Вы здесь

Ты ялява ӈатева’’

Ямбтондер’’ хэбидя яляхана ӈоб’ ма’’лаӈгуд

Маня’’ яханана юр’’ мат’’ ю’’ ёнаркад’ вата тэва’’. Ханярина тыбэртя’’ ненэциена иле’’, невхы иринато’, нисянато’ илӈгана варёмдо’ мэць манзара’’. Округханана юкад’ вата сельско-хозяйственный кооперативхана, хасую’’ семейно-родовой общинахана тыдо’ пэртя ненэця’’ манзара’’. 

Илевамдо’ сибцяӈэ’ нир’’ нюмдеӈгу’’, тоенана’’ сер’’ илевахандо’, манзаравандо’ тамна тянё ни’’ӈа’’. Тарем’ ӈэбнанда ӈод’ хойхана мюсерта’’ ненэця’’ хамадабидо’: тэси’’ нянэй ненэць’ илевада яӈгуда’’, тэхэт’ ненэць’ иле. Нюдя, Ӈарка, Канин, Тиман, Холгов яхана ӈокханда ёнаркад’ вата хибярива тыдо’ пэрць иле’’. Ханяӈы’’ хибярина мяд’ терсавэй хойхана илевамдо’ мэ’’ӈа’’, ханяӈы’’ яхана хасавари’’ тыдо’ пэрць хойхана’ мэ’’. Округна хусувэй ӈэсыхына тыбэрма’ серкана илевандо’ ямбан манзаравы’’, хойхана мюсермы’’ хибярина’’ иле’’. Тикы не’’, хасава’’ хуний илевадо’ тыто’ хэвхана ваерась. Тарця ненэциена хой’ илм’, тыбэрма’ серм’ саць савовна теневадо’. Пыдо’ – хойхана манзаравы’’ ветеран’’. Ӈарка ненэця’’ теда ӈод’ тыто’ няку тэвась паромбасьты’’. Ӈокаювдо’ та’ ёльцянд’ тэвась вынд’ танасетыд’, таняна та’ ямбан илесеты’’. Хойхана манзарана’’ нидо’ серкана, вадахана нядабасьтыдо’.

Пилю’’ ириян’ тэвась округханана тыбэртя’’ хэбидя ялям’ мэтава’’. Тюку по’ ӈод хойхана илена’’, манзарана’’ нина’’ ӈарка ялядо’ танеӈгу’’. Округна администрацияхана ӈэрм’ ненэцие’’ серу’’ тасламбада нина’’ ты’ ялян’ хамякова серу’’ тасламбидо’. Оргкомитет’ манзара. Еся’’ ӈод ты’ ялям’ мэ’’ма е’’эмня таня’’. Ты’ яляхана хоян’ тиртя’’ ӈано тингуд’’, ты пэртяха’ мядонзэйм’ тэвраӈгу’’. Нюртей хибярина ты’ ялямдо’ мэ’’манзь маля неняӈг ирийна пудана толыркана ма’’лаӈгуд. Хусувэй кооперативхана, семейно-родовой общинахана манзарана’’ ныланава ялядо’ таславы. СПК «Ерв». «Харп», «Няръяна ты», «Ижемский оленевод», «Канин», «Восход», «Дружба народов», Нюдя я’ семейно-родовой общинахана манзарана’’, «Ямб’ тохона» мэна’’ нина’’ ӈарка ялян’ ма’’лаӈгуд. Хойхана илена’’ нина’’ ӈарка ялямдо’ ӈатедо’. Манзаравито’ ед’ ӈока’’ сава вади’’ намдаӈгу’’. Няръяна маркана илена’’ хибяри’’ ӈод ты’ ялям’ ӈатедо’. Тюку по’ марад’ тер’’ хибяри’’ ты’ ялям’ пилю’’ ирий сиднтетимдей толыркана туристической центр’ няӈэна мэтадо’.

Ты ялян’ хамякова’’ ив ер миӈа’’. Маля таславы’’: ся’’ня, ханя’’ тиртя’’ ӈано’’ тиӈгуд’, хойхана манзарана’’ ненэцие’’ ӈарка ялям’ мэ’’мась тэвраӈгу’’. Маля тенева’’ ӈамгэм’ тамна хоян’ ханась тараӈгу’’. Тыбэртя’’, мяд’ манзаям’ пэртя’’ хибярихи’ мядонзэйм’ тэмдаби’’. Илевандо’ ямбан тэхэна’’ манзаравы’’ хибярина ӈод’ юрвы’’ ни’’ ӈэӈгу’’. Пыдо’ ӈод ӈарка яляхана ихид’ ӈэда’’ вади’’ намдгу’’. Хоян’ тарана’’, хынота’’ хибяри’’ тиӈгуд’, пыдо’ ӈод программыдо’ хамадавы’’. Ханярина тыбэртя’’ е’’эмня сянакова’’ танеӈгу’’. Сямянд’ сававна манзаравы’’ кооператив’’, бригада’’ еся’’ премии’’ ня’’амгу’’. Сямянд’ мэбета хибяридо’ нюмдеӈгу’’.

Ӈобкарт’ хойхана теда манзарана’’, невхэна манзаравы’’ хибярива пуняна хаёбнанда ни’’ тара’’. Хусувэва’’ ты’ яляхана сейхад’ ӈэда’’ вадам’, ихинянда сомбой сёкоцям’ намдбата, мядонзэйси’ нибнанда хаю’’.

Ты’ ялява округханана тюку по’ неняӈг ирийна сидя ю’’ хасуюдимдей яляхад’ пилю’’ ирийна сиднтетимдей толыр’’ ӈэсонд’ минда’’. Маня’’ ӈод хоян’ тиӈгуна’’, таняна манзарана’’ нина’’ няюв’ таневы’’ лахарёна’’ нянда тэвраӈгуна’’. Округна сямянд’ ӈарка ялям’ сава ихиня, сава серкана ядтахова’’! Ява’’, тына’’ лэтбась, сахарамбась яханана пилибт’ илехова’’.