Вы здесь

Сэр’’ я’ Ӈацекэ

Хари’’ вадавна толанзёда хибяри вадамда сававна теневаӈгуда. Ӈодьбянда маня’’ страницахана хуркари’’ вадако, лаханако, сюдбабц, ярабц падбасьтыва. Хибя мян’’ӈада’’ толаӈгуда, няханда ваде’’тада. Нейко Максимовна Янгасова Ямалкана илена не. Пыда тохолкода. Илеванда ямбан ӈока лаханако’’ ма’’лась, ханяӈыдо’ книгаӈэ’сертавы. « Ненецкие сказки и эпические песни сюдбабц’’, ярабц’’» таремъюв’ нюмдевы книгада сидя ёнар’’ нюртей похона ӈадимясь. Тюку яля’ «Сэр’’ я Ӈацекэ» сюдбабц’ нябю пелям’ толара’’.

Сэр’’ я’ Ӈацекэ

Сёда хэӈгада. Тет ладсэр’’ сава’’ ты’’ ӈэвы’’. Няхар’’ ӈэдалёда хараси’’ ӈэдалы’’. Няхар’’ си’’ивахав’ пиняри’ миӈава’’. Паӈгарка соты ниня’’ харбилы’’. Нерденетава’’ сотэ’ ӈэва’ ни’ варцадтеда. Миндана’’ е’’эня си’’ив юр’’ мя’’. Я’ тер’’ мандалавы’’. Тарем’ сырпа’’ни: Си’’ив юр’’ерня си’’ив ю’’ мя’’. Си’’ив юд’ерня си’’ив ӈарка мя’’. Си’’ив Сэвсэро’’ мяд’’ ӈэӈгоданакы.

Ӈарка тэта Нохоми пыда тарем’ маси’’: -Мядона’’ такы’’.

Мядо’ нё’ няд маня’’ ӈадимява’’. Вадо’ няби хан’ нултава’’. Вадо’ махарин ха’’мась пяв. Нюдя тэта Нохо’ савакам’ екась, мят’ яда’’ нив’. Ӈарка тэта арка тэта охо нита маханяӈы мят’ мялкада. Нини мят’ тю’, мяк’’ мятю’’. Мань ханани ниня та’ ӈамдё хаидм’. Тюми нароӈоць манзелабтав. Харини ярэлы’’. Мякы мякана Ӈарка тэта арка тэта охо тарем мамононда: -Ваян Сюдбя, ӈамгэ серо’’ нид тев’ тэвын?

Ваяр масьнё’’: -Нендава’ е’’эманя тев’ тэвыв’’.

Ӈарка тэта Нохо пыда ӈо’’ масьнё’’: – Ӈари’’ мань ӈод’’ ӈани’ тарця сер нид тев’ тэвъяв’’. Мань сидяхавм’ хоӈгудм’.

Ваяр масьнё’’: – Ӈопойм’ хоӈгудм’.

Ёнэй Нохор инзелеб’’нани, няби мякана тарем’ мамононда: – Тавысо’’ Сюдбя, ӈамгэ серо’’ нид тев’ тэвын?

Пыда тарем’ маси’’: – Ядеро’’мадани ӈопойм’ ходм’. Ёнэй Нохор ӈани’ тарем’ маси’’: – Ӈари’ мань ӈод’’ сидяхавм’ хоӈгудм’. Инзелеб’’нани нюдя Нохоми маси’’: – Туӈгусо’’ Сюдбя, яр хубтасянё’’. Ӈамгэ сер’ нид тюкон’ тэвын?

Пыда тарем’ маси’’: – Нюми ӈоб’ нюми нюни неӈэ ӈобкавм’ ходм’. Тикы’ ямбахана идам’ пэрӈа’’ма. Сёёдо’ сахама’’. Маньехэван тикы’’ яабахана харини мэ’’ӈадм’. Тарем’ мэнахандо’ пыдо’ ябилмондо’. Инзелеб’’нани: сятаняӈы мякад ӈоб’’ляри не’’я тарпы’’. Ерь ӈарка мят’ яда. Маханяӈы мякад ӈани’ не ӈадимя. Ерь ӈарка мяд’ нён’ ӈобт’ нултади’. Лаханакурӈаха’: – Теда’ товы’’ хасава’’ сидани хосая товы’’ ӈэдараха’’. Теда’ хонарахами’.

Ӈаркаюм’ не ӈобанда пикцям’ сякалпа то. Вахалць пяда: – Сидани’ хосая товы ӈэхэваб’’нанд нянанд тоб’’ни сава ӈэбтав’?

Мань ӈани’ мадм’: – Харвахавабати’ тут’’ нидим’.

Ӈаркаюм’ не маси’’: – Ӈока мядо’’ тер’’ пунари хаванда’’!

Нехэ’ туцяӈоди’, падыди’ ня’’амаӈаха’. Тет ладсэрми манзабтэян. Танянани хунанани нё’ паӈгувна нултав. Мят’ тёрейбтейв’’, мадм’: – Нябако’, нядамд’ тадм’.

Едами ӈамзь неры то’’ма’ пумна тет ладсэрми ӈани’ харейн. Ӈока’’я’’ мяк’’ нулта’’ нивав’. Ханани ни’ тюми нароӈоць ӈани’ манзелабтав. Мякана марнадо’ я’’авлы’’. Си’’ивахав’ яля’ тамна ябе’’ ни’’им’. Ӈамгэ пиркана мунодо’ хансе’’, полкаданараха’’.

Харасядахад ӈоб’’ ӈэдалёда. Мэта тэхэвада тет харёй. Маниеб’’нани ламдорка ӈэвы, сырма’ е’’эмня тёндерм’ сэхэвы. Хан’ ӈэ сэхэрт’ ӈэда хэбилеры’’. Пон’ нись мы’’ тюковна товы. Вадо’’ маларин’ ханамда сярада. Нарондо ӈылад ненэйм’ паӈгатам’ тыбкам’ вэрда. Манзь ханада: – Мядони хадавы тахабе хоян.

Малда тамна ни’’ӈа.