Хохорэй ирад нумда мале селбя няю сюрхал’й. Иб хаерта тамна тюмна нуво’ сёрхана ӈэбта ӈод мале тад нерня танта навэд сусана, хаерта иры пуданахна хой тях пэвсюи няана падэлаӈгу. Хохорэй иры еркана мале янта ний янамбовна тахруваӈэ ханта’, ӈамдэд’, ӈув’ хаӈгу ним, тад нерня посвэдрев таринту яӈгумта’. Понта тэнкана ӈани саре яля’ ӈока ӈэсьты. Ирынта няби вэкна пи’’ тахна я’’ ябта хаморӈа, пидя тад нерня навэд тецьхамта.
Ты’ хохорэй ирахана мале сава таркту хаморӈа. Вы’ тер’ ненэця няблюй хадаюи панэӈэ. Тарем хадантиту тыту’ ню’ мале нара няана таславы ӈы ним. Тенкана марембаванта хора’ нямтоду селдурӈа. Ты’ тареду тюку ирыхана тари самаӈга. Тад нерня хохорэй Иры сусава’ ёльцяӈгана мале ханяӈы нув’ сармик’ янамбовна ядембади’ ё’ няю пяӈгу нидум. Я’ мидкад ненэй ненэця’’ тюку ирым хохорэй ирыӈэ тари хумбази вуниду нюмзебю. Танта мале няби’’ няю иб серхалб нод выӈгана хохорэй тамна ябтамбю ним. Ханиду’ ит’ хамва сер тюку иры ӈэвана хохорэй’’ ябтаӈга. Выӈгана ӈэда тохона’’, яха’’ мюня ет ханярина ябтамбада хохорэй сэван ереворӈа. Хой латдан пыдриду’’ тёрду’’ хурид со’’. Ханиду’ вэба иры пуданахна тоду’ хорпа пяӈгу, иры пуданахна сомбовна тиӈгуд. Ӈадьбата ханяӈэхна, селбя няана понта мэр пэв, ханя’’ минданту пэмахад выӈгана ит’’ ханимы’ хохорэй ӈадиберсяты.
Хурина селбя няана, вэба иры пуданахна хохорэй ӈобт манталбату, сырада мер ни хамаӈгу. Нарма няана хохорэй пидямта пирцякая надо сюмб ни, харта тари пирцямпой седа’’ ӈэва ниня сертабата – нара нувода’ сарё ӈэӈгу, итя ӈарка ӈэӈгу.
Хохорэй ирыхана мале хаерта навэд тысяни пявта ӈод, выӈгна тамна ядибику яля соховахнанту ӈэсьты’’. Тудоко’, ет хуркари ӈоди’ тэнз явна тари лехэбты. Иры ӈэвана мараӈга ӈокама вынта’’ латдан. Ты’’пэоця нензелм вуни мэс, тадако’ нюракоць тыду’ янтахна ханӈа. Ты’’ тудакохот сава ӈаварду юӈгу нив. Ӈадьбата ӈарка ненэцяи вадана выӈгана тудако ӈокавна вадёб, сыра ямбан ӈэрм нув’’ ӈока ӈэӈгу.
Тидари тамна неняӈг тирӈа, сабе ӈока нибту’ ӈод. Иры пуданахна пыду ӈарханту сусаӈгу. Хохорэй ирыхана неняӈг пуд тамна либярё неняӈг тиӈг ним. Тикав’’ тамна тари тарця неняӈгахат сяторабту явлу’ ним. Сава нумгана ид сяр ниня’’ либярё неняӈг ӈэхалба санарта халэ манэма – Саре ялям пэрӈа. Сава яля ерт лакри ӈокая халэв тёрсавэй яв ерт ӈамторпату – нув’’ мерзямям пэрӈа. Тамна тарць хавна тад ӈадиманта яля хурка ӈэвам хуркари явна ядерта, нув’’ сармик ӈани пунмана хэтыбиду’’. Хурина халэв’’ мандалӈэ тёркосавэй ит ӈамторць пэвнанту – тебтад няна сомбой, ядимбику яля ӈэӈгу. Варӈэ тонта ӈыл пыямда такалпа пявнанта тецьда нуво’’ товам пэрӈа. Пыдду’’ тёркосавэй нум тахаӈгана тирпнанту – вэва нув’’ тута’’. Садавна ядерта варӈэм манэма ядембада яля пэрӈа. Тикы нум’’ сармик, варӈэ, мандалӈэ тюмна тирпнанту – тебтад няна сава яля, хаер яля ӈэӈгу. Лакри я’’ сяр ниня халы’ ӈадимб – хэ’ ялянта вэкна мунолаӈгуд. Иры еркана неняӈг’’ лакри сусава тецьда нуво’’ товам пэрӈа. Хохорэй иры сусана ёльцянд неняӈг, либрё тамна тирб – хэнё, хаерад ялэ пэрӈа.
