Тюку по’ пудана ӈарка сайнорма ваера’’махад’ си’’ив ю’’ пом’ ядтаваць. Си’’ив ю’’ по’’ тяхана ты’’ ниць ирий хасуюдимдей яляхана ханярина илена’’ хибяри’’ сава юнм’ намдаць – вэвко’ сайнорма ваера.

Тарця юн’ намдась янда’’хана сайнормы’’, ямдо’ хэвняхад’ товэхэт’ сахарамбавы’’ ненэця’’ янамбовна мякато’ тэворць’ пядось. Си’’ив ю’’ по’’ ямбан хибярина сайнормам’ ехэрась иле’’, манзара’’, нюдо’ вадамби’’. Яханана мэёвна илева’’. Тюку по’ Победа’ това си’’ив ю’’ пом’ хибярина ты’’ ниць ирий хасуюдимдей’ толыркана ядтаць. Тикы сямянд’ ӈарка яля’. Тарця яляхана сайнормахана яӈгумы’’ ненэциена тензебтеваць, ӈэвна’’ хавравась памятник’ хэван’ турӈаваць, ӈамдэд’ тэвраваць. Маня’’ округханана хусувэй семьяхана сайнормы’’ хибяридо’ тенейдо’. Тарця сер’’ юрбада вани’’ӈа’’. Хари’’ я’ историям’ тенесь’ тара’’, пудана’’ илевндаха’’ яна’ историям’ тэврава’’ маня’’ манзаява’’. Саю’ по’’ ямбан округна хусувэй выӈгад’, хусувэй мякад’ ненэця’’ хибярина ямдо’ лэтбавась’ ӈэдалэйдаць. Нянэй ненэця’’ ханярина сайнорӈаць. Ӈокаювна оленно-транспортный батальонхана хаяць. Округхадана хибярина тэсавэй’’ ӈэдалэйдаць. Тына’’ сайнормахана ӈарка манзаям’ пэрӈаць. Боеприпас’’ тэво’’лаць, пенделевы’’ хибяри’’ бойхад’ тарпрабиць. Няръяна маркана оленно- транспортный батальон’’ е’’эмня памятник’ масьтець. Таня’’ хибярина хусувэй по’ турцеты’’. Ненэциена сайнорма’ нямна кином’ сертабада ӈод’ таня’’. Неняӈг’’ ирий няхар’’ юдимдей толыркана этно-культурный центр’ мякана маркана илена’’ хибярина ма’’люрӈаць. Лавозеро ӈэсыхыд’ режиссёр, член Союза фотохудожников’ товысь. Владимир Кузнецов маля няхар’’ ю’’ си’’ив по’’ ямбан кино’’ сертаби. Кольской полуостровхана илена’’ толырто’ тянё ненэцие’’ нямна сертавы манзаида таня’’. Пыда ваде’’ӈадась: ханзер’’ манзаида сертаби, хибяри’’ няюв ханзер’’ манзара. «На северном рубеже» нюбета фильмамда’ тэврась, тикы кином’ манэ’’ӈаваць. Мурманск’ няна сайнормам’ манэ’’лабтась, сяӈок маям’ хибяри’’ саю’ по’’ ямбан манэ’’ӈаць. Тикы фильм’ «Золотой витязь» премиям’ ня’’амвысь.

Кольской полуостровхана нянэй ненэця’’ сайнорӈаць. Маня’’ иринана’’ немцяхат’ харто’ ямдо’ лэтбиць. Ты’’ ӈод ӈаркавна манзараць. Владимир Кузнецов оленно-транспортный батальонхана сайнормы’’ ненэцие’’ едэй сертавнда манзаяхананда манэ’’лабтаван’ харва. Ӈодьбянда пыда округхана’ тось. Нянэй ненэцие’’ ям’ манэ’’ман’ харва. Сайнормахана’ мэвы’’ ненэця’’, санормахана яӈгумы’’ хибярина перени’’ лаханорць’ ня’’ата. Красноян’ ты’ ялян’ ӈэдалёрмась’ ятна. Нянэй ненэцяӈгад’ кином’ сертамбава серкана нядаӈгодадамда пюрӈа’’. Ма’’лёвахана мась: – Хибя’’ мякнандо’ сайнормы хибярито’ сидяӈг’’ таня, фронтхад’ ня’’амвы письмо’ танедакы, хурка юн’ сайнормы нита’’ нямна теневада’’. Тикым’ ваде’’ӈара’’, падрода’’ манэ’’лабтада’’. Мал’’ тикы’ сертавнда кинохона манэ’’лабтавы’’ ӈэӈгу’’.