Ӈахы’’ похот’ выӈгана тарем’ миӈа’’: хасава’’ тыдо’ лэтбасеты’’. Пыдо’ нядандо’ нянэювна мято’ тер’’ ил’ пере’’. Тыбэртя’’ хусувэй серкана сямянд’ нядаӈгодаӈэ’ тарана – не.

Нехэд’ ханярина ил’ пере’’, хойхана таминдя’’ тикада ӈади’’. Ханяна не’’ хасавито’ няюв вымна мюсерӈа’’, таняна тыбэрма серудо’ ӈод саваркавна минзьты’’. Не’ хой’ илӈгана ӈарка серм’ минрена хибяри. Некоця нюкцидо’ вадаби’’, мято’ ибам’ лэтби, ӈавар’’ пиреби, ембдяр’’ сэдби, мята’ тер нида’’ сэдорпи. Хасавам’ хуркари’’ серкана нядабада. Пилю’’ ирийхана мэта тыбэртина’’ хэбидя яля’ хойхана мюсерта’’ не’’ е’’эмня ӈод ӈарка яляӈэ’ таславы. Хой’ не’’ ӈод ӈока сава вадам’ намдаць. Вымна мюсерта’’ ненэциена округханана тамна тянё ни’’ӈа’’. Тарем’ не’’ хасавито’ няюв’ «Путь Ильича», «Рассвет Севера», «Красный Октябрь», «Дружбы народов», «Харп», «Ерв», «Канин» кооперативхана мюсерӈа’’, не’’ хойхана манзара’’. «Ямб’ тохона» не’’ тянё ни’’ӈа’’, ӈацембой некоця’’ варёмдо’ мэць хойхана иле’’. Таняна илена’’ наны’’ недамдо’ Я’малкад, Таймыркад ханяӈэхэна хосеясьты’’. Нянэй мякана илевамдо’ мэць не’’ хуркари’’ манзаяхана нисьты’’ хаюр’’.

Не’ манзаяда тянё вани’’ӈа’’. Не’ мякана нюда’’ мание’’, нюда’’ хусувэй тарана’’ манзаян’ табадабида. Не’’ ӈацекэця нюдякодандо’ мякана вадюданась небяндо’ хэвхана хусувэй мяд’ манзаям’ янамбовна торомдабсеты’’. Небямда’ маниесь, не ӈацекы ютъямна’’ сэдораӈгу, надурта, тэнаком’ миӈгу. Манзаян’ тохолавы не ӈацекэр’ вадёванда’ сер, харта мяканда тёмбекавна илеӈгу. Мята иба ӈэӈгу, пяда, ита пилибт’ танеӈгу. Хасавамда иба мякана ӈатеӈгуда, нюкцида тавдёда’’, сяянда ед’ ябембаӈгу’’.