Вы здесь

Хусувэй сарпям’ теневана

Пилю’’ ириян’ тэвась округханана иленаӈэ’ ты ялям’ мэтава’’. Тарця ялява яханана маля сиднтет юкад’ вата по’’ ямбан таня’’. Хойхана мюсерта’’ ненэциена’’ ӈарка яляӈэ’ таславы’’.

Индигахана илеванда ямбан тэхэ’’на’’ манзаравы ненэць’ Пётр Николаевич Апицын иле, ты яля’ пыда яляда. Неняӈг ирийхана Пётр Николаевич сиднтет ю’’ помда ядтась. Пыда нямнанда вадам’ маня’’ редакцияхана Татьяна Юрьевна Давыдова Индига ӈэсыхы’ Совет ветаранов нерм’ пэртя тэврась.

Ӈарка няндо’, тыбэртя’ ветеран’ нямна тарця вади’’ падась: – « Ёнар’’ хасуёнар’’ няхар’’ ю’’ самлязимдей похона неняӈг ирийхана сидя ю’’ тетимдей яленда яв’ вархы выӈгана Пета соявы. Сае мер’ нисяси’’, небяси’’ хаёвы. Тет яӈганя пода панась харта мале ты ераба пявы, тикэдда ӈока по тыбэртяӈэ колхоз «Тиманец» ты ерабись. Совхоз «Индигскойӈэ» хэ’’мядда ӈоб’’ манзарась. Неле’’мада пун Ольга Петровна ня’ си’’ив ӈацекэм’ вадаӈаха; няхар’’ нюдь, тет ненюдь, сидя нюда мале яӈгубэхэ’. Вадабэй ӈацекэта мале харто’’ нюдо’ ӈобкандо’ таня’’: синдет нюкця, тамна ненюкцяда нюда таня. Мал’ не нюда тоху’’: Риммада парикмахерӈэ тарась, Лена Лидада ня’ маркана садикхана воспитательӈэ манзараӈаха’, Сусаннада иба яна иле, дояркаӈэ таравы. Пётр Николаевич Апицын нюм’ яленда ӈацекыда маркад Индига’ ӈэсын’ то’’, ӈарка хардана мал’ ма’’лэяд’’. Нисяда сехэрэ’’мна теда’ Валентин ӈэдалёрӈа, нисяда ты ераби.

Пётр Николаевич саць савава манзараванда е’’эмня Государственной премиям’ ня’’амась, тяна школан’ турцеты, тоходанна ӈацекэ’’ хари’’ манзаямда вадецетыда. Петава’’ сайнорма’ мальӈгана ӈацекысь, ӈадьбята няда Победа ялян’ юбилейной медаль «Дети войны» ми’’ӈаць. Сахарамбада Пётр Николаевич, пыдар е’’эмнят соя’’ма ялянат сава вади хэтбива’’. Пыдар манзарабат ӈарка серо сертанась, тыбэртя’’ ветеранан, ныхыр тамна ӈока ӈэя, едя’’ сит ваяртабая’’, тамна пон иле’’, ил’ пилибт’’ сава ӈэя, нюкцид сеяп маябтамбая’’.»