Вы здесь

Хой’ илм’ мэтина’’

Округханана тыбэртя’’ хибярина’’, вымна мюсертина’’ тамна таня’’. Пыдо варёмдо’ мэць хойхана илевамдо’ мэ’’ӈа’’. Хасава’’ тыбэрӈа’’, ханисэйм’ ня’’амарпи’’, ханяна халядаӈгу’’.

Не’’ ӈод манзаядо’ саць ӈока’’ ӈэсьты’’. Ханяна яля’ ямбан ныланавам’ ехэрась ӈэто’ ниня мэсьты’’. Валакада пий’ тось ниня’’ пондан’ хасертыд’. Тарем’ ӈод, пыдо’ илевамдо’ сямянд’ саваӈэ’ таслабидо’. Хари’’ явнандо’ мюсерӈа’’, таӈга иле’’. Тэхэ’’на мэна’’ хибярина по’ ямбан манзара’’. Нянэювна ныланавамдо’ ты’ яляхана мэцьтыдо’. Ты’ ялям’ мэ’’манзь округна тыбэртя’’ маля синдтет юкад’ вата по’’ ямбан ма’’люрцеты’’. Тюку по’ ӈод хойхана илена’’, манзарана’’ нина’’ ӈарка ялямдо’ мэтадо’. Округна администрацияхана ӈэрм’ ненэцие’’ серу’’ тасламбада нина’’ ты’ ялян’ хамякова серу’’ тасламбидо’. Оргкомитет’ сянмэвна маля ма’’лысь. Еся’’ ты’ ялям’ мэ’’ма е’’эмня ӈахакуд’ округна бюджетан’ масьтевы’’. Ты’ яляхана хоян’ тиртя’’ ӈано тингуд’’, ты пэртяха’ мядонзэйм’ тэвраӈгу’’. Нюртей хибярина ты’ ялямдо’ мэ’’манзь маля неняӈг ирийна пудана толыркана ма’’лаӈгуд. Хусувэй кооперативхана, семейно-родовой общинахана манзарана’’ ныланава ялядо’ таславы. СПК «Ерв». «Харп», «Няръяна ты», «Ижемский оленевод», «Канин», «Восход», «Дружба народов», Нюдя я’ семейно-родовой общинахана манзарана’’, «Ямб’ тохона» мэна’’ нина’’ ӈарка ялян’ ма’’лаӈгуд. Хойхана илена’’ нина’’ ӈарка ялямдо’ ӈатедо’. Манзаравито’ ед’ ӈока’’ сава вади’’ намдӈгу’’. Тарця яляхана ханярина сянакова’’ ваераӈгу’’, ненэця’’ сямянд’ меретидо’ нюмдеӈгу’’. Культурахана манзарана’’ хоян’ тэвӈгуд, ихид’ хамандавы’’ программыдо’ манэ’’лабтаӈгу’’. Нито’ сею’ маймбтеӈгу’’.

Няръяна маркана иленаӈэ’ ты’ ялям’ мэ’’манзь’ тюку по’ пилю’’ ирий сиднтетимдей толыркана ма’’лаӈгуна’’.