Нянэй ненэця’’ тэхэт’ илена’’ хибяри’’. Маня’’ яханана хусувэй выӈгана тыдо’ пэртя’’ хибярина иле’’. Ты’ ненэцие’’ явнанда ядэла, ты’ ненэцие’’ ӈавламби, ты’ ембдяртава таби. Ханяӈы выӈгана ненэциена мяд’ терсавэй хойхана иле’’, манзара’’, нюдо’ вадамби’’.

Та’ ёльцянд’ тэвась хойхана мюсерта’’ ненэця’’ ӈацекыдо’ тохолковамдо’ ёльцесь нисянато’, небянато’ няюв парумбасьты’’. Хойхана мюсерта’’ ненэця’’ нюкцидо’ харто’ со’’явы яханандо’ маймбась тэворцеты’’. Пыдо’ хой’ илм’ мэнена’’, теневана’’ ӈацекы’’. Пыдо’ тэхэ’’на’’ манзаравам’ нерня минревнда’’. Ханяӈыдо’ тохолковамдо’ ёльце’’махад’ харвабнандо’ тыбэртяӈэ’ манзарась хаюда’’, ханяӈыдо’ мядм’ пэртяӈэ’ тарасу’’. Нерня тоходанван’ харвана’’ ӈацекэр’ тохолковамда ӈани’’ яхана мэтада’’. Ил’ харта тарця ӈэ’’ нив. Хойхана илевнда’’, манзаравнда’’ хибярина саць’ тара’’. Тэкоцина яханана’’ пилибт’ танева’’ е’’эмня мюсерта’’ хибярина ним’ тара’’. Нянэй ненэця’’ илевадо’ малӈэ’ тэхэт’ пере’’. Тарем’ сян’’ юр’’ по’’ тяхана ӈась, теда тарем’ ӈа, нерняна ӈод тарем’ ӈэбнанда нив’ тара’’. Теда илевахана маниебнана’’, ханяӈы выӈгана хасавари’’ тэхэ’’на’’ мэнаӈэ’ манзара’’. Нюдо’, недо’ ӈахэт’ маля хардахана иле’’. Тарця семьяхана нюкцидо’ маля хой’ илм’ ехэрана’’. Тыбэрма’’ серу’’ округханана тасламбидо’. Ӈокханда выӈгана ёнаркад’ вата хибярива’’ манзара’’. Тыдо’ кооперативха’’на’’, семейно-родовой общинаха’’на’’ пэръядо’. Мяд’ терсавэй мюсерта’’ ненэциена ӈод’ яханана тамна таня’’. Тарця ненэциена Ӈарка яхана, Канинхана мюсерӈа’’. Нянэй илм’ мэта’’ хибярина’’ нюдо’ хусувэй по’ хоян’ танаӈгасьты’’. Хусувэй по’ неняӈг ирийхана Канин’ няюв’ тиртя ӈано тэворцеты’’, хуний ӈани’’ яхана тоходанвы’’ ӈацекы’’ ( студент’’) нисянато’ мят’ тэврабсеты’’. Тюку по’ ӈод тарця вертолёт’ Канин’ явна яля ямбан тирӈась. «Восход», «Канин» кооперативхана манзарана’’ хибярина нюкци’’ мякандо’ тэврась. Тиртя ӈано хусувэй ӈэсын’ ӈамдорӈась. Ӈацекы’’ небянато’, нисянато’ хэвхана сидя ирий’ ямбан илеӈгу’’. Хасава’’ нисянадо’ нядабаӈгу’’, тэхэ’’ евась ядэрта’’, тарабнанда халям’ ня’’амвась ханта’’. Некоця’’ ӈани небянато’ няюв’ мядм’ манзаям’ пэрта’’. Небянадо’ хусувэй серкана нядабаӈгудо’. Идм’ тэвраӈгу’’, пякоцям’ мэӈгу’’, сэдъя’ танябнанда сэдораӈгу’’. Хой’ ил’ харта тарця’’, манзаяда ӈока’’.

Канинхана ӈокаюв’ хибяри’’ илевандо’ ямбан хойхана мюсерта’’, тэхэ’’на’’ мэна’’. Иринато’, хадунато’ манзаи’’ нерня нюдо’, нюто’ ню’’ пэръядо’. Тюкумэвахана вымна тирмы тиртя ӈанохона тыбэртя ӈэсын’ памятникм’ тэвраць. Иван Макарович Латышев илеванда ямбан Канинхана соявы, илеванда ямбан тыбэртя’ таравы, ӈарка илм’ мэ’’мы, сайнормахана мэвы ненэцясь’. 1984 похона яӈгумы. Пыда сюрвы яханда’ памятник’ масьтець. Тикы яляхана ӈока’’ перенида’’, нюда’’, нюта’’ ню’’ таняюв’ турӈаць. Ириндо’ ед’ ӈэвдо’ харваць.

Вынд’ ӈацекы’’ тэврамбада тиртя ӈано хусувэй по’ танесеты, есь’ тикы е’’эмня округханана Ӈэрм тенз’ ненэцие’’ серу’’ тасламбада программахад’ таславы’’.