’’ нюдякоходани’ теневынись. Ӈарумзь ӈобт’ тэвынись, семьями’ ӈадимя. Мань небяв’, нисяв’ сиднтет нюм’ вадаӈаханзь. Андрей семьядо’ ӈаркась,небянди’, нисянди’ 13 нюдись. Мани’ ӈод’’ ӈарка семьян’ харвани’. Тедари’ няхар’’ хасава’’ нюми’. Си’’ив по’’ ӈобкана илени’, тюнями’ тенад тенев’…

Андрей Тайбарей’ тарця вади’’ мэ’’ӈась: – Неми’ хуркари’’ манзаяхана мел’’ ӈэсеты, ӈамгахэртан’ нисеты выдара’’, мяд’ манзаида ёльцьхананда сертабасетыда, нюни’’ маниесеты. Хойхана ӈацекы’’ е’’эмня садик’ яӈгу’’ ним, – ванерабтёсь Андрей нерня’ вадамда минреда. – Мани’ мя’’ми’’ ӈацекыни’ е’’эмня садик’, небядо’ воспитатель’. Маня’’ мюсерць яханана’’ нись’ ӈахакуна ӈадимы’’ семья’’ тянё ни’’ӈа’’, ӈацембой хибярина’’ ӈока’’. Мань тет хасава’’ нями’, пыдо’ хойхана мюсерць иле’’, тябекут’ нисетыва’’. Сертабада манзаина’’ тэворӈа’’. Тены’’ похо’’на’’ мякнана хусувэй ӈамгэва’’ тане. Ныланавана’’ ёльцяӈгана интернет’ мэцетыва’’, кинон’ сырцетыва’’, хуркари’’ юн’’ толабасетыва’’. Нюдяко ӈацекы’’ телефон’, планшет’ мэць тенева’’, ӈарка хибярихит’ саваркавна хусувэй ӈамгэмдо’ тасламби’’. Валакада мале «Ямахам’», квадроцикл’ мэта’’. Хойхана ил’ несэйворӈа’’. Ӈока ӈамгэм’ тенева тара, тикы е’’эмня тоходанась нив’ тара. Теда’ хоювна тэхэ’’на’’ нисетыва’’ ӈэдалёр’’, тына’’ сяӈава’’. Техникам’ мэцетыва’’. Илевава’’ тэхэ’’тана’’ пере’’. Ӈамзам’ мирдатава’’, есява’’ танеӈгу’’, таранадава’’ тэмдаӈгува’’.

Ӈарка пэвдэй ирийхана забойкава’’ мэцетыва’’. Тикы нерцю тасласетыва’’, сян’ тым’ хадаӈгува’’, ханяна ты’’ ӈамзам’ мирдатава’’. Хусувэй по’ ты’’ ӈамзам’ Воркутан’ ханасетыва’’, таняна хибяри’’ тэмдабасетыдо’. Тарем’ есядава’’ хомбива’’, тикахад илева’’…

Андрей лаханава’’ сер’’, мань фотография’’ манэ’’сарӈадамзь. Парасковья мяд’ тер’’ манием’, сян’ по’’ тяхана пыдо’ ӈокась ты’ яляхана пирдырмахана нердець. Тэхэ’’на’’ ӈэдалёрта’’ поӈгана нисядо’ Яков Семёнович Соболев нертей местам’ ханась, сава мядонзэйм’ ня’’амась. Нюда’’ ӈод’’ мядонзэйсавэй мякандо’ ӈэдалэйдаць.

– Ненэця’’ ӈахы’ похот хойхана тыдо’ пэрць мюсерта’’, тэхэт’ маня’’ илева’’. Тарем’ иринана’’, нисянана’’ илець. Маня’’ тарем’ илева’’, нюна’’ ил’ ӈани’’ тарця ӈэбнанда тара’’. Хойхана мюсерта’’ ненэця’’ илева’’ несэюмдана. Маня’ невхы по’’ тотрев’ мале нива’’ иле’’. Мякнана’’ хусувэй ӈамгэва тэворӈа’’. Нюна’’ вадабива’’, пыдо’ вадёсь тоходанаванзь ханта’’, тикы’ пуд’’ мякандо’ илеванзь тута’’. Тыбэртя’’ ӈэӈгу’’. Иринато’, нисянато’ ватовна нерня’ илевамдо’ минреӈгудо’,- Андрей Тайбарей лаханаванда пуданана’’ тарця вади’’ хэтась.

Хойхана мюсерта не мякнанда манзаяда тянё ни’’ӈа’’. Пыда няданда мята’ тер’’ ил’ пере’’. Мяд’ тер’’ небя хусувэй теневанамда нюхута’’ минреда. Нюда’’ нюдяко ӈэбнанда’ ӈод’’ пыда сиддо’ ныхыто’ пирувна нядаӈгось тохолабида. Хойхана мюсерта ӈацекы’’ илан’ небянадо’, нисянадо’ тохолабидо’. Хасава ӈацекы нисянда’ хэвхана нядаӈгода, не ӈацекы небянда’ ня мякана хусувэй манзаяхана нердеван’ харвасеты. Небяда’ тарцям’ маниесь пуня нисетыда пэр’’.

– Мань нюдякоходан’ небян’ хэвхана хусувэй ӈамгэм’ пэрць тоходанадамзь, – вадамда Парасковья ханада. – Мань ханзер’’ теда’ иледм’, тарем’ нерня’ илеван’ харвадм’. Вэсакоми’ сава хибяри, сими’ нядабасеты, нюда’’ пэрцеты. Харта манзаида теневана ненэця. Мани’ няхар’’ хасава нюкцями, янамбовна вадюдана’’. Сяӈок нюми’ ӈэӈгу, пунда тедари’’ яӈгу. Мякана ӈацекы’’ мун’ пили’’ собнанда тара. Пыдо’ небяндо, нисядо яб’ мив’ ӈа’’. Маня’’ хойхана мюсертаӈэ ӈопой яхана нисетыва’’ хасена’’, пили’’ манзарасетыва’’, тына’’ маниесетына’’, нюна’’ вадабина’’. Маня’’ илма’’ тарця. Тарця илан’ маймбива’’!

Тюку яля’ Тайбарей’ мяд’ терха’, Андреян’, Прасковьян’, хасава нюкцяхати’ Тимофеян’, Антошкан’, Алёшан’ ихид’ ӈэда’’ вади’’ хэтамбива’’. Ябда иледа’’!